ރައްޔިތުންގެ މަޖިލިސް ޓިިކްޓޮކަށް

ޒުވާނުންގެ މެދުގައި މަގުބޫލް މޮބައިލް އެޕްލިކޭޝަން، ޓިކްޓޮކް ރައްޔިތުންގެ މަޖިލީހުން މިއަދު ބޭނުންކުރަން ފަށައިފި އެވެ.

އެ އިދާރާގެ ކޮމިއުނިކޭޝަން އެންޑް މީޑިއާ ޑިރެކްޓަރު ހަސަން ޒިޔާއު ވިދާޅުވީ ޓިކްޓޮކް ބޭނުންކުރަން ފެށީ ވީހާ ވެސް ގިނަ ބަޔަކަށް މައުލޫމާތު ފޯރުކޮށްދީ މަޖިލީހުގެ މަސައްކަތްތައް ދައްކައިދޭން ކަމަށެވެ.

"މިހާރު މައުލޫމާތު ފޯރުކޮށްދިނުމުގައި ވީޑިއޯއަކީ ވަރަށް މުހިއްމު އެއްޗެއް. ޓިކްޓޮކަކީ ވީޑިއޯ ބޭސްޑް އެއްޗަކަށްވުމާ އެކު އެ ބޭނުންކުރަން ފެށީ،" ޒިޔާއު ވިދާޅުވި އެވެ.

ޓިކްޓޮކްގައި މަޖިލީހުން ބޭނުންކުރާ ނަމަކީ @ޕީޕަލްސްމަޖިލިސް އެވެ.

ފޭސްބުކާއި ޓްވިޓާގެ އިތުރުން އިންސްޓަގްރާމުގައި ވެސް މަޖިލީހުގެ އިދާރާއިން ވަރަށް ހަރަކާތްތެރި އެވެ. ޒިޔާއު ވިދާޅުވި ގޮތުގައި މަޖިލީހުގެ އެތެރޭގައި ހިނގާ ކަންތައްތައް ވެސް ކުރިއަށް އޮތް ތަނުގައި ސޯޝަލް މީޑިއާގެ އެކައުންޓުތައް މެދުވެރިކޮށް އާއްމުންނަށް ހިއްސާކުރާނެ އެވެ.

މީގެ ފަސް އަހަރު ކުރިން ލޯންޗުކުރި ޓިކްޓޮކް ބޭނުންކުރާ މީހުންގެ އަދަދު 1.5 ބިލިއަނަށް ވުރެ މައްޗަށް އަރަ އެވެ.