އާދަޔާ ހިލާފަށް ދުނިޔެ ހޫނުވާ ސަބަބު ބުނެދޭން ދަތިވެފައި

ދުނިޔެ ހޫނުވަމުން އަންނަތާ އެތައް އަހަރެއް ވެފައި ވާއިރު މި މައްސަލަ ކުއްލިއަކަށް ބޮޑުވި ސަބަބެއް ހޯދަން ސައިންސްވެރިން ކުރާ މަސައްކަތުގައި އަދިވެސް ޖަވާބެއް ނުލިބޭ ކަމަށާއި އަދިވެސް މިކަން ބަލަމުން އަންނަ ކަމަށް ސައިންސްވެރިން ބުނެފި އެވެ.

ވޭތުވެދިޔަ ދެ އަހަރުގެ ތެރޭގައި، ފިނިހޫނުމިން ރެކޯޑަކަށް ފަހު ރެކޯޑަކަށް އަރަމުން ގޮސްފައި ވާއިރު މިހާރު ފެންނަމުންދާ ބަދަލުގެ އަސްލަކީ ކޮބައިތޯ ބެލުމަށް ކުރީގެ ރެކޯޑްތައް ބަލައި، ފިނިހޫނުމިން ބަދަލުވަމުންދާ ޕެޓާން ދެނެގަތުމަށް ވެސް އަންނަނީ މަސައްކަތްކުރަމުންނެވެ.

ސައިންސްވެރިންގެ އިއްތިފާގުވާ ގޮތުގައި ފޮސިލް ފިއުލް އެންދުމަކީ ދިގު މުއްދަތަކަށް ދުނިޔެ ހޫނުވުމަށް މަގުފަހިވާ ކަމެކެވެ. އަދި އާންމުކޮށް އެކި ދުވަސްވަރު ފިނިހޫނުމިން ހުންނަ މިންވަރަށް ވެސް މި ކަމުގެ ސަބަބުން އަސަރުކުރާނެ ކަމަށް ސައިންސްވެރިން ބުނެ އެވެ.

އެކަމަކު ކުއްލިއަކަށް ހޫނު ގަދަވެގެން ދިޔަ ސަބަބެއް އަދި ސައިންސްވެރިންނަށް އޮޅުންފިލުވައެއް ނުދެވެ އެވެ.

ތަޖުރިބާކާރުން ދެކޭ ގޮތުގައި ވިލާތަކުގެ ޕެޓާންތަކަށް އަންނަ ބަދަލުތަކާއި ވައިގެ ޒަރިއްޔާއިން ތަޣައްޔަރުވުމާއި ކާބަން ރައްކާކުރުމުގެ ގާބިލުކަން ދުނިޔެއަށް އޮތް މިންވަރަކީ ސަބަބުތަކެއް ކަމަށް ވެދާނެ އެވެ. ނަމަވެސް ސާފު މަންޒަރެއް މިކަމުގައި ފެންނަން އިތުރު އަހަރެއް ނުވަތަ ދެ އަހަރެއް ނަގާނެ ކަމަށް ސައިންސްވެރިން ބުނެ އެވެ.

ނާސާ ގޮޑާޑް އިންސްޓިޓިއުޓް ފޯ ސްޕޭސް ސްޓަޑީޒްގެ ޑިރެކްޓަރު ގެވިން ޝްމިޓް މިދިޔަ ނޮވެމްބަރު މަހު ވިދާޅުވި ގޮތުގައި 2023 ވަނަ އަހަރަކީ އެހެން ހުރިހާ އަހަރަކަށްވުރެ ހޫނު އަހަރެކެވެ. އަދި މި އަހަރު ވެސް ހަމަ އެ ރެކޯޑަށް ދާނެ ކަމަށް ވިދާޅުވި އެވެ.

"މިއީ ކިހިނެއް ދިމާވާ ކަމެއްކަން އެނގޭނެ ނަމައޭ ހިތަށް އަރާ. އެކަމަކު އަޅުގަނޑަކަށް ނޭނގެ،" އޭނާ ވިދާޅުވި އެވެ.

"އަޅުގަނޑުމެން އަދިވެސް މިދަނީ މިހެން ދިމާވި ގޮތާއި، މޫސުމީ ނިޒާމު ހިނގަމުންދާ ގޮތް ބަދަލުވޭތޯ ދެނެގަންނަން މަސައްކަތް ކުރަމުން."

ފޮސިލް ފިއުލް އެންދުމުން ކާބަން ޑައިއޮކްސައިޑް ފަދަ ގްރީންހައުސް ގޭސްތައް ބޭރުވެ، ބިމާ ކައިރީގައި ހޫނުކަން ހިފެހެއްޓެ އެވެ.

ފޮސިލް ފިއުލް ބޭރުކުރާ މިންވަރު 2023 ވަނަ އަހަރު ރެކޯޑް މިންވަރަކަށް މައްޗަށް ގޮސްފައިވާއިރު، ކަނޑުގެ އެވްރެޖް ސަރަޙައްދާއި ވައިގެ ފިނިހޫނުމިން ވަނީ އެ އިތުރުވުމާ އެއް ހަމަޔަކުން އަދި އެކަން ހިނގަމުން އަންނަ އާންމު އުސޫލުން، ހޫނުވަމުން ގޮސްފަ އެވެ.

ނަމަވެސް 2023 ވަނަ އަހަރުގެ ޖޫން މަހުން ފެށިގެން މިދިޔަ ސެޕްޓެމްބަރު މަހުގެ ނިޔަލަށް ދުނިޔޭގެ ފިނިހޫނުމިން ހުރީ މީގެ ކުރިން ފެނިފައި ނުވާ ޓްރެންޑެއްގައި މައްޗަށް ގޮސްފައި ކަމަށް ދުނިޔޭގެ މޫސުމާ ބެހޭ ޖަމިއްޔާއިން ބުންޏެވެ.

ހޫނުގަދަކަމުން 2023 ވަނަ އަހަރާއި 2024 ވަނަ އަހަރަކީ މުޅި ތާރީހުގައި ވެސް އެންމެ ހޫނު ގަދަ ދެ އަހަރު ކަމަށް ކަނޑައެޅޭހާ ފަސޭހަ އެވެ.

އިނގިރޭސިވިލާތުގެ ޔުނިވާސިޓީ އޮފް ރީޑިންގެ ކްލައިމެޓް ސައިންޓިސްޓެއް ކަމަށްވާ ރިޗަޑް އެލަން އޭއެފްޕީއަށް ވިދާޅުވި ގޮތުގައި ފާއިތުވި ދެ އަހަރުގެ ރެކޯޑް ހޫނުކަމުގެ ސަބަބުން ދުނިޔޭގެ ކަންކަން ވަނީ އަލުންބަލުން ބަލަން ޖެހިފަ އެވެ.