ޑްރާމާއެއްގައި ވިޔާނުދާ މަންޒަރުތަކެއް ދެއްކުމުން އެކްތާ އާއި އޭނާގެ މަންމަ ޕޮލިހަށް

އެކްތާ ކަޕޫރްގެ ސްޓްރީމިން ޕްލެޓްފޯމް "އޯލްޓް ބަލާޖީ"ން ގެނެސްދިން ޑްރާމާއެއްގައި ކުޑަކުދިންގެ ބަރަހަނާ މަންޒަރުތަކެއް ދެއްކި ކަމަށް ބުނެ އޭނާ އާއި އޭނާގެ މަންމަ ޝޯބާ ކަޕޫރްއާ ދެކޮޅަށް މުމްބާއީގެ ފުލުހުންނަށް މައްސަލައެއް ހުށަހަޅައިފި އެވެ.

އެއީ އޯލްޓް ބަލާޖީން ގެނެސްދިން "ގަންދީ ބާތު" ކިޔާ ޑްރާމާއަކާ ގުޅުންހުރި މައްސަލައެކެވެ. އެ ޑްރާމާ ޕްރޮޑިއުސްކުރީ އެކްތާ އާއި ޝޯބާ އެވެ.

މުމްބާއީގެ ފުލުހުން ބުނީ "ގަންދީ ބާތު"ގެ ހަ ވަނަ ސީޒަންގެ އެޕިސޯޑެއްގައި ކުޑަކުދިންތަކެއް ލައްވައި އެކުދިންގެ އުމުރާ ނުގުޅޭ މަންޒަރުތަކެއް ކުޅުވި ކަމަށް ތުހުމަތުވާ މައްސަލައެއް ހުށަހަޅާފައިވާ ކަމަށެވެ. އެކްތާ އާއި ޝޯބާއާ ދެކޮޅަށް އެ މައްސަލަ ރަޖިސްޓްރީކޮށްދިނީ އިންޑިއާގެ ކުޑަކުދިންގެ ހައްގުތަކާ ބެހޭ ގާނޫނާއި އިންފޮމޭޝަން ޓެކްނޮލޮޖީގެ ގާނޫނާ ހިލާފުވެފައިވާ ކަމަށް ތުހުމަތުވާތީ ކަމަށް ވެސް ފުލުހުން ބުންޏެވެ.

ނަމަވެސް، އެ މައްސަލަ ހުށަހެޅީ ކާކު ކަމެއް ފުލުހުން އަދި ނުބުނެ އެވެ.

އެ ސީޒަން ދެއްކީ ފެބްރުއަރީ 2021 އާއި އެޕްރީލް 2021 އާ ދެމެދުގަ އެވެ. ނަމަވެސް، މައްސަލަ ޖެހުނު އެޕިސޯޑު މިހާރު ވަނީ އެ ޕްލެޓްފޯމުން ޑިލިޓްކޮށްފަ އެވެ.

ހިންދީ ޑްރާމާތައް އުފައްދައިގެން މަޝްހޫރުކަން ހޯދި އެކްތާ ޕްރޮޑިއުސްކޮށް މިދިޔަ އެޕްރީލް މަހު ގެނެސްދިން ފިލްމު "ލަވް، ސެކްސް އޯރް ދޯކާ 2"ގެ ޕޯސްޓަރުގައި ވެސް މުޖުތަމައުގެ އާންމު މިންގަނޑާ ހިލާފަށް އަންހެންގެ ފޮޓޯ ޖެހުމުން މައްސަލަ ހޫނުވި އެވެ.