ސިއްރު ކޮމެޓީއެއްގެ މައުލޫމާތު ލީކުވި ގޮތް ބަލާ ކޮމެޓީ ވެސް ސިއްރުކޮށްފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން ބޭއްވި މަޖިލީހުގެ އިމްތިޔާޒް އަދި ސުލޫކު ކޮމެޓީގެ ސިއްރު ބައްދަލުވުމުގެ މައުލޫމާތުތައް ލީކުވި ގޮތް ބަލަން އެކުލަވާލާފައިވާ ސަބް ކޮމެޓީ ސިއްރު ކޮށްގެން ކުރިއަށް ގެންދަން މިއަދު ނިންމައިފި އެވެ.

މިދިޔަ މަހު ނަޝީދަށް އަމާޒުކޮށް ދިން ހަމަލާއާ ގުޅިގެން މަޖިލީހުގެ ސަލާމަތީ ހިދުމަތްތަކާ ބެހޭ ކޮމެޓީން ކުރާ ތަހުގީގަށް ވަކިވަކި ސިފައިން ޖަވާބުދާރީ ނުވާނެ ކަމަށް ޑިފެންސް މިނިސްޓްރީން އެންގުމުން އެއީ މަޖިލީހުގެ އިމްތިޔާޒަށް އަރައިގަތުން ކަމަށް ވިދާޅުވެ، އެ މައްސަލަ ބަލަން އިމްތިޔާޒް އަދި ސުލޫކު ކޮމެޓީ އަށް ހުށަހެޅުއްވީ މަޖިލީހުގެ ރައީސް މުހަންމަދު ނަޝީދެވެ. އެ ހުށަހެޅުން ކޮމެޓީން މިދިޔަ ހަފުތާގައި ބޭރުކޮށްލީ އެމްޑީޕީގެ ބައެއް މެމްބަރުންގެ ވޯޓާ އެއްކޮށެވެ. އެކަމާ ގުޅިގެން އެ މެމްބަރުންނަށް ގިނަ ފާޑުކިޔުންތަކެއް ވަނީ އަމާޒުވެފަ އެވެ.

ސިއްރު ކޮށްގެން ކުރިއަށް ގެންދިޔަ އެ ބައްދަލުވުމުގައި މެމްބަރުން ވޯޓު ދިން ގޮތުގެ ތަފްސީލުތައް ސޯޝަލް މީޑިއާގައި އާންމުވުމުން އެ މައްސަލަ ބެލުމަށްޓަކައި އިމްތިޔާޒް ކޮމެޓީގެ ސަބް ކޮމެޓީއެއް ކުރިން އޮތީ އެކުލަވާލައިފަ އެވެ.

ސަބް ކޮމެޓީގެ މިއަދު ބޭއްވި ފުރަތަމަ ބައްދަލުވުމުގައި މުގައްރިރާއި ނައިބު މުގައްރިރު ހޮވުމަށްފަހު މެމްބަރުން ހުށަހެޅުއްވީ އެ ކޮމެޓީގެ ބައްދަލުވުންތައް ސިއްރުކޮށްގެން ކުރިއަށް ގެންދިއުމަށެވެ. މަނަދޫ ދާއިރާގެ މެމްބަރު އަހުމަދު ހާރޫންގެ އެ ހުށަހެޅުން ފާސްވީ މެމްބަރުންގެ އިއްތިފާގުންނެވެ.

ސަބް ކޮމެޓީގެ މުގައްރިރަކަށް އައްޔަންކުރީ މަކުނުދޫ ދާއިރާގެ މެމްބަރު އަހުމަދު ރާއީ އެވެ. ނައިބު މުގައްރިރަކަށް ހޮވުނީ މަނަދޫ ދާއިރާގެ މެމްބަރު ހާރޫނެވެ.

ސަބް ކޮމެޓީގައި ދެން ހިމެނިވަޑައިގަންނަވަނީ މައި ކޮމެޓީގެ މުގައްރިރު އަދި ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފާއި ދަނގެތި ދާއިރާގެ މެމްބަރު މުހައްމަދު ނާޒިމްގެ އިތުރުން ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ އެވެ.

ނަޝީދަށް ދިން ހަމަލާއާ ގުޅިގެން ވަކިވަކި ސިފައިންނާއި ފުލުހުން ވެސް މަޖިލީހަށް މިހާރު ދަނީ ހާޒިރު ކުރަމުންނެވެ. ނަޝީދަށް ދިން ހަމަލާއާ ގުޅިގެން ހަތަރު މީހަކު ހައްޔަރުުކޮށް، ޖިނާއީ ތަހުގީގު މިހާރު ދަނީ ކުރިއަށެވެ.