އެޗްޕީއޭ ހިންގަނީ ހެލްތު މިނިސްޓަރު އަންގަވާ ގޮތަށް: މައިމޫނާ

އެޗްޕީއޭގެ އެންމެ އިސް ފަރާތަކީ ހެލްތު މިނިސްޓަރު ކަމަށާއި އެ އޮތޯރިޓީ ހިންގަނީ މިނިސްޓަރު އަންގަވާ ގޮތެއްގެ މަތިން ކަމަށް ޑިރެކްޓަ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު އިއްޔެ ވިދާޅުވެއްޖެ އެވެ.

އިއްޔެ އިގްތިސާދީ ކޮމިޓީގައި އެޗްޕީއޭގެ ހިންގުމާ ގުޅޭ ގޮތުން އެމްޑީޕީގެ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ކުރެއްވި ސުވާލަކަށް ޖަވާބު ދެއްވަމުން މައިމޫނާ ވިދާޅުވީ އެޗްޕީއޭ ހިންގަނީ ހެލްތް މިނިސްޓަރުގެ ލަފާގެ މަތިން ކަމަށެވެ.

ބޮންޑޭ ވަނީ މަޖިލީހުގެ ތަޅުމުގައި، ކޮވިޑް-19 އާ ގުޅޭ ގޮތުން އުފައްދާފައިވާ ޓެގް ޓީމަށް ވެސް ފާޑުވިދާޅުވެފަ އެވެ. ބޮންޑޭ ވިދާޅުވީ ކޮވިޑް ކޮންޓްރޯލް ކުރަން ފިޔަވަޅުތައް އެޅުމަށްޓަކައި ރާއްޖޭގައި އިއުލާނުކުރި ސިއްހީ ނުރައްކަލުގެ ކުއްލި ހާާލަތު އަދިވެސް ދަމަހައްޓަނީ ޓެގް ޓީމަށް އެކަމުން މާލީ ފައިދާއެއް ވާތީ ކަމަށެވެ. ކޮވިޑާ ބެހޭ ކަންކަމުގައި ގޮތް ނިންމަވަން ޑައިރެކްޓަ ޖެނެރަލް އޮފް ޕަބްލިކް ހެލްތަށް މިނިވަންކަން ނޯންނަ ކަމަށާއި ޓެގް ޓީމުން އެޗްޕީއޭ ހިސޯރުކޮށްފައިވާ ކަމަށް ވެސް އޭނާ ތުހުމަތުކުރެއްވި އެވެ.

މައިމޫނާ ވިދާޅުވީ ކޮންމެ ހެލްތު އެމަޖެންސީއެއްގައި ޓެކްނިކަލް އެޑްވައިޒަރީ ގްރޫޕް (ޓެގް) ޓީމު އެކުލަވައިލާނެ ކަމަށެވެ. އެ ޓީމު އެކުލަވައިލަނީ އެ ފެތުރޭ ބައްޔަކާ ގުޅޭ ތަޖުރިބާކާރުން ހިމެނޭ ގޮތުން ކަމަށް ވިދާޅުވި އެވެ.

"ޓެގް އަކީ ހެލްތު އެމަޖެންސީ ޕްލޭންގަ އަދި އޮނިގަނޑުގެ ތެރެއިން އޮންނަނީ. ޓެގް އުފެދިގެންދާނެ ކޮންމެ ހެލްތު އެމަޖެންސީއެއްގައި. މިއީ އިންފެކްޝަސް ބައްޔެއް [ކޮވިޑް] ކަމުން އެކަމާ ގުޅޭ މާހިރުން ތިބޭނެ،" އޭނާ ވިދާޅުވި އެވެ.

މައިމޫނާ ވިދާޅުވީ ޓެގް ޓީމު ވެސް އެޕްރޫވް ކުރާނީ މިނިސްޓަރު ކަމަށާއި ޓީމުގެ މަސައްކަތްތައް ވެސް ކުރިއަށް ގެންދަނީ އެކުލަވައިލާފައިވާ އުސޫލުގެ ތެރެއިން ކަމަށެވެ.