ބޮޑު އީދުގެ ބަންދުގައި ބޭންކުތައް ހުޅުވާނީ ޖުލައި 21 އާއި 27 ގައި

މި އަޟްހާ ޢީދުގެ ބަންދުގައި ބޭންކްތައް ހުޅުވާނީ ދެ ދުވަހު ކަމަށް އެމްއެމްއޭ އިން ހަމަޖައްސައިފި އެވެ.

މަރުކަޒީ ބޭންކް އެމްއެމްއޭ އިން މިއަދު ބުނީ، މި އަހަރުގެ އަޟްހާ އީދާއި މިނިވަން ދުވަހުގެ މުނާސަބަތުގައި އަންނަ ބަންދުގައި އެ އޮތޯރިޓީ އާއި ބޭންކުތައް ހުޅުވާފައި ހުންނާނީ އަންނަ މަހުގެ 21 ވަނަ ދުވަހާއި 27 ވަނަ ދުވަހު ކަމަށެވެ. އަޟްހާ އީދު ބަންދު ވާނީ އަންނަ މަހުގެ 18 އިން 27 އަށެވެ.

އެމްއެމްއޭއިން ބުނިގޮތުގައި، އީދު ބަންދުގައި ހުޅުވާ ދެ ދުވަހު ބޭންކިންގެ ހިދުމަތް ދޭނީ ހެނދުނު 8:30 އިން މެންދުރު 2:00 އަށެވެ. ސިޓީ އާއި އެހެނިހެން ލިޔުންތައް ވެސް މި ވަގުތުތަކުގައި ބަލައިގަންނާނެ އެވެ.

އީދު ބަންދަށް ބޭންކްތައް ހުޅުވާ ގަޑިތައް އިއުލާނު ކުރިއިރު ކޮވިޑްގެ ހާލަތާ ގުޅިގެން ބޭންކްތައް މިހާރު ވެސް ހުޅުވަނީ ހަފުތާގެ ވަކި ދުވަސްތަކެއްގަ އެވެ. ބޭންކްތަކުން ހިދުމަތްތައް މިވަގުތު ދެނީ ކުރިއާލައި އެޕޮއިންޓްމެންޓް ދޭ ފަރާތްތަކަށެވެ.