ކާޑުގެ ބާވަތްތަކުގެ އަގު ބޮޑުކުރުމުން އޮކްޓޯބަރު މަހު އިންފްލޭޝަން 1.7 ޕަސެންޓް އުފުލުނު: އެމްއެމްއޭ

މިދިޔަ އޮކްޓޯބަރު މަހުގެ އެއްވަނަ ދުވަހުން ފެށިގެން ކާޑުގެ ބާވަތްތަކުގެ އަގު 100 ޕަސެންޓް ބޮޑުކުރުމާ ގުޅިގެން އެ މަހު މުދަލާއި ހިދުމަތުގެ އަގު 1.7 ޕަސެންޓް މައްޗަށް ގޮސްފައިވާ ކަަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކުން ދައްކައިފި އެވެ.

މަރުކަޒީ ބޭންކުން މަހަކު އެއްފަހަރު ނެރޭ އިގްތިސާދީ ރިވިއުގައި ބުނެފައި ވަނީ އޮކްޓޯބަރު މަހު އިންފްލޭޝަން ރޭޓް މައްޗަށް ދިޔަ މައިގަނޑު ސަބަބަކީ ކާޑުގެ ބާވަތްތަކަށް ސަރުކާރުން ދެމުން އައި ސަބްސިޑީގެ ބޮޑު ބައެއް އުނިކުރުމާ ގުޅިގެން އަގުތައް މައްޗަށް ދިއުން ކަމަށެވެ. އަދި އޭގެ އިތުރުން ގޭގޭގެ ކުލިތައް މައްޗަށް ދިއުމަކީ ވެސް އިންފްލޭޝަން މަތިވާން ޖެހުނު ސަބަބެއް ކަމަށް ވެސް އެ ރިވިއުގައި ބުނެފައިވެ އެވެ.

އެމްްއެމްއޭ އިން ބުނީ މަހުން މަހަށް ބަލާއިރު މިދިޔަ ސެޕްޓެމްބަރު މަހު އިންފްލޭޝަން ރޭޓް 0.4 ޕަސެންޓްގައި ހުރުމަށްފަހު އޮކްޓޯބަރު މަހު ވަނީ 1.9 ޕަސެންޓް މައްޗަށް ގޮސްފަ އެވެ. އޭގެ މައިގަނޑު ސަބަބަކީ ވެސް ކާޑުގެ ބާވަތްތަކުގެ އަގުތައް މައްޗަށް ދިއުން ކަމަސް ވެސް އެ ރިވިއުގައި ބުނެފައިވެ އެވެ.

ސަބްސިޑީ ކަނޑާލުމުން ހަނޑޫ ކިލޯއެއް މިހާރު ގަންނަން ލިބެނީ 7.96ރ. އަށެވެ. އޮކްޓޯބަރު އެކެއްގެ ކުރިން ހަނޑޫ ކިލޯއެއް ވިއްކީ 3.98ރ. އަށެވެ. ހަކުރު ކިލޯއެއް އަށް ރުފިޔާ އަށް އަދި ފުށް ކިލޯއެއްގެ އަގު 5.96 އަށް ވަނީ ބޮޑުވެފަ އެވެ. ފުށް ކިލޯއެއް ކުރިން ވިއްކީ 2.96ރ. އަށެވެ. ހަކުރު ކިލޯއެއް ވިއްކީ ހަތަރު ރުފިޔާ އަށެވެ.