މެސީގެ ގޯލްތަކުން އާޖެންޓީނާ އަށް ގުރޫޕުގެ އެއްވަނަ

މާޓޯ ގްރޯސޯ، ބްރެޒިލް (ޖޫން 29) - ކެޕްޓަން ލިއޮނެލް މެސީގެ ދެ ލަނޑާ އެކު ބޮލީވިއާގެ މައްޗަށް 4-1 އިން މޮޅުވެ ކޮޕާ އެމެރިކާގެ ގުރޫޕް އޭގެ އެއް ވަނަ އާޖެންޓީނާ ހޯދައިފި އެވެ.

މެޗުގައި މެސީގެ ދެ ލަނޑުގެ ތެރެއިން ފުރަތަމަ ލަނޑު ޖެހީ ޕެނަލްޓީއަކުންނެވެ. ރޭގެ މަޗަކީ އާޖެންޓީނާގެ ޓީމަށް މެސީ ކުޅުނު 148 ވަނަ މެޗެވެ. މިދިޔަ ހަފުތާގައި އާޖެންޓީނާގެ ކުރީގެ ޑިފެންޑަރު ހާވިއޭ މެޝަރޯނާގެ ރެކޯޑާ ހަމަހަމަ ކުރި މެސީ އަކީ މިހާރު އާޖެންޓީނާ ޓީމަށް އެންމެ ގިނަ މެޗު ކުޅުނު ކުޅުންތެރިޔާ އެވެ.

ރޭގެ މެޗުގައި އާޖެންޓީނާގެ ފުރަތަމަ ލަނޑު އެލްހެންޑްރޯ ގޯމޭޒް ޖެހީ މެސީ ތަނަވަސް ކޮށްދިން ފުރުސަތަކުންނެވެ. ފުރަތަމަ ހާފު ނިމުމުގެ ކުރިން މެސީ ވަނީ އާޖެންޓީނާ އަށް ތިން ލަނޑުގެ ލީޑެއް ނަގައި ދީފަ އެވެ.

ބޮލީވިއާގެ ލަނޑު 60 ވަނަ މިނެޓްގައި ޖެހީ އެރްވިން ސާވްޑްރާ އެވެ. އޭގެ ފަސް މިނެޓް ފަހުން ލައުޓާރޯ މާޓީނޭޒް ވަނީ އާޖެންޓީގެ ހަތަރު ވަނަ ލަނޑު ޖަހައިދީފަ އެވެ.

ބޮލީވިއާ އަތުން އާޖެންޓީނާ ބަލިވެ، އުރުގުއޭ އަތުން މޮޅުވެގެން ގުރޫޕްގެ އެއް ވަނަ ޕެރަގުއޭ އަށް ވެސް ހޯދެން އޮތެވެ. ނަމަވެސް އުރުގުއޭ އަތުން ރޭ ބަލިވެ ގުރޫޕްގެ ދެ ވަނަ ވެސް ޕެރަގުއޭ އަށް ގެއްލުނެވެ. އެޑިންސަން ކަވާނީގެ ޕެނަލްޓީން އުރުގުއޭ މެޗު ކާމިޔާބު ކުރީ 1-0 އިންނެވެ.

ކޮޕާ އެމެރިކާ ކުއާޓާ ފައިނަލް މެޗުތައް

- ޖުލައި 3: ޕެރޫ - ޕެރަގުއޭ

- ޖުލައި 3 : ބްރެޒިލް - ޗިލީ

- ޖުލައި 4: އުރުގުއޭ - ކޮލަމްބިއާ

- ޖުލައި 4: އާޖެންޓީނާ - އިކުއެޑޯ