ރިތިކް ރޯޝަންގެ "ކްރިޝް 4" ގެ ބަތަލާ އަކީ ކިއާރާ އަދުވާނީ؟

ރިތިކް ރޯޝަންގެ ސުޕަހީރޯ ފްރެންޗައިޒް "ކްރިޝް" ގެ ހަތަރު ވަނަ ފިލްމުގެ މަސައްކަތް ފަށާނެ އިރެއް ނޭނގުނަސް މީގެ ބަތަލާއާ ބެހޭ ގޮތުން މީޑިއާތަކުގައި ދެކެވޭ ވާހަކަތައް ގިނަ އެވެ.

މި ފަހުން އެންމެ ބޮޑަށް އެރި އަޑަކީ "ކްރިޝް 4" ގެ ބަތަލާގެ ރޯލުން ފެންނާނީ ކްރިތީ ސެނަން ކަމަށް ބުނާ ވާހަކަ އެވެ. އެކަމަކު މިހާރު ފިލްމީ ޚަބަރުތައް ގެނެސްދޭ ނޫސްތަކުން ބުނާ ގޮތުގައި ފިލްމުގެ ޝޫޓިން ތާވަލުކުރާ ދުވަސްވަރަށް ކްރިތީ އަށް ފިލްމަށް ވަގުތު ދެވޭކަށް ނެތެވެ. ސަބަބަކީ އޭނާ އެހެން ޕްރޮޖެކްޓްތަކެއްގައި ވަރަށް ބިޒީކޮށް އުޅެން ޖެހުމެވެ. މި ވަގުތު ކޮވިޑް-19 ޖެހިގެން ފަރުވާ ހޯދަމުން އަންނަ ބަތަލާ މިދިޔަ ހަފުތާގެ ތެރޭގައި ވަނީ "ހަމް ދޯ ހަމާރޭ ދޯ" ގެ ޝޫޓިން ނިންމާލައިފަ އެވެ.

ރިޕޯޓްތައް ބުނާ ގޮތުން ޕްރަބާސް އާއި ސައިފް އަލީ ޚާނާ އެކު ޑައިރެކްޓަރު އޯމް ރައުތު ގެނެސްދޭން ނިންމާފައިވާ ބޮޑު ފިލްމު "އާދިޕުރުޝް" ގެ ބަތަލާގެ ރޯލް ވެސް ކްރިތީ އަށް ހުށަހަޅާފައިވެ އެވެ. ދެހާސް ބާވީހުގެ އޮގަސްޓް 11 ގައި ސިނަމާތަކަށް ގެންނަން ތާވަލުކޮށްފައިވާ އެ ފިލްމުގެ ޝޫޓިން ފަށާނީ އަންނަ އަހަރު އެވެ.

މީޑިއާތަކުން ބުނީ ރިތިކްގެ ބައްޕަ ރާކޭޝް ރޯޝަން ގެނެސްދޭ "ކްރިޝް" ސީރީޒްގެ ހަތަރު ވަނަ ފިލްމުގައި ދެ ބަތަލާ އެކު ހިމެނޭ އިރު، ކްރިތީ ގެންނަން އުޅުނީ މައި ބަތަލާއަށް ކަމަށެވެ. ނަމަވެސް އޭނާ އަށް ވަގުތު ދެވޭނެކަމާ ދޭތެރޭ ސުވާލު އުފެދުމުން މިހާރު ކިއާރާ އަދުވާނީއާ ވާހަކަ ދައްކަމުން އަންނަ ކަމަށް މީޑިއާތަކުން ބުންޏެވެ.

ކިއާރާ އަކީ މި ފަހުން ބޮލީވުޑްގައި އެންމެ ޑިމާންޑް ބޮޑުވަމުން އަންނަ އެއް ބަތަލާ އެވެ. މި މަހުގެ 11 ގައި ރިލީޒްކުރާ "އިންދޫ ކީ ޖަވާނީ" ގެ ބަތަލާގެ ކުރިއަށް ހުރި ފިލްމުތަކުގެ ތެރޭގައި ކަރަން ޖޯހަރްގެ "ޖުގް ޖުގް ޖިއޯ" އާއި އަޝުތޯޝް ގޮވަރިކާގެ "ކުއްރަމް ކައްރަމް" އާއި "ބޫލް ބުލައްޔާ 2" އާއި "ޝޭރް ޝާހް" ހިމެނެ އެވެ.

ފިލްމު "ފަގްލީ" އިން 2014 ގައި ބޮލީވުޑަށް ނުކުތްް 28 އަހަރުގެ ބަތަލާ އެންމެ ފަހުން ފެނިފައި ވަނީ މިދިޔަ މަހު ޑިޒްނީ ޕްލަސް ހޮޓްސްޓާ އިން ޕްރިމިއާކުރާ "ލަކްޝްމީ" އިންނެވެ.

ބޮލީވުޑް ހަންގާމާ އިން ބުނިގޮތުގައި ކިއާރާއާ ވާހަކަ ދައްކައި އޭނާއާ އެކު އެއްބަސްވުމަކަށް އާދެވުމާ އެކު ރާކޭޝް އެކަން ރަސްމީކޮށް އިއުލާންކުރާނެ އެވެ. އެކަމަކު އެއާއެކު "ކްރިޝް 4" ގެ ދެވަނަ ބަތަލާއަކަށް ވާނީ ކާކު ކަމެއް ނޭނގެ އެވެ. ރާކޭޝް ބޭނުން ވަނީ މި ފަހަރު މި ފިލްމަށް ވަރަށް ޒުވާން ބަތަލާއިންތަކެއް ގެންނާށެވެ.

"ކްރިޝް 3" 2013 ގައި ގެނެސްދިން އިރު ބަތަލާއިންނަކީ ޕްރިޔަންކާ ޗޯޕްޅާ އާއި ކަންގަނާ ރަނާވަތެވެ.