ދުނިޔެ ހޫނުވުމުގެ އެތައް ނުރައްކަލެއް އެމެރިކާއަށް

ދުނިޔެ ހޫނުވުމުގެ ސަބަބުން، މޫސުމަށް އަންނަ ބަދަލުތަކާ ގުޅިގެން، ދުނިޔެ އަށް ކުރިމަތިވެދާނެ ކަމަށް، މީގެ އަހަރުތަކެއް ކުރިން ސައެންސްވެރިން އިންޒާރު ކުރި، އެތައް ކަމެއް އެމެރިކާ ތަޖުރިބާކުރަން ޖެހިއްޖެ އެވެ.

ތޫފާންތަކާއި، ޖަންގަލިތަކުގައި ރޯވެފައިވާ އަލިފާންގަނޑުތަކާއި، ފެންބޮޑުވުމާއި، ހޫނު ރޯޅިތަކާއި ހަނަފަސްކަން، އެމެރިކާގެ ސަރަހައްދަކަށް ފަހު ސަރަހައްދެއް މިއަދު އަންނަނީ ތަޖުރިބާކުރަމުންނެވެ. އެއް ތޫފާނަކުން ލިބުނު ގެއްލުންތައް މުޅިން ސާފުނުވެ އުޅެނިކޮށް ޖަންގަލިތަކުގައި ރޯވާން ފަށަ އެވެ. އެއް އަލިފާންގަނޑު ނިއްވައިނުލެވިގެން އުޅެނިކޮށް އެހެން ސަރަހައްދެއްގައި ފެންބޮޑުވެ އެވެ. އަނެއް ސަރަހައްދަކަށް ހޫނު ރޯޅިތައް އަރައި، އެތައް ބައެއްގެ ފުރާނަ އަށް ނުރައްކާ ކުރެ އެވެ.

ގަލްފް އޮފް މެކްސިކޯގެ ތެރެއިން ލޫޒިއާނާ ސްޓޭޓަށް އެރި އައިޑާ ތޫފާންގެ ކޮޅިގަނޑު މުޅިން ނުހިނދިގެން އުޅެނިކޮށް، ކެލިފޯނިއާގެ އެލް ޑޮރާޑޯ ސަރަހައްދުގެ ޖަންގަލިތަކުގައި ރޯވެ މިހާރު އަންނަނީ އަނދަމުންނެވެ. މި އަލިފާނުގެ ސަބަބުން ކެލިފޯނިއާގެ ގާތްގަނޑަކަށް 200،000 އޭކަރުގެ ސަރަހައްދެއްގައި ވަނީ ރޯވެފަ އެވެ. އަދި ޓޫރިސްޓުންގެ މެދުގައި މަގުބޫލު ސަރަހައްދެއް ކަމަށްވާ ސައުތު ލޭކް ޓަހާއޯ އާއި ކައިރި ހިސާބުތަކުން މީހުން ހުސްކުރަން ވަނީ ފަށައިފަ އެވެ.

ހަމައެއާ އެކު ޓެނެސީގެ ރައްޔިތުން އަދިވެސް ތިބީ އައިޑާ ތޫފާނުގެ ސަބަބުން މިދިޔަ ހަފުތާގައި ބޮޑުވި ފެންގަނޑު ހިނދޭނެ ވަގުތެއްގެ އިންތިޒާރުގަ އެވެ. އޭގެ އިތުރުން އައިޑާ ތޫފާނުގައި ޖެހުނު ބާރު ވައިގެ ސަބަބުން، ކަރަންޓު ކޭބަލްތައް ކެނޑި، ލޫޒިއާނާގެ ބޮޑު ސަރަހައްދަކުން ކަރަންޓުގެ ހިދުމަތް ކެނޑިފައިވާތީ ގިނަ ބަޔަކު ތިބީ ގަދަ ހޫނަށް ކެތްކުރާނެ ގޮތެއް ނޭނގިފަ އެވެ. ގޭގޭ ދޮށަށް ހިޔާ ދޭ ބޮޑެތި ގަސްތައް ވެސް ވަނީ، އައިޑާ ތޫފާނުގައި މުލުން ލުހިފަ އެވެ.

އޭގެ އިތުރުން އެމެރިކާގެ ހުޅަނގު ސަރަހައްދު މިހާރު ތަޖުރިބާކުރަމުން ދަނީ ހަނަފަސްކަމެވެ. ބައެއް ކުޅިތަކުގެ ބޮޑުބައެއް ހިނދި، ބައެއް ކޯރުތަކުން ފެން މަދުވެފައިވާތީ، އެ ސަރަހައްދުތަކަށް ފެން ލިބުމުގައި ވަރަށް ބޮޑު ދަތިތަކެއް ވަނީ ކުރިމަތިވެފަ އެވެ.

މޫސުމީ މިފަދަ ބަދަލުތަކުގެ ސަބަބުން ގިނަ ބަޔަކަށް އެކި ބާވަތުގެ ނުރައްކާތައް ކުރިމަތިވަމުން އަންނަ އިރު، ތަޖުރިބާކާރުން ބުނާ ގޮތުގައި، ހަގީގީ ގޮންޖެހުމަކަށް ވާނީ، ހާލުގައި ޖެހޭ މީހުންނަށް އެކަށޭނަ ގޮތެއްގައި އެހީތެރިކަން ފޯރުކޮށްދިނުމެވެ. އެއީ މިހާރު ކާރިސާތައް ކުރިމަތިވަމުން އަންނަ މިންވަރު އިތުރުވުމާއި، ކާރިސާތަކުގައި ލިބޭ ގެއްލުންތައް އިތުރުވެފައިވާ އިރު، ކުއްލި އެހީތެރިކަން ފޯރުވައިދޭ ނިޒާމުތައް އެމިންވަރަށް ފެންވަރު މަތިކުރެވިފައި ނެތީމަ އެވެ.

ރައިސް ޔުނިވަސިޓީގެ ސޯޝިއޮލޮޖީ ޕްރޮފެސަރު ޖޭމްސް އެލިއޮޓް ވިދާޅުވި ގޮތުގައި، މިހާރު ކުރިމަތިވަމުން އަންނަ ކާރިސާތަކާ ކުރިމަތިލާން ބޭނުން ނަމަ، އެހީތެރިކަން ފޯރުވައިދިނުމުގެ ނިޒާމު މިހާރަށް ވުރެ ތަރައްގީ ކުރަންޖެހޭނެ އެވެ.