ޖީއެމްއައިޒެޑްއެލްގެ ޒިންމާތައް އެޗްޑީސީއާ ހަވާލުކޮށްފި

ސިނާއީ ރަށް ތިލަފުށި ހިންގަމުން އައި ގްރޭޓާ މާލޭ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) ގެ ޒިންމާތައް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އާ ހަވާލުކޮށްފި އެވެ.

ޖީއެމްއައިޒެޑްއެލްގެ ހުރިހާ ޒިންމާއެއް، ހުޅުމާލެ ބަލަހައްޓާ ކުންފުންޏާ ހަވާލުކުރިއިރު، އެ ދެ ކުންފުނި އެއްކުރަން ސަރުކާރުން ވަނީ މިދިޔަ މަހު ނިންމައިފަ އެވެ. އެހެންވެ، ޖީއެމްއައިޒެޑްއެލްގެ ހިއްސާގެ ބައެއް އޭރު ވަނީ އެޗްޑީސީ އަށް ދީފަ އެވެ.

ޖީއެމްއައިޒެޑްއެލް އިން އިއްޔެ ނެރުނު އިއުލާނެއްގައި ބުނީ، ދެ ކުންފުނި އެއްކުރަން ސަރުކާރުން ނިންމާފައިވާ ކަމަށެވެ. އެހެންވެ، މި ބަދަލުގެ ފުރަތަމަ މަރުހަލާއެއްގެ ގޮތުން ޖީއެމްއައިޒެޑްއެލްގެ ހުރިހާ އެސެޓަކާއި ލައިބިލިޓީއަކާއި މުވައްޒަފުންނާއި ހުރިހާ އެއްބަސްވުންތަކުގެ އިތުރުން ކުންފުނީގެ މައްޗަށް އޮތް ހުރިހާ އިލްތިޒާމުތަކާއި ޒިންމާތައް އެޗްޑީސީއާ ހަވާލުކޮށްފައިވާ ކަމަށް އިއުލާނުގައި ބުންޏެވެ.

ސަރުކާރުން މިގޮތަށް ނިންމީ މާލީ ގޮތުންނާއި ހިންގުމުގައި ލިބޭ ފައިދާތަކަށް ބެލުމަށް ފަހު، ހުޅުމާލެ އާއި ތިލަފުށި އަދި ގުޅީފަޅު ހިމެނޭ ގޮތަށް ތަރައްގީ ކުރުމުގެ ހުރިހާ މަސައްކަތްތައް އެއް ކުންފުންޏެއްގެ ދަށުން ކުރިއަށް ގެންދިއުމުގެ ބޭނުމުގައި ކަމަށް ޖީއެމްއައިޒެޑްއެލް އިން ބުނެ އެވެ.

“...ސަރުކާރުން އެކުލަވާލައްވާފައިވާ ސިޔާސަތުތަކާ އެއްގޮތަށް ހުޅުމާލެ، ގުޅިފަޅު އަދި ތިލަފުށި ތަރައްގީ ކުރުމުގެ މަސައްކަތްތައް އެޗްޑީސީ އިން ކުރިއަށް ގެންދާނީ ސަރުކާރުގެ މަޝްވަރާ އާއި ލަފާގެ މަތިންނެވެ.” ޖީއެމްއައިޒެޑްއެލްގެ އިއުލާނުގައި ވެ އެވެ.

މި ނިންމުމާ ގުޅިގެން އެޗްޑީސީ އާއި ޖީއެމްއައިޒެޑްއެލް އިން އަންނަނީ ހަދާފައިވާ އެއްބަސްވުންތަކާއި ލިޔެކިޔުންތަކަށް ގެންނަންޖެހޭ ބަދަލުތައް ގެނައުމަށް މަޝްވަރާ ކުރަމުންނެވެ.