ހުކުރުދޫ ވަރުވާ އަށް ދިންތާ 30 އަހަރު ފަހުން އަތުލީ ރަނގަޅަށް: ކޯޓު

އދ. ހުކުރުދޫ ވަރުވާ އަށް ދޫކުރިތާ 30 އަހަރު ފަހުން މިއަހަރު އެ ރަށް ސަރުކާރުން އަތުލީ ރަނގަޅަށް ކަމަށް ސިވިލް ކޯޓުން ހުކުމްކޮށްފި އެވެ.

އަމިއްލަ މީހަކަށް 1981 ވަނަ އަހަރުން ފެށިގެން ހުކުރުދޫ ވަރުވާ އަށް ދޫކޮށްފައި ވަނިކޮށް މިދިޔަ ޖުލައި މަހުގެ ތެރޭގައި ފިޝަރީޒް މިނިސްޓްރީން އެރަށް އަތުލީ ދިގު މުއްދަތަކަށް ކުއްޔަށް ދިނުމަށްޓަކަ އެވެ. އެރަށް ގެންގުޅުނު ފަރާތުން އެ މައްސަލަ ކޯޓަށް ހުށަހެޅުމުން މިމަހުގެ ދެވަނަ ދުވަހު ކޯޓުން ހުކުމްކުރީ އެރަށް އަތުލަން ނިންމި ނިންމުން ރަނގަޅު ކަމަށެވެ.

ކޯޓުގެ ހުކުމުގައިވަނީ ވަރުވާ އަށް ދީފައިވާ ރަށަކުން އެކަށީގެންވާ ފައިދާއެއް ހޯދަން ދިގު މުއްދަތަކަށް ކުއްޔަށް ދިނުމަށް އެރަށެއް ވަރުވާ އިން ވަކި ކުރެވިދާނެ ކަން ފަޅު ރަށްރަށާ ބެހޭ ގަވާއިދަށް ބެލުމުން އެނގޭ ކަމަށެވެ. އެހެންވެ ސަރުކާރުގެ އެ ނިންމުން ބާތިލް ކުރެވެން ނެތް ކަމަށް ވަނީ ނިންމައިފަ އެވެ.

އެރަށް އަތުލަން ނިންމީ ދެ އަހަރު ދުވަހުގެ އެރަށުގެ ވަރުވާ އަށް ފައިސާ އެ ފަރާތަށް ދޭ ގޮތަށެވެ.

މީގެކުރިން ވެސް ވަރުވާ އަށް ދޫކޮށްފައިވާ ބައެއް ރަށްރަށް ސަރުކާރުން ވަނީ އަތުލައިފަ އެވެ. އޭގެ ބައެއް މައްސަލަތައް ކޯޓަށް ހުށަހެޅިޔަސް ގިނަ މައްސަލަތައް ނިމުނީ ދައުލަތާ އެއްކޮޅަށެވެ.

ވަރުވާ އަށް ދޫކުރަނީ ފިޝަރީޒް މިނިސްޓްރީގެ ބެލުމުގެ ދަށުގައި ހުންނަ ރަށްރަށުގެ ތެރެއިން ދައުލަތުގެ ބޭނުމަށް ނަގާ ރަށްތައް ފިޔަވައި އެހެން ރަށްރަށެވެ. ކުރިން ވަކި މުއްދަތެއް ނެތި ވަރުވާ އަށް ރަށްތައް ދޫކުރެވުނަސް މިހާރު އެންމެ ގިނަވެގެން ރަށެއް ވަރުވާ އަށް ދޫކުރެވެނީ 10 އަހަރަށެވެ.