ބޯޓަކުން ވެއްޓި ބިދޭސީއަކު މަރުވެއްޖެ

ގުޅީފަޅާ ދިމާލުން ބޭރުގައި އަޅާފައި އޮތް ބޯޓަކުން ވެއްޓި ބިދޭސީއަކު މިއަދު މަރުވެއްޖެ އެވެ.

އެމްއެންޑީއެފުން ބުނީ އެ މީހާ "ވިކްޓޯރިއާ 267" ކިޔާ ބޯޓު ތެރެއަށް ވެއްޓި ބޯ ފަޅައިގެން ދިޔަ ކަމުގެ ރިޕޯޓު ލިބިފައި ވަނީ މިއަދު ހެނދުނު 11:15 ހާއިރު ކަމަށެވެ. އެ ކޭސްއަށް އެޓެންޑް ވެ އޭނާ މާލެ ގެނެވުނީ މެންދުރު 12:10 ހާއިރު ކަމަށް ބުންޏެވެ.

އައިޖީއެމްއެޗުން ބުނީ ހޮސްޕިޓަލަށް ގެންދިޔައިރު ވެސް އެމީހާ މަރުވެފައިވާ ކަމަށާއި އެއީ އުމުރުން 64 އަހަރުގެ ބިދޭސީ ފިރިހެނަކު ކަމަށެވެ. ނަމަވެސް އެއީ ކޮން ގައުމެއްގެ މީހެއް ކަމެއް ޔަގީނެއް ނުވެ އެވެ.

މިއަދު ހެނދުނު އައިޖީއެމްއެޗާ ދިމާލުން މޫދުގައި ވެސް މަރުވެފައި އޮތް ދިވެހި ފިރިހެނަކު ފެނިފައި ވެ އެވެ.