ކޮވިޑް ޖެހިގެން މިއަދު ވެސް ރާއްޖޭން ދެ މީހުން މަރުވެއްޖެ

ކޮވިޑް-19 ޖެހިގެން ރާއްްޖޭގައި މިއަދު ވެސް ދެ މީހުން މަރުވެއްޖެ އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނީ ކޮވިޑްގައި މިއަދު މަރުވި ފުރަތަމަ މީހާއަކީ ޑީއެޗް-11 ގައި އެޑްމިޓްކޮށްފައި އޮތް އިންޑިއާގެ އުމުރުން 60 އަހަރުގެ މީހެއް ކަމަށެވެ. އޭނާ މަރުވީ ރޭ ދަންވަރު 3:47 ގަ އެވެ. އޭނާއަކީ ކޮވިޑަށް ޕޮޒިޓިވްވެފައިވާކަން މިދިޔަ މަހުގެ 28 ވަނަ ދުވަހު އެވެ. އޭނާއަކީ ރާއްޖޭން އެ ބަލީގައި މަރުވި 80 ވަނަ މީހާ އެވެ.

މިއަދު މަރުވި ދެވަަނަ މީހާއަކީ ކ. މާފުށީގައި އައިސޮލޭޓްކޮށްފައި ހުރި އުމުރުން 37 އަހަރުގެ ބަންގްލަދޭޝް މީހެކެވެ. އެޗްޕީއޭއިން ބުނީ އޭނާއަކީ މިދިޔަ މަހުގެ 26 ގައި ބައްޔަށް ޕޮޒިޓިވްވި މީހެއް ކަމަށެވެ. އެއީ ރާއްޖޭން އެބަލީގައި މަރުވި 81 ވަނަ މީހާ އެވެ.

ރާއްޖެ އަށް ކޮވިޑްގެ ސާޖެއް އައި ފަހުން އިއްޔެ އަކީ އެއް ދުވަހެއްގައި އެންމެ ގިނަ މީހުން މަރުވި ދުވަހެވެ. އެގޮތުން އިއްޔެ ހަތަރު މީހަކު މަރުވި އެވެ.

ރާއްޖޭން އިއްޔެ އެކަނި ވެސް 703 މީހުން ކޮވިޑަށް ޕޮޒިޓިވްވި އެވެ. އެއާ އެކު ރާއްޖޭގެ އެކްޓިވް ކޭސްތަކުގެ އަދަދު މިހާރު ވަނީ 7،000 އާ ގާތްވެފަ އެވެ. ރާއްޖޭން އެ ބަލި ޖެހުނު މީހުންގެ ޖުމްލަައަކީ މިހާރު 33،368 އެވެ. އޭގެ ތެރެއިން 203 މީހަކަށް ފަރުވާ ދެމުން އަންނަނީ ހޮސްޕިޓަލްގައި އެޑްމިޓްކޮށްގެންނެވެ.