އަންނަ އަހަރުގެ އެޑެކްސެލް އޭއެސް އިމްތިހާނު ފަސްކޮށްފި

އޭ ލެވެލްގައި ހަދާ އެންމެ ފުރަތަމަ އިމްތިހާނު، އެޑެކްސެލްގެ އޭ އެސް އިމްތިހާނު އެޑިއުކޭޝަން މިނިސްޓްރީން ފަސްކޮށްފި އެވެ.

އެ މިނިސްޓްރީން އެންމެ ފުރަތަމަ ހަމަޖައްސާފައި އޮތީ އަންނަ އަހަރުގެ މެއި/ޖޫންގައި އޭއެސް އިމްތިހާނު ބާއްވާށެވެ. އެކަމަކު، އަންނަ މަހުގެ 26 ގައި ގްރޭޑު 11 ފަށައި، މެއި މަހު އިމްތިހާނު ހެދުމަށް ދަރިވަރުންނަށް ފުރިހަމައަށް ތައްޔާރުނުވެވޭނެ ކަމުގެ ކަންބޮޑުވުންތައް ހިއްސާކުރުމުން މިނިސްޓްރީން ވަނީ އެ ނިންމުން ބަދަލުކޮށްފަ އެވެ.

ސްކޫލުތަކަށް ފޮނުވި ސާކިއުލާގައި ބުނީ، މިދިޔަ އާދިއްތަ ދުވަހު ޕްރިންސިޕަލުންނާ އެކު ބޭއްވި ބައްދަލުވުމުގައި ހުށަހަޅާފައިވާ ގޮތަށް އޭ އެސް އިމްތިހާނު އަންނަ އަހަރުގެ އޮކްޓޯބަރު/ނޮވެމްބަރަށް ފަސްކޮށްފައިވާ ކަމަށެވެ.

އެކަމާ ގުޅިގެން ވިލާ އިންޓަނޭޝަނަލް ހައި ސްކޫލުގެ ޕްރިންސިޕަލް ސައީދު އަހުމަދު "މިހާރު" އަށް ވިދާޅުވީ، އަހަރެއްގެ ތެރޭގައި މާއްދާއެއް 180 ގަޑިއިރު ވަންދެން ކިޔަވައިދިނުމަށް އެޑެކްސެލް ރިކޮމެންޑުކުރާ ކަމަށެވެ. ނަމަވެސް މިނިސްޓްރީން އެންމެ ފުރަތަމަ ހަމަޖެއްސި ގޮތުން 100 ގަޑިއިރު ވެސް ހަމަނުވާ ކަމަށް އޭނާ ވިދާޅުވި އެވެ.

"ކުދިންނަށް އިމްތިހާނަށް ތައްޔާރުނުވެވޭތީ މިނިސްޓަރުގެ ސަމާލުކަން ގެނައީ މިކަން. އެހެންވެ، ޕްރިންސިޕަލުންގެ ހިޔާލު ހޯދުމަށް ފަހު އެކަން ބަދަލުކޮށްފައި މި ވަނީ،" ސައީދު ވިދާޅުވި އެވެ.