ބައެއް މީހުންގެ ރައްދު އެޗުއާރުސީއެމަށް: ދޫނިދުއެއް ނޫން، އެހެން ރަށްރަށުގެ ހާލަތު ވެސް ބަލާ!

ދޫނިދޫގައި ބަންދުގައި ތިބި މީހުންނަށް ސާފު ފެން ފޯރުކޮށްނުދޭތީ ފިޔަވަޅު އަޅަން އެޗުއާރުސީއެމުން ނިންމުމުން ސިޔާސީ ބައެއް މީހުންނާއި އާންމުން އެކި ގޮތްގޮތަށް ރައްދުދީފި އެވެ.

އެޗުއާރުސީއެމްގެ އެ ނިންމުމަކީ، ބައެއް އާންމުން ގަބޫލުކުރާ ގޮތުގައި، ކުށްވެރިންގެ ހިމާޔަތުގައި އަޅާ ފިޔަވަޅެކެވެ. އެކަމަކު ރާއްޖޭގައި ސާފު ފެން ނުލިބޭ ކިތައްމެ ރަށެއް އެބަ އޮތް ކަމަށާއި އެ ރަށްރަށުގެ ރައްޔިތުންގެ ހައްގުތައް ވެސް، އެޗުއާރުސީއެމުން ހިމާޔަތްކޮށްދޭން ޖެހޭނެ ކަމަށް، އެ ނަޒަރުން ވިސްނާ މީހުން ބުނެ އެވެ.

ސާފު ފެނާއި ނަރުދަމާގެ މައްސަލާގައި ސިޔާސީ ބޭފުޅުންގެ ތެރެއިން އެޗުއާރުސީއެމަށް ބައެއް ކަންކަން ހަނދާންކޮށްދެއްވި އެއް ބޭފުޅަކީ ކެންދޫ ދާއިރާގެ ޖުމްހޫރީ ޕާޓީގެ މެމްބަރު އަލީ ހުސެއިން އެވެ.

އެކި ކުށްކުށަށް ތުހުމަތުކުރެވޭ މީހުންގެ ތެރެއިން ދޫނިދޫގައި ތިބި ގައިދީންނަށް ސާފު ފެން ފޯރުކޮށްނުދޭތީ އެޗުއާރުސީއެމުން ފިޔަވަޅު އަޅަން އުޅޭ ކަމަށް "މިހާރު"ގައި ޖެހި ހަބަރު ޓްވީޓްކުރައްވަމުން، އަލީ ހުސެއިން ވިދާޅުވީ ރާއްޖޭގައި މީހުން ދިރިއުޅޭ ގިނަ ރަށްރަށުގައި ފެނާއި ނަރުދަމާގެ ހިދުމަތް ނުލިބޭތީ ވެސް އެޗުއާރުސީއެމުން ފިޔަވަޅު އަޅަން ޖެހޭނެ ކަމަށެވެ.

"ސާފު ފެން ލިބުމަކީ ރަށްތަކުގައި ދިރިއުޅޭ މީހުންގެ ވެސް އިންސާނީ އަސާސީ ހައްގެއް،" އަލީ ހުސެއިންގެ ޓްވީޓްގައި ލިއުއްވި އެވެ.

އޭނާގެ ޓްވީޓަށް ރައްދުދެމުން ސައުދުﷲ އިސްމާއިލް ނަމަކަށް ކިޔާ މީހަކު ވަނީ އެޗްއާރުސީއެމަކީ ހަމައެކަނި ކުށްވެރިންގެ ހައްގު ހޯދަން އޮންނަ މުއައްސަސާއެއްތޯ ސުވާލުކޮށްފަ އެވެ. އޭނާ ބުނި ގޮތުގައި އާއްމު ރައްޔިތުން ކޮންމެ ހާލެއްގައި އުޅުނަސް އެޗްއާރުސީއެމުން ބަލައެއްނުލަ އެވެ.

"ތި ވިދާޅުވި ފަދައިން ނަޖިސް ފެން ވަރަނީ ކިތައް ރަށުގައިތޯ؟" އޭނާ ސުވާލުކުރި އެވެ.

ހުސެއިން އާދަމް ނަމަކަށް ކިޔާ މީހަކު ބުނީ، އެޗްއާރުސީއެމް ހީވަނީ ހަމައެކަނި ބަންދު މީހުންނާއި ކުށްވެރިންގެ ތަނެއްހެން ކަމަށެވެ.

"އަހަރެމެން މި ތިބި ހިސާބަށް ރޭކާވެސް ނުލާ އެ ތަނުގެ،" އޭނާ ލިއުނެވެ.

ދޫނިދޫގައި ބަންދުކޮށްފައި ތިބި މީހުންގެ ހައްގުގައި އެޗުއާރުސީއެމުން ފިޔަވަޅު އަޅަން ނިންމީ، އެ ކޮމިޝަނުން ނެރުނު ބަޔާނެއްގައި ބުނި ގޮތުގައި، މިދިއަ މަހު ފަހުކޮޅު ދޫނިދޫ ޖަލަށް ކުރި ޒިޔާރަތުގައި ފެން ތަހުލީލުކޮށްފަ އެވެ. ފެނުގައި ގިނަ އަދަދަކަށް ބެކްޓީރިއާ ހުރިކަން، ތަހުލީލުން ދެއްކި ކަމަށް ވެސް އެޗުއާރުސީއެމުން ބުންޏެވެ. ފިޔަވަޅު އަޅަނީ އެކަން ރަނގަޅުކުރަން އެންގުމުން އެއްވެސް ބަދަލެއް އައިސްފައިނުވާތީ ކަމަށް، ރާއްޖޭގައި އިންސާނީ ހައްގުތައް ހިމަޔާތްކުރުމުގެ މަސްއޫލިއްޔަތު އުފުލަން ޖެހޭ ކޮމިޝަންގެ ބަޔާނުގައިވެ އެވެ.

ރާއްޖޭގައި މީހުން ދިރިއުޅޭ 185 ރަށުގެ ތެރެއިން ސާފު ބޯފެން ފޯރުކޮށްދެމުން އަންނަނީ އެންމެ 73 ރަށަކަށެވެ. އެކަމަކު މިހާރު ވެސް ބައެއް ރަށްރަށުގައި އަންނަނީ ސާފު ބޯފެނާއި ނަރުދަމާ ނިޒާމް ގާއިމްކުރުމުގެ މަސައްކަތް ކުރަމުންނެވެ.

އޮގަސްޓް 5، 2020 ގައި ރައީސް އިބްރާހިމް މުހައްމަދު ސޯލިހު ތަސްދީގުކުރެއްވި "ފެނާއި ނަރުދަމާގެ ގާނޫނު" ބުނާ ގޮތުން ސާފު ބޯ ފެނަކީ ރާއްޖޭގައި ދިރިއުޅޭ ކޮންމެ މީހަކަށް އަމިއްލަ ބޭނުމާއި ޒަރޫރީ ކަންކަމުގައި ލިބެން ޖެހޭ ހައްގެކެވެ. ކެއުން ބުއިމަށް ފޯރުކޮށްދޭ ފެން ސިއްހީ ގޮތުން ރައްކާތެރި އެއްޗަކަށް ވާން ޖެހޭނެ ކަމަށް ވެސް އެ ގާނޫނުގައި ބުނެ އެވެ.

އާ ގާނޫނުގައި އޮތް ގޮތުން ރާއްޖޭގައި ދިރިއުޅޭ އެންމެންނަށް ތަފާތުކުރުމަކާ ނުލައި ފެނާއި ނަރުދަމާގެ ވަސީލަތްތަކަށް ވާސިލްވެވެން ޖެހޭނެ އެވެ. އަދި އެ ގާނޫނަށް އަމަލުކުރަން ފަށާތާ މަދުވެގެން ފަސް އަހަރުގެ ތެރޭގައި މީހުން ދިރިއުޅޭ ހުރިހާ ރަށެއްގައި ނަރުދަމާ އާއި ފެނުގެ ނިޒާމް ގާއިމްކުރަން ޖެހެ އެވެ.