އޮލިމްޕިކްސް ފައިނަލުގައި ޗެމްޕިއަން ބްރެޒިލްއާ ދެކޮޅަށް ސްޕެއިން

ޓޯކިޔޯ (އޮގަސްޓް 3) - ޖަޕާންގައި މިހާރު ކުރިއަށްދާ އޮލިމްޕިކްސްގެ ފުޓްބޯޅައިގެ ފިރިހެނުންގެ ފައިނަލަށް އެންމެ ފަހުގެ ޗެމްޕިއަން ބްރެޒިލްއާ ދެކޮޅަށް ސްޕެއިން ވާދަކުރަން ޖެހިއްޖެ އެވެ.

މިއަދު ކުޅުނު ސެމީ ފައިނަލު މެޗުތައް ބްރެޒިލް އާއި ސްޕެއިން ކާމިޔާބު ކުރީ މެކްސިކޯ އާއި ޖަޕާން ބަލި ކުރުމަށް ފަހު އެވެ.

ސެމީ ފައިނަލް ފުރަތަމަ މެޗުގައި، ބްރެޒިލް އިން މެކްސިކޯ ބަލި ކުރީ ޕެނަލްޓީ ޖަހައިގެން 4-1 އިންނެވެ. ލަނޑެއް ނުޖެހި އެއްވަރުވުމުން، ޕެނަލްޓީ ޝޫޓް އައުޓުގައި ބްރެޒިލް އިން ޖެހި ހަތަރު ޕެނަލްޓީ ވެސް ކާމިޔާބު ކުރި އެވެ. ބްރެޒިލްގެ ފުރަތަމަ ޕެނަލްޓީ ކާމިޔާބު ކުރީ، ވެޓަރަން ޑިފެންޑަރު ޑެނީ އަލްވޭސް އެވެ. މެކްސިކޯގެ ފުރަތަމަ ދެ ޕެނަލްޓީ ފޮނުވާލި، ޔޯހާން ފިލިޕޭ ވްޒްކްއޭޒް އަދި އެޑްއާޑޯ އަގީރޭ އަށް ކާމިޔާބެއް ނުކުރެވުނެވެ.

ބްރެޒިލްގެ އަނެއް ތިން ޕެނަލްޓީ ކާމިޔާބު ކުރީ، އާސެނަލްގެ ގެބްރިއަލް މާޓެނެލީ އާއި ލިޔޯންގެ ބުރުނޯ ގިމަރޭޒް އަދި ރެއާލް މެޑްރިޑުގެ ލޯން އެއްބަސްވުމުގެ ދަށުން މިދިޔަ ސީޒަންގައި ބްރޯޝިއާ ޑޯޓަމަންޑަށް ކުޅުނު ރޭނިއާ ޖެސޫސް އެވެ.

ސެމީ ފައިނަލް ދެ ވަނަ މެޗުގައި ސްޕެއިން އިން ޖަޕާން ބަލި ކުރީ، އިތުރު ވަގުތުގެ ދެ ހާފުގެ ތެރެއިން ދެ ވަނަ ހާފުގައި މާކޯ އެސެންސިއޯ ކާމިޔާބު ކުރި ލަނޑުންނެވެ. މެޗުގެ 90 މިނެޓް ނިމުނީ ލަނޑެއް ނުޖެހި އެވެ.

ބްރެޒިލް އާއި ސްޕެއިން ކުޅޭ ފައިނަލް މެޗު އޮންނާނީ އަންނަ ހޮނިހިރު ދުވަހު ރާއްޖޭ ގަޑިން ހަވީރު 4:30 ގަ އެވެ. ބްރޯންޒް މެޑަލް މެޗަށް ހުކުރު ދުވަހު ޖަޕާން އާއި މެކްސިކޯ ނުކުންނާނެ އެވެ.