ބޮލީވުޑްގެ ޚަބަރުތައް ކުރުކޮށް

ބަތަލާ ޝިލްޕާ ޝެޓީގެ "ހަންގާމާ 2" ގެ ޝޫޓިން ނިންމާލައިފި އެވެ.

ކުރިން މިދިޔަ އަހަރު ގެނެސްދޭން ރޭވި ފިލްމު ކޮވިޑާ ހެދި މި އަހަރަށް ފަސްވެގެން ދިޔަ އިރު، ފިލްމު ރިލީޒްކުރާނެ ތާރީހެއް އަދި އިއުލާނެއްނުކުރެ އެވެ.

"ހަންގާމާ 2" އަކީ ޑައިރެކްޓަރު ޕްރިޔާދަރިޝަން 2003 ގައި ގެނެސްދިން "ހަންގާމާ" ގެ ސީކްއެލްއެކެވެ. މި ފަހަރު ފިލްމުގެ މައިގަނޑު ކާސްޓުންނަކީ ޝިލްޕާ އާއި ޕަރޭޝް ރާވަލާއި މީޒާން ޖެފްރީގެ އިތުރުން ޕްރަނީތާ ސުބާޝްގެ އިތުރުން ޖޯނީ ލީވާ އާއި ރާޖްޕަލް ޔާދަވް އެވެ.

"ހަންގާމާ 2" އަކީ އެކްޓިންއާ ދުރުގައި ހުންނަތާ 12 ވަރަކަށް އަހަރުން ޝިލްޕާ 2019 ގައި ސޮއިކުރި ދެ ފިލްމުގެ ތެރެއިން އެއް ފިލްމެވެ. އަނެއް ފިލްމަކީ މިދިޔަ އަހަރުގެ ފަހުކޮޅު ޝޫޓިން ނިންމައިލި ޑައިރެކްޓަރު ސަބީރް ޚާންގެ "ނިކައްމާ" އެވެ.

އެ ފިލްމުގައި ޝިލްޕާ ފެންނާނީ އަބިމަންޔޫ ދައްސާނީ އާއި ޝާލީ ސެތިއާއާ އެކީގަ އެވެ.

"އަދިޕުރުޝް" ގެ ޝޫޓިން ފަށައިފި

މިދިޔަ އަހަރު އަޖޭ ދޭވްގަނާއި ސައިފް އަލީ ޚާނާ އެކު "ތާނާޖީ: ދި އަންސަންގް ވޮރިއާ" ގެނެސްދިން ޑައިރެކްޓަރު އޯމް ރައުތުގެ އާ ފިލްމު "އަދިޕުރުޝް" ގެ ޝޫޓިން ފަށައިފި އެވެ.

މި ފިލްމުގެ ބަތަލަކީ "ބާހްބަލީ" ކުޅުނު ޕްރަބާސް އެވެ. ފިލްމުގެ ވިލަން އަކީ ސައިފް އަލީ ޚާނެވެ. "އަދިޕުރުޝް" ގެ ޝޫޓިން އަންގާރަ ދުވަހު ފެށި ނަމަވެސް ސައިފް ކްރޫއާ ގުޅޭނީ އަންހެނުން ކަރީނާ ކަޕޫރް މި މަހުގެ ތެރޭގައި ވިހެއުމުންނެވެ. ސައިފަކީ ފިލްމުގެ ވިލަން އެވެ.

ޓީ ސީރީޒުން ޕްރޮޑިއުސްކުރާ ފިލްމުގެ ބަތަލާ އަކީ ކާކު ކަމެއް އަދިވެސް އިއުލާނެއް ނުކުރެ އެވެ. "އަދިޕުރުޝް" އަކީ އަންނަ އަހަރުގެ އޮގަސްޓް 11 ގައި ސިނަމާތަކަށް ގެންނާނެ 3ޑީ ފިލްމެކެވެ.

"ލޫޕް ލަޕޭޓާ" ގެ ފަސްޓްލުކް ދައްކާލައިފި

ބަތަލާ ތާޕްސީ ޕައްނޫގެ ކުރިއަށް ހުރި ފިލްމުތަކުގެ ތެރޭގައި ހިމެނޭ "ލޫޕް ލަޕޭޓާ" ގެ ފަސްޓްލުކް ދައްކާލައިފި އެވެ.

މި ފިލްމަކީ 1998 ގައި ރިލީޒްކުރި ޖަރުމަންގެ އެކްސްޕެރިމަންޓަލް ތުރިލާ "ރަން ލޯލާ ރަން" އަސްލަކަށް ބަލައިގެން ހަދާ ފިލްމެކެވެ.

މި އަހަރު ސިނަމާތަކަށް ގެންނާނެ "ލޫޕް ލަޕޭޓޭ" އަކީ ސޮނީ ޕިކްޗާޒް އިން ޕްރޮޑިއުސްކޮށް، އާކާޝް ބާޓިއާ ޑައިރެކްޓްކުރާ ފިލްމެކެވެ. ތާޕްސީއާ އެކު ފިލްމުގެ ބަތަކުގެ ރޯލުން ފެންނާނީ ތާހިރު ރާޖް ބާސިން އެވެ.

"ބައްޗަން ޕާންޑޭ" ގެ ވިލަންއަކަށް އަބިމަންޔޫ

މިދިޔަ މަހުން ފެށިގެން ޖައިސަލްމާރްގައި ޝޫޓްކުރަމުން އަންނަ އަކްޝޭ ކުމާރުގެ ފިލްމު "ބައްޗަން ޕާންޑޭ" ގެ ވިލަންގެ ރޯލަށް އަބިމަންޔޫ ސިންގް ހަމަޖައްސައިފި އެވެ.

ކުރިން ވެސް ގިނަ ފިލްމުތަކެއްގައި ނުބައިބައި ރޯލު ކުޅެފައިވާ އެކްޓަރަކީ އަކްޝޭ ދެން އެންމެ އަވަހަށް ފެންނާނެ ފިލްމު "ސޫރިޔަވަންޝީ" ގެ ކާސްޓްގައި ވެސް ހިމެނޭ އެކްޓަރެކެވެ. "ބައްޗަން ޕާންޑޭ" އަކީ ސާޖިދު ނަދިއަދުވާލާ ޕްރޮޑިއުސްކޮށް، ފަރުހާދު ސަމްޖީ ލިޔެ، ޑައިރެކްޓްކުރާ ފިލްމެކެވެ.

މީގެ ކާސްޓްގައި ކްރިތީ ސެނަން އާއި ރިތޭޝް ދޭޝްމުކާއި އަރުޝަދު ވަރްސީ އާއި ޕްރަތީކް ބައްބަރް އަދި ޕަންކަޖް ތުރިޕަތީ ހިމެނެ އެވެ.

"ބައްޗަން ޕާންޑޭ" ސިނަމާތަކަށް އަންނާނީ އަންނަ އަހަރުގެ ޖެނުއަރީ 26 ގަ އެވެ.