ކުއްޖާ މަރާލި މައްސަލައިގައި ހައްޔަރުކުރި 17 އަހަރުގެ ކުއްޖާގެ ބަންދަށް 15 ދުވަސް

ކުޑަ ކުއްޖަކު ރަހީނުކޮށް މަރާލި މައްސަލާގައި ހައްޔަރުކުރި ދެ މީހުންގެ ތެރެއިން 17 އަހަރުގެ ކުއްޖާގެ ބަންދަށް ޖުވެނައިލް ކޯޓުން 15 ދުވަސް މިއަދު ދީފި އެވެ.

އުމުރުން 13 އަހަރުގެ ކުއްޖަކު ރަހީނުކޮށް، މަރާލުމަށް ފަހު ހުޅުމާލޭ މޫދަށް އެއްލައިލި މައްސަލައާ ގުޅިގެން ހައްޔަރުކުރި 17 އަހަރުގެ ކުއްޖާގެ ބަންދު އިތުރުކުރީ ޖުވެނައިލް ކޯޓުންނެވެ.

މަރުގެ މައްސަލައިގައި ދެން ހައްޔަރުކުރީ 27 އަހަރުގެ ފިރިހެނެކެވެ. އޭނާގެ ބަންދާ މެދު ގޮތެއް ނިންމަން ވަނީ ކްރިމިނަލް ކޯޓަށް ގެންގޮސްފަ އެވެ. އޭނާގެ ބަންދާ މެދު ގޮތެއް ނިންމި ކަމެއް އަދި ނޭނގެ އެވެ.

މަރުގެ މި ބޮޑު މައްސަލައިގައި ޖެންޑާ މިނިސްޓްރީ އާއި ފުލުހުން ގުޅިގެން މިއަދު ހަވީރު ދިން ޕްރެސް ސްޓޭމަންޓުގައި ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ހެޑް، ޗީފް އިންސްޕެކްޓާ އޮފް ޕޮލިސް އަބްދުﷲ ރަޝީދު ވިދާޅުވި ގޮތުގައި ކުއްޖާ މަރާލާފައި އޮއްވައި ފެނުނީ އެ ކުއްޖާ ރަހީނުކޮށްގެން އުޅޭ ކަމުގެ ރިޕޯޓެއް މިދިޔަ އާދިއްތަ ދުވަހު ލިބުމާ ގުޅިގެން ހޯދަމުން ދަނިކޮށެވެ.

އެކުއްޖާގެ ހަށިގަނޑު ފެނުނީ ހުޅުމާލޭ ޕޮލިހުންނަށް އާންމުންގެ މީހަކު، ހުޅުމާލޭ ދެވަނަ ފިޔަވަހީގެ އާންމުން ވަނުން މަނާ ސަރަހައްދުގައި ކުއްޖަކަށް އަނިޔާކޮށްފައިވާ ކަމަށް ބުނެ މައްސަލައެއް ރިޕޯޓްކުރުމުން، އެ ސަރަހައްދު ބަލައި ހޯދަނިކޮށެވެ.

ކުއްޖާގެ ހަށިގަނޑު އޮތީ އެ ސަރަހައްދުގެ އިރުއުތުރު ފަރާތުގެ މޫދުގައި ފޮއްޓަކަށް ލައިފަ އެވެ.

އެ މައްސަލައިގެ ތަހުގީގަަށް ބޮޑެތި ކުރިއެރުންތަކެއް ލިބިފައިވާ ކަމަށް ވެސް ފުލުހުން ބުންޏެވެ. އެ މަރާ ގުޅޭ އިތުރު މައުލޫމާތެއް އެނގޭ ނަމަ، ފުލުހުންނަށް ހިއްސާކުރުމަށް ވަނީ އެދިފަ އެވެ.