ޔޫކޭގައި ކަސްޓަމަ ސާވިސްގައި ކިހާ އިރެއް؟

ކޮންމެ ގައުމެއްގައި ވެސް މުއާސަލާތީ ހިދުމަތް ރަނގަޅުތޯ ވަޒަންކުރުމަށް އެންމެ ބޮޑަށް ބަލާ އެއް ކަމަކީ ކަސްޓަމާ ސާވިސް އެވެ. އެ ހިދުމަތުގެ ފެންވަރުގެ ލަސްވެ ދަށް ނަމަ، ޝަކުވާތައް ބޮޑުވެ، ކަސްޓަމަރުންގެ ފާޑުކިޔުންތައް ވެސް ވަރަށް ބޮޑުވެ އެވެ. އެހެންވެ ގައުމުތަކުގައި މުވާސަލާތީ ހިދުމަތްދޭ ކުންފުނިތަކުން އަބަދު ވެސް ކަސްޓަމާ ސާވިސް އަށް ވަރަށް ބޮޑު އިސްކަމެއް ދެ އެވެ.

މިދިޔަ އަހަރަކީ މުޅި ދުނި ކޮވިޑް-19 ގެ ބޮޑު ބަލިމަޑުކަމުގެ ތެރެއަށް ވެއްޓި، ވަރަށް ގިނަ ހިދުމަތްތަކަށް ބުރޫއެރި އަހަރެކެވެ. އެހެންވެ އިނގިރޭސިވިލާތުން މިއޮތީ އެ ގައުމުގައި މުއާސަލާތީ ހިދުމަތްދޭ ކުންފުނިތަކުގެ ކަސްޓަމާ ސާވިސް އަށް އައި ބަދަލުތަކާ ގުޅޭ ރިޕޯޓެއް އެކުލަވާލައި އާންމުކޮށްފަ އެވެ.

ދުނިޔޭގެ އެންމެ ތަރައްގީވެފައިވާ ގައުމުތަކުގެ ތެރޭގައި ހިމެނޭ އިނގިރޭސިވިލާތުގެ މުއާސަލާތީ ހިދުމަތް ރެގިއުލޭޓްކުރާ އޮފްކޮމްގެ ފަސް ވަނަ އަހަރީ ރިޕޯޓްގައިވާ ގޮތުން މިދިޔަ އަހަރު ކުންފުނިތަކުގެ ކަސްޓަމާ ސާވިސް އަށް ގުޅައިގެން ކަސްޓަމަރުން އެވްރެޖްކޮށް، ޖަވާބެއްގެ އިންތިޒާރުގައި ހަތަރު މިނެޓާއި ނުވަ ސިކުންތު ވަންދެން މަޑުކުރަން ޖެހެ އެވެ.

މިދިޔަ އަހަރު އެންމެ ގިނަ ވަގުތު ކަސްޓަމާ ކެއާ އަށް ހޭދަކުރަން ޖެހުނު ދެ ކުންފުންޏަކީ ވާޖިން މީޑިއާ އާއި ވާޖިން މޮބައިލް އެވެ. އެގޮތުން ވާޖިން މީޑިއާގެ ކަސްޓަމަރުންނަށް އެވްރެޖްކޮށް ހަތް މިނިޓާއި 40 ސިކުންތަށް މަޑުކުރަން ޖެހުނު އިރު ވާޖިން މޮބައިލްގެ ކަސްޓަމަރުންނަށް ކަސްޓަމާ ސާވިސް އަށް ގުޅައިގެން ޖަވާބެއްގެ އިންތިޒާރުގައި ހަ މިނިޓާއި 44 ސިކުންތަށް މަޑުކުރަން ޖެހުނެވެ.

ކަސްޓަމާ ސާވިސް އަށް ގުޅައިގެން އެންމެ ކުޑަ ވަގުތުކޮޅެއް ހޭދަކުރަން ޖެހުނު ކަމަށް ރިޕޯޓްގައި ފާހަގަކޮށްފައި ވަނީ އީއީ ލިމިޓެޑްގަ އެވެ. އެއީ މިނިޓަކާއި 15 ސިކުންތެވެ. ދެން އެންމެ މަދު ވަގުތެއް ދިޔައީ ޓޯކްޓޯކްގަ އެވެ.

ބްރޯޑްބޭންޑް ހިދުމަތްދޭ ކުންފުނިތަކުގެ ކަސްޓަމާ ސާވިސްއާ ބެހޭ ގޮތުން 52 ޕަސަންޓް ރައްޔިތުން ބުނެފައި ވަނީ ޑީލްކުރާ ގޮތާ ދޭތެރޭ ހިތްހަމަނުޖެހޭ ކަމަށެވެ. ފޯނުގެ ހިދުމަތްދޭ ކުންފުނިތަކުން ޑީލްކުރާ ގޮތާ ދޭތެރޭ 75 ޕަސަންޓް މީހުން ހިތްހަމަޖެހެ އެވެ.

ކަސްޓަމާ ސާވިސްއާ ގުޅޭ ގޮތުން އޮފްކޮމް އިން ނެރުނު ރިޕޯޓްގައި ފާހަގަކުރެވުނު މައިގަނޑު އިތުރު ކަންތައްތައް ވެސް ހިމަނާފައިވެ އެވެ. އެގޮތުން ބްރޯޑްބޭންޑާއި ލޭންޑްލައިން ކަސްޓަމަރުން ކަސްޓަމާ ސާވިސް އަށް ގުޅައިގެން އެވްރެޖްކޮށް ހަތަރިު މިނިޓާއި ނުވަ ސިކުންތު ހޭދަކުރަން ޖެހުނު އިރު، މޮބައިލް ކަސްޓަމަރުންނަށް ދެ މިނިޓާއި ހަތް ސިކުންތަ މަޑުކުރަން ޖެހުނެވެ.

ރިޕޯޓްގައިވާ ގޮތުން ބްރޯޑްބޭންޑްގެ ހިދުމަތް ހޯދާ ކަސްޓަމަރުންގެ ތެރެއިން 2020 ގައި ޝަކުވާތައް ހުށަހަޅަން ޖެހުނު ކަމަށް ބުނެފައި ވަނީ 26 ޕަސަންޓް ކަސްޓަމަރުންނެވެ. މޮބައިލް ހިދުމަތާ މެދު ހިތްހަމަނުޖެހޭ ކަމަށް ބުނެފައި ވަނީ އެންމެ ތިން ޕަސަންޓް މީހުންނެވެ. އަދި ހިދުމަތަށް ބުރޫއެއް އަރައިގެން ހިދުމަތް ނުލިބި ތިބެން ޖެހެނީ ގިނަވެގެން ދެ ދުވަހަށް ކަމަށް ކަސްތަމަރުންގެ ފަރާތުން ފާހަގަވި ކަމަށް އޮފްކޮމްގެ ރިޕޯޓްގައި ބުނެ އެވެ.

އޮފްކޮމްގެ ނެޓްވޯކް އެންޑް ކޮމިއުނިކޭޝަންސް ގްރޫޕްގެ ޑިރެކްޓަރު ލިންޒީ ފަޒެލް ވިދާޅުވި ގޮތުގައި މުވާސަލާތީ ހިދުމަތްދޭ އިނގިރޭސިވިލާތުގެ ހުރިހާ ކުންފުނިތަކަކީ ވެސް މިހާރު ޑިމާންޑާ އެއް ވަރަށް ހިދުމަތްތައް ރަނގަޅުކުރަމުން އަންނަ ކުންފުނިތަކެވެ.

"މީގައި އަދިވެސް މައްސަލަތައް ހުރީ ކަސްޓަމާ ސާވިސް ހިދުމަތް ދިނުމުގައި." އޭނާ ވިދާޅުވި އެވެ.