ބޮޑު އާބާދީއަށް "ހިޔާ ޕާކު" ތަރައްގީކުރަނީ

ހުޅުމާލެ ދެ ވަނަ ފިޔަވަހީގެ ހިޔާ ފްލެޓްތަކަށް ދިރިއުޅުން ބަދަލުކުރާ އާއިލާތަކަށް ހާއްސަކޮށްގެން ޕާކެއް ތަރައްގީކުރުމުގެ މަސައްކަތް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން ކުރަން ފަށައިފި އެވެ.

އެޗްޑީސީން ބުނީ ހިޔާ ފްލެޓުތަކަށް މީހުން ބަދަލުވުމާ އެކު އެތަނުގެ އާބާދީ 30،000 އިން މައްޗަށް އަރައިގެންދާނެތީ އެ މީހުންނަށް ހިތްފަސޭހަކުރެވޭނެ އިންތިޒާމު އެތަނުގައި މުހިއްމު ކަމަށެވެ.

ހިޔާ ފްލެޓްގެ އެޗް5 އިން އެޗް15އާ ދެމެދުގައި އޮތް ހުސް ބިމުގައި މި ޕާކު އެޅުމަށް މިވަގުތު އެޗްޑީސީން ކުރަމުން އަންނަ މަސައްކަތަކީ އެތަން ފެހިކުރުމެވެ. ރުކާއި އެކި ބާވަތުގެ ގަސްތައް ވަނީ އިންދަން ފަށައިފަ އެވެ.

އެޗްޑީސީން ބުނި ގޮތުގައި އެތަނުގެ މަސައްކަތް ނިމޭއިރު ތަފާތު އެކި ވައްތަރުގެ ގަސް އެ ޕާކުގައި ހުންނާނެ އެވެ. އަދި ޕްލާޒާއަކާއި ޕްލެޓްފޯމްތަކެއްގެ އިތުރުން އައުޓްޑޯ ޖިމެއް ވެސް އެތަނުގައި ހުންނާނެ ކަމަށް އެޗްޑީސީން ބުންޏެވެ.

އެޗްޑީސީގެ މާސްޓާ ޕްލޭންގައިވާ ގޮތުން މިތަނުގެ ޖާގައަކީ 1.2 ހެކްޓަރެވެ. އެއީ ފޭސް އެކެއްގައި އޮންނަ ސެންޓްރަލް ޕާކުގެ ޖާގައިގެ ދެބައި ކުޅައެއްބަ އެވެ.

ހިޔާ ފްލެޓްގައި އުޅޭ މީހުންނަށް ހިތްފަސޭހަ މާހައުލެއް ގާއިމުކުރަން އެ ސަރަހައްދުގައި ޕާކެއް އަޅަން ނިންމިއިރު މިވަގުތު އެ ސަރަހައްދާ ކައިރީ އެފަދަ އެއްވެސް އިންތިޒާމެއް ނެތެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގި އެ ޕްރޮޖެކްޓުގެ ދަށުން 6،720 މީހަކަށް ފްލެޓް ލިބިފައިވާއިިރު އޭގެ ތެރެއިން 60 އެއްހާ މީހުން މިހާރު ފްލެޓްގައި ދިރިއުޅެން ފަށައިފި އެވެ. އެކަމަކު މީހުން ބަދަލުވާން ފެށިއިރު ވެސް އެތަނުން އެއްވެސް އަސާސީ ހިދުމަތެއް ނުލިބޭތީ އެކަމުގެ ޝަކުވާ ރައްޔިތުން ދަނީ ކުރަމުންނެވެ.

އެހެންވެ އެ މައްސަލަތަކަށް ހައްލެއް ހޯދުމުގެ މަސައްކަތް ކުރަމުން އަންނަ ކަމަށް އެޗްޑީސީން ބުންޏެވެ.