ލެވަންޑޯސްކީގެ ހެޓްރިކާ އެކު ބަޔާން އަލުން ލީޑުފުޅާކޮށްފި

މިއުނިކް (މާޗް 21) - ޖަރުމަނު ލީގުގައި ރޭ މެޗުގެ ބޮޑުބައި އެއް ކުޅުންތެރިއަކު މަދުކޮށް ކުޅުނު ބަޔާން މިއުނިކުން ރޮބަޓް ލެވަންޑޯސްކީގެ ހެޓްރިކާ އެކު 4-0 އިން ސްޓުޓްގާޓް ބަލިކޮށް ލީގުގެ އެއް ވަނައިގައި އަލުން ހަތަރު ޕޮއިންޓަށް ލީޑުފުޅާކޮށްފި އެވެ.

ރޭގެ މެޗަށް ބަޔާން ނުކުތްއިރު ދެ ވަނައިގައި އޮތް އާރްބީ ލައިޕްޒިގު ވަނީ އެއް މެޗު އިތުރަށް ކުޅެގެން އެއްވަނައިގައި އޮތް ބަޔާނާ އެއް ޕޮއިންޓަށް ގާތަށް ޖެހިލައިފަ އެވެ. ރޭގެ ނަތީޖާއާ އެކު ބަޔާން މިހާރު އެއް ވަނައިގައި އޮތީ 26 މެޗުން 61 ޕޮއިންޓް ހޯދައިގެންނެވެ. އެއީ ހަތަރު ޕޮއިންޓުގެ ލީޑަކާ އެކު އެވެ. ދެ ވަނައިގައި އޮތް ލައިޕްޒިގަށް ލިބިފައިވަނީ 26 މެޗުން 57 ޕޮއިންޓެވެ.

ބަޔާންގެ އަލްފަންސޯ ޑޭވިސް އަށް ރޭގެ މެޗުގެ 12 ވަނަ މިނިޓްގައި ވަނީ ސީދާ ރަތް ކާޑެއް ދައްކައިފަ އެވެ. އެއީ ސްޓުޓްގާޓްގެ ވަޓާރޯ އެންޑޯ އަށް ކުރި ނުރައްކާތެރި ފައުލެއްގެ ސަބަބުންނެވެ.

ކުޅުންތެރިއަކު މަދުކޮށް މެޗުގެ ބޮޑުބައި ކުޅެން ޖެހުނު ނަމަވެސް ބަޔާނުން ފަހަތަށް ނުޖެހުނެވެ. ފުރަތަމަ ހާފުގެ 22 މިނިޓް ތެރޭ ބަޔާނުން ވަނީ ހަތަރު ގޯލު ޖަހައިފަ އެވެ. އޭގެ ތެރެއިން ތިން ގޯލަކީ ލެވަންޑޯސްކީ ޖެހި ގޯލުތަކެވެ. ލެވަންޑޯސްކީ ގޯލުތައް ޖެހީ 17، 23 އަދި 39 ވަނަ މިނިޓްގަ އެވެ. ބަޔާންގެ އަނެއް ގޯލު ޖެހީ މެޗުގެ 22 ވަނަ މިނިޓްގައި ލެރޯއި ސާނޭ ދިން ބޯޅައަކުން ސާޖް ގްނަބްރީ އެވެ.

ރޭގެ މެޗުގެ ގޯލުތަކާ އެކު ލެވަންޑޯސްކީ ވަނީ ފާއިތުވި ހަ ސީޒަނުގައި ވެސް ހުރިހާ މުބާރާތެއްގައި 40 އަށް ވުރެ ގިނަ ގޯލު ޖަހައިފަ އެވެ. މި ސީޒަނުގައި މިހާތަނަށް ލެވަންޑޯސްކީގެ ޖުމްލަ އަދަދަކީ 42 ގޯލެވެ.

ލެވަންޑޯސްކީގެ އަމާޒަކީ ޖަރުމަނުގެ ލެޖެންޑް ގާޑް މުލާ އެއް ލީގު ސީޒަނުގައި 40 ގޯލު ޖަހައިގެން ހަދާފައިވާ ރެކޯޑާ ހަމަކުރުމެވެ. މި ފަހަރު ލީގުގައި މިހާތަނަށް ލެވަންޑޯސްކީ ވަނީ 35 ގޯލު ޖަހައިފަ އެވެ. މުލާގެ ރެކޯޑާ ހަމަކުރަން ލެވަންޑޯސްކީ އަށް ލީގުގައި ބާކީ އަށް މެޗު އެބައޮތެވެ. މުލާ ރެކޯޑް ހެދީ 1971/1972 ވަނަ ސީޒަނުގަ އެވެ.