މަގާމް އިބްރާހީމް ވެސް ސާފު ފޮޓޯތަކުން ދައްކާލައިފި

މާތްވެގެންވާ ހަރަމްފުޅުގައިވާ ހާއްސަ ތަންތަނުގެ ތެރެއިން ގިނަ ބަޔަކު އެންމެ ބަލައިލަން ބޭނުންވާ ހަޖަރުލް އަސްވަދުގެ މިހާތަނަށް ނެގި އެންމެ ސާފު ފޮޓޯތައް ނަގައި އާންމުކުރުމަށް ފަހު މަގާމް އިބްރާހިމްގެ ފޮޓޯތަކެއް ވެސް ސާފުކޮށް އަދި ތަފްސީލުތައް އެނގޭހެން ނަގައި އާންމުކޮށްފި އެވެ.

ގެފުޅާއި ހަރަމްފުޅުގެ ފޮޓޯތަކާއި ވީޑިއޯތައް ބަލާއިރު، ގެފުޅުގެ ދޮރުކޮޅާ ދިމާލުގައި ހުންނަ، ރަން ކުލައިގެ ކުޑަ ކޮށްޓެއް ފެންނާނެ އެވެ. ކުޑަކުޑަ ގުއްބެއްހެން ހިޔާކޮށްފައިވާ އެ ކޮށީގެ ތެރޭގައި އޮންނަ ހިލަ އަކީ މަގާމް އިބްރާހީމެވެ. އެކަމަކު އެ ހިލަ އޮތް ސަރަހައްދުގައި ނަމާދުކުރާ ނަަމަ ކިޔާނީ މަގާމް އިބްރާހީމްގައި ނަމާދުކުރުން ކަމަށެވެ.

އިސްލާމީ ތާރީހު ބުނާ ގޮތުގައި މަގާމް އިބްރާހީމްގެ ނަން ދީފައިވާ އެ ހިލަ އަކީ އިބްރާހީމް ޢަލައިހިއްސަލާމް އާއި އިސްމާއީލް ޢަލައިހިއްސަލާމްއާ ދެބަފައިކަލުން، ﷲގެ އަމުރުފުޅަށް ގެފުޅު ބިނާކުރެއްވި އިރު އިބްރާހީމް ޢަލައިހިއްސަލާމް އަރުއްވައި އުޅުއްޅި ހިލައެކެވެ. ގެފުޅުގެ އުސް ހިސާބުތައް ރޭނުއްވީ އެ ހިލައިގެ މައްޗަށްް އަރުއްވައި ހުންނަވައިގެން ކަމަށް ބުނެވެ އެވެ.

އެގޮތަށް ހުންނަވައި މަސަައްކަތްޕުޅު ކުރެއްވުމުގެ ނަތީޖާއެއްގެ ގޮތުން، އެ ހިލައިގައި އެކަލޭގެފާނުގެ ފައިތިލަފުޅުގެ އަސަރު ހުންނަ ކަމަށް ގަބޫލުކުރެވިފައިވެ އެވެ. އެ ހިލަ އަކީ ދިގުމިނުގައި 16 އިންޗި އަދި ފުޅާމިނުގައި 7.9 އިންޗި ހުންނަ ހިލަ އެކެވެ. މިހާރު އެ ފެންނަ ފަދައިން ކޮށިގަނޑެއް ހަދައި އެ ހިލަ ހިމާޔަތްކުރަން ފުރަތަމަ ފެށީ ހިޖުރައިން 810 ވަނަ އަހަރު އެވެ. އޭގެ ފަހުން އެކި ފަހަރު މަތިން ބަދަލުވަމުން އައި ނަމަވެސް އެ ހިލަ އަބަދުވެސް އޮތީ ކޮށިގަނޑުން ނިވާކޮށްފަ އެވެ.

ގެފުޅުގެ އެއް ކަނުގައިވާ ހަޖަރުލް އަސްވަދުގައި އަތްލެވޭތޯއާއި ބޮސްދެވޭތޯ، ހަރަމްފުޅަށް ދާ އެންމެންހެން މަސައްކަތްކުރެ އެވެ. މަގާމް އިބްރާހީމަކީ ވެސް އެތަނާ ގާތްވުމަށް ހަމަ އެގޮތަށް މީހުން މަސައްކަތްކުރާ ތަނެކެވެ. އެހެންވީމާ ހައްޖަށް ނުވަތަ އުމްރާއަކަށް ދާ މީހަކަށް ކޮށިގަނޑުގެ އެތެރޭގައި އޮތް ހިލަ ރަނގަޅަށް ބަލައިލުން ވާނީ ވަރަށް ދަތިކަަމަަކަށެވެ.

ނަމަވެސް، ދެ ހަރަމްފުޅުގެ މައުލޫމާތާއި މަންޒަރުތައް ގެނެސްދޭން ސައުދީ ސަރުކާރުން ގާއިމްކޮށްވައިވާ ސޯޝަލް މީޑިއާ ޕްލެޓްފޯމްތަކުގައި މިއަދު އާއްމު ކޮށްފައިވާ ފޮޓޯތަކުން އެހެން އެ ހިލަ އާއި ހިލައިގައިވާ ފިޔަވަޅުފުޅުގެ ނިޝާން ވަރަށް ސާފުކޮށް ފެނެ އެވެ. ދެ ހަރަމްގެ ކަންތައްތައް ބަލަހައްޓާ، ޖެނެރަލް ޕްރެޒިޑެންސީ އޮފް ދަ އެފެެއާޒް އޮފް ޓޫ ހޯލީ މޮސްކްސް އިން ބުނެފައިވާ ގޮތުގައި މަގާމް އިބްރާހީމްގެ އެ ފޮޓޯތައް ނަގާފައި ވަނީ "ސްޓެކްޑް ޕެނަރޯމިކް ފޯކަސް" ނަމަކަށް ކިޔާ ޓެކްނޮލޮޖީ އެއް ބޭނުންކޮށްގެންނެވެ.

އެކަމަކު ހަޖަރުލް އަސްވަދުގެ ފޮޓޯތައް އާއްމުކުރި އިރު، ފޮޓޯތަކުގެ ކޮލިޓީގެ ތަފްސީލު ދީފައިވާ ވަރަށް މިއަދު ތަަފްސީލް ދީފައެއް ނެތެވެ. ފޮޓޯތަކާ އެކު އޮތް ލިއުންކޮޅުގައިވާ ގޮތުގައި، އެންމެ ސާފު އެ ފޮޓޯތައް ނަގަން އެކަމަކު އެތައް ގަޑިއިރެއް ވަންދެން އެހެރީ މަަސައްކަތް ކޮށްފަ އެވެ. އެ ލިއުންކޮޅު ނިންމާލާފައި އޮތީ މަސްޖިދުލް ހަރާމަށް ޒިޔާރަތްކޮށް، މަގާމް އިބްރާހީމް ހަމަލޮލުން ބަލައިލުމުގެ ފުރުސަތު ދެއްވުން އެދި ކުރާ ދުއާއަކުންނެވެ.