ކޮވިޑް ޖެހިގެން ރަސްދޫން އިންޑިއާގެ ޓޫރިސްޓަކު މަރުވެއްޖެ، މިއީ މިއަދުގެ ތިން ވަނަ މަރު

އއ. ރަސްދު އަށް ޒިޔާރަތްކުރި އިންޑިއާގެ ޓޫރިސްޓަކު ކޮވިޑް-19ގައި މިއަދު މަރުވެއްޖެ އެވެ.

އެނގިފައިވާ ގޮތުގައި މިއީ، ޗުއްޓީ ހޭދަކުރުމަށް ފަހު އެނބުރި ގައުމަށް ދިއުމުގެ ކުރިން ހަދަން ޖެހޭ ޓެސްޓުން ޕޮޒިޓިވްވެގެން، ރަސްދޫގައި ކަރަންޓީނު ވެގެން ހުރި މީހެކެވެ. އޭނާ ކޮވިޑަށް ޕޮޒިޓިވްވި ކަން އެނގުނީ މިދިޔަ މަހުގެ 27ގަ އެވެ.

ރަސްދޫގައި ހުންނަ އއ. އަތޮޅު ހޮސްޕިޓަލްގެ މެނޭޖަރު އަލީ ރިޔާޒު ވިދާޅުވިގޮތުގައި އުމުރުން 60 އަހަރުން މަތީގެ އެ ފިރިހެން މީހާ މަރުވީ، އޭނާ ހުރި ގެސްޓް ހައުސްގަ އެވެ.

"އެ މީހާ ކަރަންޓީނު ވީއްސުރެ އަޅުގަނޑުމެން ދިޔައީ މޮނީޓާ ކުރަމުން، ދެން މިއަދު ހާލު ގޯސްވެގެން، އޮކްސިޖަންއާ އެއްޗެހި ހިފައިގެން ގޮސް ގެސްޓް ހައުސްގައި ފަރުވާ ދެމުން ދަނިކޮށް މަރުވީ،" އޭނާ ވިދާޅުވި އެވެ.

މިއީ ރާއްޖޭގައި މިއަދު ކޮވިޑް ބަލީގައި މަރުވި ތިން ވަނަ މީހާ އެވެ. ހުޅުމާލެ މެޑިކަލް ފެސިލިޓީގައި ފަރުވާ ދެމުން އައި އުމުރުން 77 އަހަރުގެ އަންހެނަކު ރޭ މަރުވި އިރު، ނައިފަރު ހޮސްޕިޓަލުގައި ފަރުވާ ދެމުން ދިޔަ މީހަކު މިއަދު މެންދުރު ވަނީ މަރުވެފަ އެވެ. މިއަދުގެ ތިން ވަނަ މަރާއެކު، މިއީ ރާއްޖޭގައި ކޮވިޑް ފެތުރެން ފެށި ފަހުން އެންމެ ގިނައިން މީހުން މަރުވި ދުވަހެވެ.

ގެސްޓް ހައުސްތައް ގިނަ ރަސްދޫގައި މި ފަހުން އެންމެ ގިނައީ އިންޑިއާގެ ޓޫރިސްޓުންނެވެ. އެ ގައުމުުގައި ބަލިމަޑުކަން އިންތިހާ އަށް ގޯސްވެފައި ވަނިކޮށް، މީހުން ރާއްޖެ އަންނަނީ މެދު އިރުމައްޗަށް ދާ މަގުމަތީގައި، 14 ދުވަހަށް މަޑުކޮށްލުމަށެވެ. ނަމަވެސް ރާއްޖޭގެ ހާލަތު މާ ބޮޑަށް ގޯސްވާން ފެށުމުން، ޓޫރިސްޓް ވިސާގައި އަންނަ އިންޑިއާގެ މީހުންނަށް ގެސްޓް ހައުސްތަކަށް ނުދެވޭ ގޮތަށް ސަރުކާރުން ވަނީ ހަމަޖައްސައިފަ އެވެ. އެކަމަކު، އެ ފިޔަވަޅު އެޅީ ވަރަށް ބޮޑަށް ވަގުތު ފާއިތުވި ފަހުން ކަމަށް ވާތީ ސަރުކާރަށް ވަނީ ފާޑުކިޔުން އަމާޒުވެފަ އެވެ.