އީދު ބަންދަށް ވެކްސިން ސެންޓަރުތައް ބަންދުވާނެ

މާލެ ސަރަހައްދުގެ ވެކްސިން ސެންޓަރުތައް އީދު ތެރޭގައި ބަންދުވާނެ ކަމަށް އެޗްޕީއޭ އިން މިއަދު ބުނެފި އެވެ.

އެޗްޕީއޭ އިން ބުނީ މާލެ ސަރަހައްދުގެ ވެކްސިން ސެންޓަރުތައް އަންނަ އާދިއްތަ ދުވަހުން ފެށިގެން 16 ވަނަ ދުވަހުގެ ނިޔަލަށް ބަންދުވާނެ ކަމަށެވެ.

މާލޭގައި މިވަގުތު ކޮވިޑް ވެކްސިން ޖަހައިދެނީ ދަރުމަވަންތަ ހޮސްޕިޓަލާއި ދަމަނަވެށިން އެކަންޏެވެ. ހުޅުމާލޭގައި ހުޅުމާލޭ ހޮސްޕިޓަލުން ކޮންމެ އާދިއްތަ، އަންގާރަ އަދި ބުރާސްފަތި ދުވަހު ވެކްސިން ޖަހައިދެ އެވެ.

އީދު ބަންދުގައި ވެކްސިން ކާޑު ހެއްދުމާއި ވެކްސިން ސެޓްފިކެޓް ދޫކުރުން ވެސް ބަންދުވާނެ އެވެ. އެހެންވެ އެޗްޕީއޭ އިން ވަނީ ދަތުރުކުރުމުގެ ކުރިން ވެކްސިން ކާޑު ނުވަތަ ވެކްސިން ސެޓްފިކެޓް ބޭނުންވާ މީހުން ޖުލައި 7 ވަނަ ދުވަހުގެ މެންދުރު 12:00 ގެ ކުރިން އެކަމަށް އެދުމަށް ވެސް އަންގައިފަ އެވެ.

ކޮވިޑް ސޭފް ޕޯޓަލް އިން ވެސް ޑިޖިޓަލް ވެކްސިނޭޝަން ސެޓްފިކެޓް ލިބޭނެ އެވެ.

ރާއްޖެއިން ވެކްސިން ޖެހޭ އާބާދީގެ 84.94 ޕަސެންޓް މީހުން ތިބީ ވެކްސިންގެ ދެވަނަ ޑޯޒް ޖަހައިގެންނެވެ. އެއީ 384،595 މީހުންނެވެ. އަދި ތިން ވަނަ ޑޯޒް ޖަހާފައި ވަނީ 159،638 މީހުންނެވެ. އެއީ ވެކްސިން ޖެހޭ އާބާދީގެ 35.04 ޕަސެންޓެވެ.

އުމުރުން ދުވަސްވީ މީހުންނާއި ކޮވިޑްގެ ނުރައްކާ އޮތް މީހުންނަށް ހަތަރު ވަނަ ޑޯޒް ޖަހައިދެމުން އަންނައިރު މިހާތަނަށް 405 މީހަކު ހަތަރު ވަނަ ޑޯޒް ޖަހާފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކަ އެވެ.

ކޮވިޑް ޖެހޭ މީހުންގެ އަދަދު މިދިޔަ ޖޫން މަހުން ފެށިގެން އިތުރުވާތީ ސަމާލުވުމަށް ވެސް އެޗްޕީއޭ އިން ވަނީ އިލްތިމާސްކޮށްފަ އެވެ.