ނަޝީދާއި ރައީސް މިއަދު ވެސް ކުރެއްވީ ކެމްޕެއިން: އިދިކޮޅު

ރައީސް އިބްރާހިމް މުހައްމަދު ސޯލިހާއި ކުރީގެ ރައީސް އަދި މިހާރު ރައްޔިތުން މަޖިލީހުގެ ރައީސް މުހައްމަދު ނަޝީދު މިއަދު ވެސް ކެމްޕެއިން ކުރެއްވި ކަމަށް ބުނެ އިދިކޮޅު ފަރާތްތަކުން ހިތްހަމަނުޖެހުން ފާޅުކޮށްފި އެވެ.

އިދިކޮޅު ފަރާތްތަކުން މިހެން ބުނީ، ލޯކަލް ކައުންސިލް އިންތިހާބުގައި ވޯޓު ލުމަށް ފަހު ނަޝީދާއި ރައީސް ނޫސްވެރިންނާ ބައްދަލު ކުރައްވައި ދެއްކެވި ވާހަކަފުޅާ ގުޅިގެންނެވެ. ރައީސް ވިދާޅުވި ގޮތުގައި ލާމަރުކަޒީ ނިޒާމަށް ގެނައި އިސްލާހާ އެކު ބޮޑެތި ބާރުތައް ވަނީ ދޫކޮށްލައިފަ އެވެ. އަދި އެމްޑީޕީން އިންތިހާބު ކާމިޔާބު ކުރާނެ ކަން ޔަގީން ކަމަށް އެމަނިކުފާނު ވިދާޅުވި އެވެ.

ނަޝީދު ވެސް ވަނީ އެމްޑީޕީ އަށް އިންތިހާބު ކާމިޔާބު ކުރެވޭނެ ކަމުގެ ޔަގީންކަން ދެއްވައި ވާހަކަފުޅު ދައްކަވައިފަ އެވެ.

އެކަން ފާހަގަ ކުރައްވައި، ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެ ޕާޓީގެ ކައުންސިލް މެންބަރު އަހުމަދު ސިއްދީގު ވިދާޅުވީ ކެމްޕެއިންއަކީ އަމަލުންނާއި އިޝާރާތުންނާއި ބަހުން އަދި މީހާ ލައިގެން ހުންނަ ހެދުމުގެ ކުލައިން ވެސް ކުރެވޭ އެއްޗެއް ކަމަށެވެ.

އެމްޑީޕީ މަޖިލިސް މެންބަރުންނާއި ނަޝީދު އަދި ރައީސްގެ ފަރާތުން ވެސް މިއަދު ފެނިގެން ދިޔައީ ބަހާއި އަމަލުން ކެމްޕެއިން ކުރެއްވި ތަން ކަމަށާއި އެކަމަކު އިލެކްޝަންސް ކޮމިޝަަން (އީސީ) އަޅައި ނުލާ ކަމަށް ސިއްދީގު ވިދާޅުވި އެވެ.

"ރައީސް ވޯޓު ދެއްވުމަށް ފަހު ނިކުމެ ވަޑައިގެން ނުސީދާ ކެމްޕެއިން ރައީސް ކުރެއްވި. އެ ބޭފުޅުން ބޭނުންވާ ކަންތައްތަކަށް ނިސްބަތް ކޮށް، ބޭނުންވާ ބަޔަކަށް ވަކި އަދަދަކުން އިންތިހާބު ކާމިޔާބު ކުރާނެ ކަމަށް ބުނެ ރައްޔިތުންގެ ތެރޭގައި ވަކި ބަޔަކަށް ވޯޓުދޭން ހިތްވަރު ލިބޭ ގޮތަށް ވާހަކަ ދެއްކެވި،" ސިއްދީގު ވިދާޅުވި އެވެ.

ސިއްދީގު ވިދާޅުވީ ވޯޓު ލުން ކުރިޔަށް ދިޔައިރު ނަޝީދު ވެސް ހުރިހާ މަރުކަޒުތަކަށް ވަޑައިގެން އެތަނުގައި ހަރަކާތްތެރިވީ އިންތިހާބަށް ނުފޫޒު ފޯރުވުމަށް ކަމަށެވެ. އަދި މާފަންނު މެދު ދާއިރާގެ ވޯޓު ފޮށި ކައިރީ ވެސް އެ ދާއިރާގެ މަޖިލިސް މެންބަރު ހަރަކާތްތެރިވެ ވޯޓަށް ނުފޫޒު ފޯރުވަން މަސައްކަތް ކުރެއްވި ކަމަށް އޭނާ ތުހުމަތު ކުރި އެވެ.

"އަޅުގަނޑުމެންނަށް ލިބިފައިވާ ހެކިތަކުގެ މައްޗަށް ބިނާކޮށް މި މައްސަލަ ހުށަހަޅާނަން،" ސިއްދީގު ވިދާޅުވި އެވެ.