5ޖީއާ އެކު ވަންޕްލަސްގެ އަގުހެޔޮ ފޯނެއް

މިހާތަނަށް އެންމެ ރަނގަޅަށް 5ޖީ ނެޓްވޯކް ތަޖުރިބާކުރެވޭނެ ފޯނުގެ ގޮތުގައި ސިފަކޮށް ޗައިނާގެ ވަންޕްލަސް އިން އެ ކުންފުނީގެ ނޯޑް ރޭންޖްގެ އަގުހެޔޮ ފޯނެއް ނެރެން ތައްޔާރުވެއްޖެ އެވެ.

ނޯޑް ރޭންޖްގެ ދަށުން ނެރޭ ދެ ފޯނަކީ ނޯޑް އެން10 5ޖީ އާއި ނޯޑް އެން100 އެވެ. އެކަމަކު އެން100 ގައި 5ޖީއެއް ނުހިމެނޭނެ އެވެ. ނޯޑް10 5ޖީ އަކީ ހަ ޖީބީގެ ރޭމަކާއި 128 ޖީބީގެ ސްޓޯރޭޖާއި ކުއަމްކޮމްގެ ސްނެޕްޑްރެގަން 690 ޗިޕްސެޓް ވެސް އެކުލެވޭނެ ފޯނެކެވެ.

މީގެ އިތުރު ފީޗާތަކަށް ބަލާއިރު މިއީ އެފްއެޗްޑީ ޕްލަސްގެ ޑިސްޕްލޭއަކާ އެކު 6.49 އިންޗީގެ ފޯނެކެވެ. ނޯޑްގެ އޮރިޖިނަލްގައި އިން-ސްކްރީން ފިންގަޕްރިންޓް ސްކޭނާ އިން ނަމަވެސް އިން ނޯޑް10 5ޖީ ގައި އެ ފީޗާ އިންނާނީ ޕިކްސަލް 5 ގައި އިންނަ ގޮތަށް ފަހަތުގަ އެވެ. މީގެ އިތިރުން އޮރޮޖިނަލް ނޯޑާ ހިލާފަށް 5ޖީ ޑިވައިސްގައި ދެ ސްޕީކަރު އިންނާނެ އެވެ. މީގެ ކެމެރާތަކުން ވެސް ތަފާތު ތަޖުރިބާތަކެއްކުރެވޭނެ އެވެ. އަދި ޔޫއެސްބީ-ސީއާ އެކު 3.5 އެމްއެމްގެ ހެޑްފޯން ޖެކް ވެސް ވެސް އިންނާނެ އެވެ.

ނޯޑް އެން10 5ޖީގެ އަގަކީ 428.99 ޑޮލަރު (6,610.74ރ.) އެވެ.

ނޯޑް100 އަށް ބަލާ އިރު މިއީ ހަތަރު ޖީބީގެ ރޭމަކާއި 64 ޖީބީގެ ސްޓޯރޭޖް އެކުލެވޭ 6.52 އިންޗީގެ ފޯނެކެވެ. މާނަ އަކީ ސައިޒްގެ ގޮތުން މިއީ އެން10 5ޖީ އަށް ވުރެ ބޮޑު ފޯނެކޭ އެވެ. އިތުރު ފީޗާތަކަށް ބަލާ އިރު، އެން100 އަކީ ކުއަމްކޮމްގެ ސްނެޕްޑްރެގަން 460 ޗިޕްސެޓް ވެސް އެކުލެވޭ ފޯނެކެވެ.

ނޯޑް އެން100 ގެ އަގަކީ 233.38 ޑޮލަރު (3,596.39ރ.) އެވެ.

ވަންޕްލަސް އިން ބުނިގޮތުގައި ނޯޑް އެން100 އަންނަ މަހުގެ 10 އިން ފެށިގެން ވިއްކަން ފަށާނެ އެވެ. އަދި އަންނަ މަހުގެ ފަހުގެ ތާރީހެއްގައި އެން10 5ޖީ ވިއްކަން ފަށާނެ އިރެއް އިއުލާން ކުރާނެ އެވެ.