ދުއާ އަކީ ވެކްސިނާ އެކު އުފާވެރި ދިރިއުޅުމެއް ލިބުން: ރައީސް

ކޮވިޑް-19 އިން ރައްކާތެރިވުމަށް ރާއްޖޭގައި މާދަމާ ޖަހަން ފަށާ ވެކްސިނާއެކު އުފާވެރި ދިރިއުޅުމަކަށް ރައީސް އިބްރާހިމް މުހައްމަދު ސޯލިހު މިއަދު އެދިވަޑައިގެންފި އެވެ.

އެ މަނިކުފާނު ކުރެއްވި ޓްވީޓުގައި ވިދާޅުވީ ވެކްސިން ޖެހުމުގެ މަސައްކަތް ފެށޭއިރު މާތްﷲގެ ހަޟްރަތަށް ހަމްދާއި ޝުކުރާއެކު އުފާވެރި ދިރިއުޅުމަކަށް އެދިވަޑައިގަންނަވާ ކަމަށެވެ.

ރާއްޖޭގައި މާދަމާ ޖަހަން ފަށަނީ އޮކްސްފޯޑް-އެސްޓްރަޒެނެކާގެ ކޮވިޑް-19 ވެކްސިން، "ކޮވިޝީލްޑް" އެވެ. އެ ވެކްސިނަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ވަނީ ހުއްދަ ދީފަ އެވެ.

އެ ވެކްސިނަކީ އޮކްސްފޯޑް ޔުނިވަސިޓީ އާއި އެސްޓްރަޒެނެކާ ގުޅިގެން ތައްޔާރުކޮށްފައިވާ ވެކްސިންގެ ފޯމިއުލާއާ އެއްގޮތަށް، ދުނިޔޭގައި އެންމެ ގިނައިން ވެކްސިން އުފައްދާ ކުންފުނި، ސީރަމް އިންސްޓިޓިއުޓުން އުފައްދާ ވެކްސިނެވެ.

ވެކްސިން ދިނުމުގައި އިސްކަންދޭނެ ތަރުތީބެއް އެޗްޕީއޭ އިން ވަނީ ކަނޑައަޅައިފަ އެވެ. ފުރަތަމަ ވެކްސިން ދޭނީ ސިއްހީ ދާއިރާގައި އުޅޭ މީހުންނާއި އުމުރުން ދުވަސްވީ މީހުންނާއި ހައި ރިސްކް ކެޓަގަރީގައި ހިމެނޭ މީހުންނަށެވެ. ރާއްޖޭގައި މިހާރު ހުރީ 50،000 މީހުންނަށް ޖަހާ ވަރަށް "ކޮވިޝީލްޑް"ގެ 100،000 ޑޯޒެވެ.