ސާފް ޗެމްޕިއަންޝިޕަށް ގައުމީ ކުލަތަކުން ދިވެހިވަންތަ ލޯގޯއެއް

ގައުމީ ކުލަތައް ރަމްޒުކޮށްދޭ ގޮތަށް ސާފް ޗެމްޕިއަންޝިޕަށް ދިވެހި ވަންތަ ލޯގޯއެއް މިރޭ ލޯންޗުކޮށްފި އެވެ.

މި ލޯގޯ އިން ރަމްޒުކޮށްދެނީ ދިވެހި ކަނޑުމަހާއި ދިވެހި ސަގާފަތެވެ. ގައުމީ ފުޓްބޯޅަ ދަނޑުގައި މިރޭ ބޭއްވި ރަސްމިއްޔާތުގައި ވަނީ ސާފް ޗެމްޕިއަންޝިޕުގެ މެސްކޮޓް އަދި ގައުމީ ޓީމުގެ ތީމާއި ޝިއާރު ވެސް ލޯންޗުކޮށްފަ އެވެ. މި ހުރިހާ ސެގްމެންޓްތަކެއް ލޯންޗުކޮށްދެއްވީ ރައީސް އިބްރާހިމް މުހައްމަދު ސޯލިހް އެވެ.

ސާފް ޗެމްޕިއަންޝިޕް ބްރޭންޑް މާކެޓިންގައި އިސްކޮށް ހަރަކާތްތެރިވާ، ނިއުޝާދު ޝަރީފް ވިދާޅުވީ އެ ހުރިހާ ސެގްމެންޓްތަކެއް ތައްޔާރު ކުރީ ސައްތައިން ސައްތަ ދިވެހި ހިޔާލުތައް ހިމަނައިގެން ކަމަށެވެ. އަދި ރާއްޖޭގެ ސާފް ޗެމްޕިއަންޝިޕް ލޯގޯ ދެކުނު އޭޝިއާގެ ފުޓްބޯޅަ ފެޑްރޭޝަނުން ފާސްކޮށްފައިވާ ކަމަށް ވެސް އޭނާ ވިދާޅުވި އެވެ.

ނިއުޝާދު ވިދާޅުވީ ސާފް ޗެމްޕިއަންޝިޕް ބްރޭންޑް ކުރުމުގައި އެފްއޭއެމް އާއި އޭނާގެ ޓީމުން ވިސްނީ ބައިނަލްއަގްވާމީ ދުނިޔޭގައި ރާއްޖެ ޕްރޮމޯޓް ކުރެވޭނެ ގޮތަކަށް ކަމަށެވެ.

"އެގޮތުން އަޅުގަނޑުމެން ހިޔާރު މި ކުރީ އަޅުގަނޑުމެންގެ ސަގާފަތާއި އާދަކާދައާ އަޅުގަނޑުމެންގެ ދިވެހި ރާއްޖެ ދޭހަ ވާނެ އެލެމެންޓްތައް،" ސާފް ޗެމްޕިއަންޝިޕްގެ ލޯގޯ ތަފްސީލުކޮށްދެމުން ނިއުޝާދު ވިދާޅުވި އެވެ.

"ރާއްޖޭގެ މެރިން ބަޔޯޑައިވަސިޓީ. ވޭލްޝާކް. މަންތާރޭ، ހިރިގާ ޕެޓާން މިކަހަލަ އެކިއެކި އެލެމެންޓްސްތައް ވަދެގެން އަޅުގަނޑުމެންގެ ޑިޒައިން ސްޓޯރީ މި ފުރިހަމަކުރީ. މިހާރު ރާއްޖޭގެ އެލެމެންޓްސްއާއެކީ މުޅިން ލޯކަލް ޔުނިކް ބްރޭންޑެއް ސާފް ޗެމްޕިއަންޝިޕަށް މިއިނީ،" ނިއުޝާދު ވިދާޅުވި އެވެ.

ސާފް ޗެމްޕިއަންޝިޕުގެ ލޯގޯގައި ސާފްގެ ރަސްމީ ލޯގޯގައި ހިމެނޭ ކުލަތައް ވެސް ހިމަނައިފައިވެ އެވެ.

ސާފް ޗެމްޕިއަންޝިޕުގެ އޮފިޝަލް މެސްކޮޓް އަކީ ދިވެހި ރަތް މަސް ރަމްޒުކޮށްދޭ "ސްނެޕާ" އެވެ.

ސާފް ޗެމްޕިއަންޝިޕުގައި ގައުމީ ޓީމުގެ ހާއްސަ ތީީމަކީ "މަގޭ މަހަލްދީބު" އެވެ. ގައުމީ ޓީމުގެ ޝިއާރު ހާއްސަކޮށްފައި ވަނީ ތިން ވަނަ ފަހަރަށް ސާފް ޗެމްޕިއަންޝިޕް ކާމިޔާބު ކުރުމަށް ރާއްޖެ އިން އަމާޒު ކަނޑައަޅައިފައިވުމުން އެއަށް ނިސްބަތްކޮށެވެ. ސާފް ޗެމްޕިއަންޝިޕުގައި ރާއްޖޭގެ ޝިއާރަކީ، "ތިން ވަނަ ފަހަރު. މިއީ އެފަހަރު" އެވެ.

އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ، ސާފް ޗެމްޕިއަންޝިޕުގައި ވާދަކުރާ ގައުމީ ޓީމުގެ ހުރިހާ ކުޅުންތެރިންގެ އަމާޒަކީ ވެސް ދިވެހި ރައްޔިތުންނަށް އުފާވެރިކަން ގެނެސްދިނުން ކަމަށެވެ. ސާފް ޗެމްޕިއަންޝިޕަށް ތައްޔާރުވާން ގައުމީ ޓީމު މިހާރު ދަނީ ގަތަރުގައި ޓްރޭނިން ހަދަމުންނެވެ.

ސާފް ޗެމްޕިއަންޝިޕުގެ ބިޑު ރާއްޖެ އަށް ކާމިޔާބު ކުރީ، ނޭޕާލާ ވާދަކޮށެވެ. ކުރިން ބަންގްލަދޭޝްގައި ބާއްވަން އޮތް މުބާރާތް އަލުން ބިޑަށް ހުޅުވާލަން ސާފް އިން ނިންމީ، ބަންގްލަދޭޝްގައި ކޮވިޑް-19 ގެ ހާލަތު އޮތް ގޮތުން އެ ގައުމުގައި މުބާރާތް ބޭއްވޭނެ ހާލަތެއް ނެތުމުންނެވެ.

ރާއްޖެ ކުޅޭ ފުރަތަމަ މެޗުގައި އަންނަ މަހު 1 ވަނަ ދުވަހު ނުކުންނާނީ ނޭޕާލާ ދެކޮޅަށެވެ. ރާއްޖޭގެ ދެ ވަނަ މެޗު އޮންނާނީ އޭގެ ހަ ދުވަސް ފަހުން އޮކްޓޯބަރު 7 ގަ އެވެ. އެ ދުވަހު ރާއްޖެ ނުކުންނާނީ ބަންގަލަދޭޝްއާ ދެކޮޅަށެވެ. ރާއްޖޭގެ ތިން ވަނަ މެޗުގައި އޮކްޓޯބަރު 10 ގައި ނުކުންނާނީ ލަންކާއާ ދެކޮޅަށެވެ. އޭގެ ދެ ދުވަސް ފަހުން އޮކްޓޯބަރު 13 ގައި ރާއްޖެ ނުކުންނާނީ އިންޑިއާއާ ދެކޮޅަށެވެ.

ލީގު އުސޫލުން ކުޅުމަށް ފަހު ފައިނަލަށް ދާނީ އެންމެ ގިނަ ޕޮއިންޓް ހޯދާ ދެ ޓީމެވެ. މި ފަހަރުގެ މުބާރާތުގައި ބޫޓާން އާއި ޕާކިސްތާން ވާދައެއް ނުކުރާނެ އެވެ. މުބާރާތުގައި ވާދަނުކުރަން ބޫޓާން ނިންމީ އެ ގައުމުގައި ކޮވިޑުގެ ހާލަތު އޮތް ގޮތުން ގައުމުން ބޭރަށް ފުރައިގެންދާން ފުޓުބޯޅަ ޓީމަށް ހުއްދަ ނެތުމުންނެވެ. ޕާކިސްތާން އޮތީ ފީފާ ސަސްޕެންޝަނުގަ އެވެ.