އުރީދޫ ކަލަންޑަރުން ދިވެހި ތާރީހު އެ އަންނަނީ ދިރިގެން

މި އަހަރު ފެށުމާ އެކު ގިނަ ބައެއްގެ ލޮލުގައި އަޅައިގަތީ އުރީދޫން ނެރުނު ކަލަންޑަރެވެ. އެންމެ ތަފާތު، އެންމެ ރީތި ކަލަންޑަރު ނެރުމުގެ ވާދަވެރިކަމުގެ ތެރެއިން އުރީދޫން މިވަނީ ޒަމާނީވަންތަ ގޮތަކަށް ރާއްޖޭގެ ތާރީހު ކިޔައިދީފަ އެވެ.

"ތާރީހުގެ ތެރެއިން ދިވެހިރާއްޖެ"ގެ ނަން ދީފައިވާ ކަލަންޑަރަށް އާާދައިގެ ނަޒަރެއް ހިންގާލުމަކުން ތަފާތެއް ނުފެންނާނެ އެވެ. ބޭރުގަނޑުގައި ދިވެހި ދިދަ އެވެ. އެކަމަކު އޭގެ ފަހުން ކޮންމެ މަހަކަށް ހާއްސަކޮށްފައިވާ ކުރެހުމަކީ، ތާރީހީ ވާހަކައެކެވެ. އެއިން ކޮންމެ ކުރެހުމެއްގެ ރީތި މަންޒަރު ފެންނާނީ ސުނެޕް ޗެޓުންނެވެ. ކުރެހުމުގެ ތިރިން ވާތް ފަރާތުގައި ހިމެނޭ ސުނެޕް ކޯޑް ސްކޭންކޮށްލުމުން، އެ ވަދެވެނީ، އެ ކުރެހުގައި ކިޔައިދޭ ވާހަކައިގެ ތެރެއަށެވެ.

ރާއްޖޭގެ ފުރަތަމަ ރަސްގެފާނު "ކޮއިމަލާ ކަލޯ" ތަހުތުގައި އޮށޯވެގެން އޮންނެވި އިރު، ދެ އަރިމަތީގައި ތިބި ދެ އެހީތެރިން، ދޫނީގެ ފަތުން ހަދާފައިވާ ފަންކާ މަޑުމަޑުން ވިހެލާތަން ފެނެ އެވެ.

ކަލަންޑަރުގައި ކިޔައިދޭ ވާހަކަތަކުގެ ތެރޭގައި "ޗޯޅާ ހަނގުރާމަ"، "ކެންދޫ މަގާމުފުޅު"، "ގާދިރީ ކަލޭގެފާނު"، "ވާރުގެއަށް ވެދުމާ ދިއުން"، "ފުރަތަމަ ޔުނިވަސިޓީ"، "އިނގިރޭސި ހިމާޔަތް"، "އުތުރު ގަަޑުބަޑު"، "ރޯނު ބޭރުކުރުން"، "ފެންފުށީ ގަލު ވަޑާން"، "ހިއްޗަށް ވަޑައިގަތުން"، އަދި "ގުޅަކުޅޭ ފަސްގަނޑު" ހިމެނެ އެވެ.

މި ހިތްގައިމު ކަލަންޑަރުގެ ހުރިހާ ކުރެހުމެއް ކުރެހީ، އާގްމެންޓެޑް ރިއަލިޓީ، (އޭއާރު) ޓެކްނޮލޮޖީ ބޭނުންކޮށްގެން ރާއްޖޭގެ ޑިޖިޓަލް މާކެޓިން އެންޑް ޑިޒައިން ސްޓޫޑިއޯއެއް ކަމަށްވާ ޕަބްލިސިޓީ ބިއުރޯގެ ފަންނުވެރިންނެވެ.

އޭއާރުއަކީ ޑިޖިޓަލް އެއްޗެއް، ކެމެރާއެއްގެ އެހީގައި އޭގެ އަސްލު ގޮތް ދައްކައިދޭ ޓެކްނޮލޮޖީއެކެވެ. ދުނިޔޭގެ ބޮޑެތި އެވޯޑު ޝޯތަކުގަ އާއި ހަފްލާތަކުގައި މިހާރު މި ޓެކްނޮލޮޖީ ވަރަށް ގިނައިން ބޭނުން ކުރެ އެވެ.

އުރީދޫގެ ކަލަންޑަރުން އެ ކިޔައިދެނީ ރާއްޖޭގެ ތާރީހާއި މަސައްކަތްތެރިކަމާ ގުޅިފައިވާ ވަރަށް މުހިންމު ވާހަކަތަކެކެވެ. އަދި ސުނެޕް ޗެޓް ކަހަލަ، މިހާރުގެ ޒުވާނުންގެ މެދުގައި މަގުބޫލު އެޕެއް މެދުވެރިކޮށް އެ ވާހަކައިގެ ރީތި މަންޒަރު ފެނުމަކީ، ދިވެހި ތާރީހުގެ ސަފުހާތަކެއް ޒުވާނުންނާ ހަމައަށް، ޒަމާނީ ގޮތަކަށް ހުށައަޅައިދިިނުމެވެ.

ސޯޝަލް މީޑިއާގެ ހުރިހާ ޕްލެޓްފޯމެއްގައި ވެސް އުރީދޫގެ މި ކަލަންޑަރުގެ ވާހަކަ ވަނީ އާންމުވެފަ އެވެ. އެއް ބަޔަކު އުޅެނީ ކަލަންޑަރެއް ލިބޭނެ ގޮތެއް ނުވެގެންނެވެ. އަނެއް ބަޔަކު ދައްކަނީ މޮޅު ކުރެހުންތަކުގެ ވާހަކަ އެވެ. ކަލަންޑަރުގެ ސްނެޕްތައް ވެސް އަންނަނީ އާންމުކުރަމުންނެވެ.