ދަރިވަރުންނާ ބެހުނުކަމުގެ ތުހުމަތަށް އަންހެން ޓީޗަރެއްގެ މައްސަލަ ބަލަނީ

އުތުރުގެ ރަށެއްގައި ދިވެހި އަންހެން ޓީޗަރަކު އޭނާގެ 16 އަހަރުގެ ފިރިހެން ދަރިވަރަކާ ބެހުނު ކަމަށް ބުނާ މައްސަލައެއް ފަަޅާއަރައި އަދި އެ ޓީޗަރުގެ ފަރާތުން އެހެން ދަރިވަރުންނަށް ވެސް ޖިންސީ ގޯނާ ލިބިފައިވާ ކަމަށް ބެލެވޭ މައްސަލައެއް ފުލުހުން ބަލަން ފަށައިފި އެވެ.

ފުލުހުންގެ މީޑިއާ އިން ބުނި ގޮތުގައި ނޯތު ޕޮލިސް ޑިވިޝަން (ނ، ރ، ބ އަދި ޅ އަތޮޅު ސަރަހައްދު) ގެ ރަށެއްގައި 16 އަހަރުގެ ފިރިހެން ކުއްޖަކަށް 25 އަހަރުގެ ދިވެހި އަންހެނަކު ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް ހުށަހެޅީ އިއްޔެ އެވެ.

އަންހެން މީހާގެ ފަރާތުން އިތުރު ކުދިންނަށް ވެސް ޖިންސީ ހާނިއްކަ ލިބިފައިވާ ކަމަށް ބެލެވޭ ކަމަށް ވެސް ފުލުހުން ބުންޏެވެ. ފުލުހުންނާއި ޖެންޑާ މިނިސްޓްރީ ގުޅިގެން މައްސަލަ ބަލަމުން އައި ނަމަވެސް އަދި މިހާތަނަށް އެ މައްސަލައާ ގުޅިގެން އެއްވެސް މީހަކު ހައްޔަރު ނުކުރާ ކަމަށް ވެސް ފުލުހުން ބުންޏެވެ.

އެނގިފައިވާ ގޮތުގައި ތުހުމަތުކުރެވޭ މީހާ އަކީ އެ ރަށު މީހަކާ އިނދެގެން އުޅޭ އެހެން ރަށެއްގެ މީހެކެވެ. އެ މީހާ މިހާރު ވަނީ އަމިއްލަ އަށް އޭނާގެ ރަށަށް ގޮސްފައި ކަމަށްވެ އެވެ.

މިކަން ހިނގި ރަށުން "މިހާރު" އާ ވާހަކަ ދެއްކި މީހަކު ބުނި ގޮތުގައި އެ ޓީޗަރު ކުއްޖާއަށް ޖިންސީ މުއާމަލާތްތަކެއް ކޮށްފައިވެ އެވެ. އެ މައްސަލަ ފަޅައިއެރުމާ އެކު މިއަދު ފުލުހުންނާއި ޖެންޑާގެ ޓީމެއް އެރަށަށް ގޮސްފައިވެ އެވެ.