އިންޑިއާގެ ނުސާފު ވައިގެ ތެރެއިން ކާބަން ނަގައިގެން މުށި އުފައްދަނީ

ވައި ތަޣައްޔަރުވުމުގެ މައްސަލަ ބޮޑު އިންޑިއާގައި، ނުސާފު ވައިގެ ތެރެއިން ކާބަން ނަގައި، އިމާރާތްކުރުމުގައި ބޭނުންކުރާ މުށި އުފެއްދުމުގެ މަސައްކަތް ފަށައިފި އެވެ.

ދެހާސް ނަވާރަ ވަނަ އަހަރު އުފެއްދި ސްޓާޓަޕް "ކާބަން ކްރާފްޓް ޑިޒައިން" ދަށުން މިކަން ކުރުމުގައި އިސްކޮށް ހުރީ އާކިޓެކްޓެއް ކަމަށްވާ ތޭޖާސް ސިދްނާލެވެ. އޭނާ ބުނި ގޮތުގައި ވައިގެ ތެރޭގައި ހުންނަ ބްލެކް ކާބަން އެކްސްޓްރެކްޓްކޮށްގެން މުށި އުފައްދަން ފެށުމަކީ ދުނިޔެ ހޫނުވުމާ ދެކޮޅަށް ވެސް ކުރެވޭ މަސައްކަތެކެވެ.

"ހަގީގަތުގައި އިންޑިއާ އަށް ބަލާ ކަމަށް ވަންޏާ ވައި ނުސާފުވުމުގެ ޒިންމާ ނަގަން ޖެހޭ އެއް ބަޔަކަށް ވާނެ ކޮންސްޓްރަކްޝަން ދާއިރާގެ މީހުން،" ތޭޖާސް ބުންޏެވެ. "އަހަރެމެން ހެދި ދިރާސާތަކުން އެނގުނީ އެ ދާއިރާގެ ހިއްސާ މިކަމުގައި ވަރަށް ބޮޑުކަން. އެހެންވެ މިއީ ކުރިއަށް ވުރެ ބޮޑަށް ލޯހުޅުވަން މަޖުބޫރުވި ކަމެއް މިއީ."

ނުސާފު ވައިގައި ހުންނަ ބްލެކް ކާބަން ބޭނުންކޮށްގެން އަތުން ކުރާ މަސައްކަތެއްގެ ގޮތުގައި، ރީތި ގޮތްގޮތަށް މުށި އުފައްދާއިރު ދެން ބޭނުންކުރާ މައިގަނޑު ތަކެއްޗަކީ ސިމެންތި އާއި މާބްލް ވޭސްޓެވެ.

ތޭޖާސް ބުނި ގޮތުގައި ބްލެކް ކާބަން އަކީ އޭގެ ބޭނުން ހިފާނެ ގޮތްތަކާ މެދު މާ ގިނަ ބަޔަކު ވިސްނާ އެއްޗެއް ނޫނެވެ.

"އެހެންވެ އަހަރެމެން ނިންމީ އޭގެ ބޭނުން ހިފައިގެން ވެއްޓަށް ރައްކާތެރި އުފެއްދުމެއް އިމާރާތްކުރުމުގެ ދާއިރާ އަށް ހާއްސަކޮށްގެން އުފައްދަން،" އޭނާ ބުންޏެވެ.

މި މަސައްކަތް "ކާބަން ކްރާފްޓް ޑިޒައިން" އިން ކުރަމުން އަންނަނީ ކުރިން އިންޑިއާގައި "އެއާ އިންކް" ގެ ނަމުގައި އަދި މިހާރު "ގްރެވިކީ ލެބްސް" ކިޔާ ކުންފުންޏަކާ ގުޅިގެންނެވެ. މި ދެ ކުންފުނި ގުޅިގެން ކުރާ ކަމަކީ އަތުން އުފައްދާ މުށިތަކަށް ބްލެކް ކާބަން އިން އެކިއެކި ޑިޒައިންތައް ގެނެސް، ޗާލު ރީތި އަދި "ލަގްޒަރީ ލުކެއް" ހުންނަ މުށި އުފެއްދުމެވެ.

މި އާ މަސައްކަތާ ބެހޭ ގޮތުން "ގްރެވިކީ ލެބްސް" ގެ އަނިރުދު ޝަރުމާ ސީއެންއެން އަށް ބުނީ އެ މީހުން "އެއާ ޕޮލިއުޝަން" މާނަކުރަނީ ރިސޯސެއްގެ ގޮތުގައި ކަމަށެވެ.

"އެއާ ޕޮލިއުޝަންއޭ ބުނީމާ ހަމައެކަނި ނެގަޓިވްކޮށް ވިސްނުމުގެ ބަދަލުގައި އަހަރެމެން ގެންގުޅޭ ފިކުރަކީ ހިނގާށޭ އެއީ ރިސޯސެއް [ގުދުރަތީ ވަސީލަތެއް] ކަމަށް ބަލައިގެން އޭގެ ބޭނުންކޮށްގެން ވެއްޓަށް ފައިދާވާނެ ކަހަލަ އުފެއްދުމަށް ގެނެސްދޭން،" އޭނާ ބުންޏެވެ.

ދެ ކުންފުނީގެ ވެސް އަމާޒަކީ ވޭސްޓްގެ ބޭރުވާ ނުވަތަ އުކައިލެވޭ އެއްޗެހީގެ 70 ޕަސެންޓް ބޭނުންކޮށްގެން މުށި އުފެއްދުމެވެ.

ނުސާފު ވައިގެ ބްލެކް ކާބަން ބޭނުންކޮށްގެން އުފައްދާ މުށި މިހާރު ގަންނަން ވެސް ލިބޭނެ އެވެ. އިންޑިއާގެ އިތިރުން ދުނިޔޭގެ އެހެން މާކެޓްތަކަށް އެ ނެރެ، މަގުބޫލުކަން ވެސް ވަނީ ހޯދައިފަ އެވެ. އަކަ މީޓަރެއްގެ އަގަކީ 29 ޑޮލަރު (447.18ރ.) އެވެ.

"ކާބަން ކްރާފްޓް ޑިޒައިން" އާއި "ގްރެވިކީ ލެބްސް" އިން ބުނިގޮތުގައި އަމާޒަކީ ކުރިއަށް އޮތް ތަނުގައި އަގުތައް ކުޑަވުމެވެ. އަދި އެންމެންނަށް ވެސް އަތްފޯރާ އަގަކަށް ކާބަން މުށި ލިބުމެވެ.

"މިއީ ހަމައެކަނި ފައިސާވެރިންނަށް ގަނެވޭ ފެންވަރުގެ އެއްޗަކަށް ވެގެން ވެސް، ނެރެން އުޅޭ ނަތީޖާއެއް ވެސް ނުނެރެވޭނެ،" ތޭޖާސް ބުންޏެވެ. "އެހެންވީމަ އަހަރެމެންގެ އަމާޒަކީ އެކި ފަންތީގެ މީހުންނަށް ވެސް އަތްފޯރާ އެއްޗަކަށް ކާބަން މުށި ހެދުން."