ދީނާ ގުޅޭ ބިލް އޮތްގޮތުން ހަމަޖެހުން ގާއިމްކުރަން ހުރަސް އެޅޭ: އަދާލަތު ޕާޓީ

އިސްލާމްދީނާ ދެކޮޅު މީހެއް ކަމަށް ތުހުމަތު ކުރުން ކުށެއްގެ ގޮތުގައި ކަނޑައަޅަން ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ބިލް އޮޮތްގޮތުން ހަމަޖެހުން ގާއިމު ކުރަން ހުރަސް އެޅޭނެ ކަމަށް އަދާލަތު ޕާޓީން މިއަދު ބުނެފި އެވެ.

ގާނޫނުލްއުގޫބާތަށް އިސްލާހު ގެންނަން ސަރުކާރުގެ ފަރާތުން ތުޅާދޫ ދާއިރާގެ އެމްޑީޕީގެ މެމްބަރު ހިސާން ހުސައިން ހުށަހެޅުއްވި ބިލުގައި ވަނީ މުސްލިމަކާ ދިމާއަށް ކާފަރެއް ކަމަށް ބުނުމާއި ވަކި މީހަކީ އިސްލާމްދީނާ ދެކޮޅު މީހެއް ކަމަށް ތުހުމަތު ކުރުމުގެ އިތުރުން އިސްލާމީ އަގީދާއާ ގުޅުވައިގެން މީހަކާ މެދު ނަފްރަތު އުފެއްދުމަކީ ކުށެއްގެ ގޮތުގައި ކަނޑައެޅުމަށެވެ. އެ ބިލަށް ގިނަ ފާޑުކިޔުންތަކެއް ދަނީ އަމާޒުވަމުންނެވެ.

އަދާލަތު ޕާޓީން މިއަދު ނެެރުނު ބަޔާނުގައި ވަނީ ދީނީ އިލްމުވެރިންނާއި ޖަމިއްޔާތަކާއި ދީނާ ގުޅުން ހުރި ކަންކަމުގައި ބަސް ބުނުމުގެ ފުރުސަތު ގެއްލޭނެ ކޮންމެ ފިޔަވަޅަކީ ރާއްޖޭގެ އިސްލާމީ ޝަހްސިއްޔަތަށް ނޭދެވޭ އަސަރު ކުރާނެ ކަމެއް ކަމަށެވެ. ސަރުކާރުން ހުށަހެޅި ބިލް އޮތްގޮތުން މުޖުތަމައުގެ ހަމަޖެހުން ގާއިމު ކުރަން ހުރަސް އެޅޭނެ ކަމަށް އެ ބަޔާނުގައިވެ އެވެ.

އަދާލަތު ޕާޓީން ބުނިގޮތުގައި، އެ ބިލާ މެދު އެ ޕާޓީގެ ކަންބޮޑުވުންތައް ސަރުކާރާ ހިއްސާކޮށް، ހައްލު ހޯދުމަށާއި އިސްލާމްދީނުގެ އެންމެ މަތީ މަސްލަހަތަށް ރިއާޔަތް ކުރުމާ އެކު، ބައިނަލްއަގްވާމީ ޖަމާއަތްތަކުން ބަލައިގެންފައިވާ ހަމަތަކަށް އެކަން ކުރަން ގޮވައިލަ އެވެ.

އެ ބިލަށް ގިިނަ ފާޑުކިޔުންތަކެއް އަމާޒުވަމުން ދަނިކޮށް ސަރުކާރުން ވަނީ އިތުރު ބިިލެއް މަޖިލީހަށް ފޮނުވަން ނިންމައިފަ އެވެ. އެއީ އިސްލާމްދީނަށް ފުރައްސާރަ ކުރުމުގެ ކުށް އިތުރަށް ބަޔާންކުރާ ބިިލެެކެވެ.