ރެއާލުން އެތުލެޓިކޯއާ ޕޮއިންޓުގެ ގޮތުން އެއްވަރުކޮށްފި

އެއިބާ (ޑިސެމްބަރު 21) – ސްޕެނިޝް ލީގުގައި ރޭ އެއިބާ އަތުން 3-1 އިން މޮޅުވެ ރެއާލް މެޑްރިޑުން، އެއް ވަނައިގައި އޮތް އެތުލެޓިކޯ މެޑްރިޑާ ޕޮއިންޓުގެ ގޮތުން އެއްވަރުކޮށްފި އެވެ.

ދެ ޓީމަށް ވެސް 29 ޕޮއިންޓް ލިބިފައިވާއިރު ލަނޑުގެ ތަފާތުން އެއް ވަނައިގައި އޮތީ އެތުލެޓިކޯ އެވެ. ރެއާލް އޮތީ ދެ ވަނައިގަ އެވެ. އެކަމަކު އެތުލެޓިކޯގެ އަތުގައި އިތުރު ދެ މެޗު އޮތުމުން ތަފާތު ބޮޑުކުރުމުގެ ފުރުސަތު އެ ޓީމަށް އެބައޮތެވެ.

ރަށުން ބޭރުގައި ރެއާލް ކުޅުނު މެޗުގައި ތަފާތު ދެއްކީ އެ ޓީމުގެ ފްރާންސް ފޯވާޑް ކަރިމް ބެންޒެމާ އެވެ. އޭނާ އެއް ގޯލް ޖަހައި ދެ ގޯލް ޖަހަން މަގުފަހިކޮށްދިނެވެ.

ފުރަތަމަ ގޯލް ރޮޑްރީގޯ ދިން ބޯޅައަކުން ހަ ވަނަ މިނެޓުގައި ޖެހީ ބެންޒެމާ އެވެ. އަދި 13 ވަނަ މިނެޓުގައި ބެންޒެމާ ދިން ބޯޅައަކުން ރެއާލުގެ ދެ ވަނަ ގޯލް ޖެހީ ލޫކާ މޮޑްރިޗެވެ. އޭގެ ފަހުން އެއިބާގެ ކީކޭ ތަފާތު ކުޑަކުރި އެވެ. ރެއާލް ތިން ޕޮއިންޓް ކަށަވަރުކުރީ އިތުރު ވަގުތުގެ ތެރޭގައި ބެންޒެމާ ދިން ބޯޅައަކުން ލޫކަސް ވަސްކުއޭޒް ޖެހި ގޯލުންނެވެ.

ރެއާލުގެ ކޯޗު ޒައިނުއްދީން ޒިދާން ބުނީ ބެންޒެމާ އަކީ އާދަޔާހިލާފު ކުޅުންތެރިއެއް ކަމަށާއި ލަނޑު ޖެހުމުގެ އިތުރުން ޓީމަށް އެހެން ގޮތްގޮތުން ވެސް އޭނާ އެހީވާ ކަމަށެވެ.