ޗައިނާގެ ސިނޮފޯމް ވެކްސިން ބޭނުންކުރުމުގެ ހުއްދަ ޑަބްލިއުއެޗްއޯ އިން ދީފި

ކޮވިޑް-19 އިން ދިފާއުވުމަށް ޗައިނާ އިން އުފެއްދި ސިނަފޯމް ވެކްސިން ބޭނުންކުރުމުގެ ހުއްދަ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން މިއަދު ދީފި އެވެ.

ޑަބްލިއުއެޗްއޯގެ އިމަޖަންސީ ޔޫސް ލިސްޓުގައި ސިނަފޯމް ވެކްސިން ހިމެނުމާ އެކު ޖުމްލަ ހަ ވެކްސިނަކަށް މިވަނީ ހުއްދަ ލިބިފަ އެވެ.

ސީނޯފާމަކީ ވެކްސިން އުފައްދުމަށް ދުނިޔޭގައި ހަ ވަނައަށް އެންމެ ކުރީގައި އުޅޭ ކުންފުންޏެކެވެ. ސީނޯފާމްގެ އުފެއްދުން މެނުފެކްޗާ ކުރަނީ ބެއިޖިން އިންސްޓިޓިއުޓް އޮފް ބަޔޮލޮޖިކަލް ޕްރޮޑަކްޓްސް ކިޔާ ކުންފުންޏަކުންނެވެ. އެ ކުންފުންޏަށް 2017 ގައި ޕޯލިއީ ވެކްސިން ކަހަލަ ވަރަށް މުހިއްމު ވެކްސިންތަކަށް އެ ކުންފުންޏަށް ޕްރީ ކޮލިފިކޭޝަން ލިބިފައިވެ އެވެ.

ޑަބްލިއުއެޗްއޯގެ އިމަޖަންސީ ލިސްޓުގައި ހިމެނުމުން އެ ވެކްސިނަކީ ރައްކާތެރި އަދި ރަނގަޅު ނަތީޖާއެއް ނިކުންނަ ވެކްސިނެއްކަން އެނގެ އެވެ. އަދި މިއާ އެކު ކޮވެކްސް ފެސިލިޓީގެ ދަށުން ވެސް މި ވެކްސިން ގައުމުތަކަށް ފޯރުކޮށްދިނުމުގެ މަސައްކަތް ކުރާނެ އެވެ.

ޑަބްލިއުއެޗްއޯގެ އިމަޖަންސީ ޔޫސް ލިސްޓުގައި މިހާރު ހިމެނެނީ ފައިޒާ ވެކްސިނާއި އެސްޓްރަޒެނިކާ އިން އުފައްދަމުން އަންނަ ވެކްސިންގެ އިތުރުން ޖޯންސަން އެންޑް ޖޯންސަން ވެކްސިން އަދި މޮޑާނާގެ ވެކްސިނެވެ.

ރާއްޖެ ހިމެނޭ ގޮތަށް 20 އަށް ވުރެ ގިނަ ގައުމުގައި މިހާރު ވެސް ސިނަފޯމް ވެކްސިން ދެމުން އެބަދެ އެވެ. އެ ވެކްސިން ރާއްޖޭގައި ދެމުން އަންނަނީ 18-60 އަހަރާ ދެމެދުގެ މީހުންނަށެވެ. މި ވެކްސިންގެ ދެވަނަ ޑޯޒް ދެމުން އަންނަނީ ފުރަތަމަ ޑޯޒް ޖަހާތާ، ހަތަރު ހަފްތާ ނުވަތަ މަހެއް ފަހުންނެވެ.