އާޝާ އަށް 87، އެކަމަކު އޭނާ ބުނަނީ 40 ކަމަށް!

އުމުރުން 87 އަހަރު ފުރުނަސް އަދިވެސް އިހުސާސްކުރެވެނީ 40 އަހަރުގެ މީހެއްގެ ގޮތުގައި ކަމަށް އިންޑިއާގެ މަޝްހޫރު ލަވަކިޔުންތެރިޔާ އާޝާ ބޯސްލޭ ބުނެފި އެވެ.

ހުނަރުވެރި ލަވަކިޔުންތެރިޔާ ލަތާ މަންގޭޝްކަރްގެ ކޮއްކޮ އަށް 87 އަހަރު ފުރުނީ އަންގާރަ ދުވަހު އެވެ. އެކަމާ ގުޅުވައިގެން އާޝާ އިންސްޓަގްރާމްގައި އާންމުކުރި ފޮޓޯއަކާ އެކު ބުނީ "88 އަހަރަށް ފެށުނަސް އަދިވެސް 40" ކަމަށެވެ.

އާޝާގެ ޕޯސްޓްގައި ވަނީ ކަންކަމާ ދޭތެރޭ އަބަދު ވެސް ޕޮޒިޓިވްކޮށް ދެކުމަށާއި ކޮންމެ މީހަކާ އެކީގައި ވެސް އުޅޭ ބަޔަކީ ޕޮޒިޓިވް ބަޔަކަށްވާން ނަސޭހަތްތެރިވާ ކަމަށް ބުނެފަ އެވެ. އޭނާ ބުނީ އުފާވެރިކަން ލިބޭނީ ހިނިތުންވެެގެން ކަމަށާއި އުފާވެރިކަން ގެންނަން ޖެހޭ ކަމަށެވެ.

އާޝާ އަކީ އިންޑިއާގެ ލަވަކިޔުންތެރިންގެ ތެރެއިން އެންމެ ކާމިޔާބު އެކެކެވެ. އަދި އޭނާ އެންމެ ގިނަ މިހާތަނށް ރެކޯޑްކޮށްފައިވާ އެއް ފަންނާނެވެ. އާޝާ ވަނީ ހިންދީ ސިނަމާގެ އެތައް ޖީލަކަށް ރީތި އެތައް ލަވައެއް ކިޔައި ދީފަ އެވެ.