އެސްއެމްއީ ލޯނު ފަސްކޮށްދޭން އެދި ހުށަހަޅަށް އިތުރު މުއްދަތެއް

އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) ގެ ލޯނުތައް ފަސްކޮށްދޭން އެދުމުގެ މުއްދަތު އަންނަ މަހުގެ އަށް ވަނަ ދުވަހުގެ ނިޔަލަށް އިތުރުކޮށްދީފި އެވެ.

ކޮވިޑް-19 ގެ ސަބަބުން ގިނަ ބައެއްގެ އާމްދަނީ އަށް ނޭދެވޭ އަސަރުކޮށްފައި ވާތީ، އެސްޑީއެފްސީން ވަނީ އެ ބޭންކުން ދޫކޮށްފައިވާ ލޯނުތައް ވެސް އަނބުރާ ދެއްކުމުގެ މުއްދަތު މިއަހަރުގެ ނިޔަލަށް ފަސްކޮށްދީފަ އެވެ.

އެސްޑީއެފްސީން މިއަދު ނެރުނު އިއުލާނެއްގައި ބުނީ މޮރެޓޯރިއަމަށް އެދި ހުށައަޅަން ގިނަ ބަޔަކަށް ދަތިވެފައި ވާތީ، އެކަމަށް އެދެން އިތުރު ފުރުސަތެއް ދިނީ ކަމަށެވެ.

ލޯނު ފަސްކޮށްދޭން އެދި ހުށަހެޅުމަށް ފުރަތަމަ ދިން މުއްދަތު މިދިޔަ ހުކުރު ދުވަހަށް ވަނީ ހަމަވެފަ އެވެ.

އެސްޑީއެފްސީ އިން ނަގާފައިވާ ލޯނުތައް އަނބުރާ ދައްކާ މުއްދަތު އިތުރު ކުރަން ނިންމިޔަސް އެ މުއްދަތު ދޭނީ އެ ބޭންކުން ކުރިން ލޯނު ނަގާފައިވާ ކަސްޓަމަރުންނަށް އެކަންޏެވެ. ރިލީފް ސްކީމް ދަށުން ނަގާ ލޯނުތައް މީގެ ތެރެއަކު ނުހިމެނެ އެވެ.

އެހެން ބައެއް ބޭންކުތަކުން ވެސް ވަނީ ކޮވިޑް-19 ގެ ސަބަބުން ކުރިމަތިވި ދަތިކަމާ ގުޅިގެން ލޯނުތައް ފަސްކޮށްދީފަ އެވެ.