ބޮލީވުޑް ތަރިންގެ ހާއްސަ ވަގުތުކޮޅެއް ރާއްޖެ އަށް

ރާއްޖެއަކީ ބޮލީވުޑްގެ ތަރިންގެ މަގުބޫލް މަންޒިލަކަށް ވެފައިވާއިރު، މިއަދު އޭގެ ތެރެއިން މަޝްހޫރު ބައެއް ތަރިންގެ ހަވީރުގެ ވަގުތުތައް ހުސްކުރީ ރާއްޖޭގެ ޓޫރިޒަމް ޕްރޮމޯޓް ކުރުމުގަ އެވެ. ރާއްޖެ އަށް އޮތް ލޯބި ހާމަކުރުމަށެވެ.

ރައީސް ޑރ. މުހައްމަދު މުއިއްޒު މިހާރު އިންޑިއާ އަށް ކުރައްވަމުން ގެންދަވާ ފުރަމާނަ ދަތުރުފުޅުގައި މިއަދު ހެނދުނު މުމްބާއީ އަށް ވަޑައިގެން މައިގަނޑު ކަމަކަށް އޮތީ ރާއްޖޭގެ ޓޫރިޒަމާއި ވިޔަފާރި ޕްރޮމޯޓް ކުރެއްވުމެވެ. އޭގެ ތެރެއިން ހަވީރު ފަހެއް ޖެހުމަށް ފަހު ހާއްސަ ކުރެއްވީ އިންޑިއާގެ ބޮލީވުޑްގެ ތަރިންނަށެވެ.

ރައީސް މުއިއްޒު މުމްބާއީގައި ހުންނަވާ ތާޖު މަހަލް ޕެލަސްގައި ބޭއްވި އިވެންޓަށް މިހާތަނަށް ރާއްޖެ އަށް ޒިޔާރަތް ކޮށްފައިވާ ބޮލީވުޑްގެ މަޝްހޫރު ބައެއް ތަރިން އައިސް އެ މަނިކުފާނުގެ ދެކަނބަލުންނާ ބައްދަލުކުރައްވައި ރާއްޖެ އަށް އޮތް ލޯބި ހާމަކޮށްދިނެވެ.

މިއަދުގެ އިވެންޓަށް އައި ތަރިންގެ ތެރޭގައި ޝިލްޕާ ޝެޓީ އާއި އަރްބާޒް ހާން އާއި އޭނާގެ އަންހެނުން އަދި މޭކަޕް އާޓިސްޓް ޝުރާ ހާން އާއި ސަނީ ކައުޝަލް އާއި ސޮނާކްޝީ ސިންހާ އާއި އޭނާގެ ފިރިމީހާ އަދި އެކްޓަރު ޒަހީރް އިގްބާލް އަދި ކަރިޝްމާ ކަޕޫރް ވެސް ހިމެނެ އެވެ.

އެ ހުރިހާ ތަރިންނާ ވެސް ރައީސް މުއިއްޒުގެ ދެކަނބަލުން ބައްދަލުކުރައްވައި ރާއްޖެ ޒިޔާރަތްކޮށް، ޕްރޮމޯޓް ކޮށްދިނުމަށް އެދިވަޑައިގަތެވެ. ރައީސްގެ ދެކަނބަލުންނާ އެކު ހުރިހާ ތަރިން ވެސް ފޮޓޯ އާއި ވީޑިއޯތައް ނެގި އެވެ.

މި އިވެންޓުގައި ގިނަ ބައެއްގެ ސަމާލުކަން އެންމެ ބޮޑަށް ލިބުނީ ޝިލްޕާއަށެވެ. އިވެންޓަށް ދިޔަ އެންމެން ކަަހަލަ ގޮތަކަށް އެންމެ ބޮޑަށް ބޭނުންވީ ޝިޕްލާއާ އެކު ސެލްފީ އާއި ވީޑިއޯތައް ނެގުމަށެވެ.

ރައީސާ ވާހަކަ ދެއްކި ހުރިހާ ތަރިން ވެސް ވަނީ ރާއްޖޭގެ ރީތިކަން ފާހަގަކޮށް، މެހުމާންދާރީ އަށް ޝުކުރު އަދާކޮށްފަ އެވެ. އަދި އެ ތަރިންނަށް ހާއްސަ އިވެންޓެއް ބާއްވައި ދިނީތީ އެކަން ވެސް ފާހަގަކުރި އެވެ.

މިއަދުގެ އިވެންޓުގައި ބައިވެރިވި ތަރިންގެ ތެރެއިން ކަރިޝްމާ ފިޔަވައި އެހެން ހުރިހާ ތަރިން ވެސް މީގެ ކުރިން ޗުއްޓީ ހޭދަކުރަން ރާއްޖެ އައިސްފައިވެ އެވެ. ޝިލްޕާ އާއި ސޮނާކްޝީ ވަނީ އެކި ފަހަރު މަތިން ރާއްޖެ އައިސްފަ އެވެ. އަދި ރާއްޖެ އަންނަ ކޮންމެ ފަހަރަކު ވެސް ރާއްޖޭގެ ރީތިކަމާއި މެހުމާންދާރީގެ ރަނގަޅު ކަމުގެ ވާހަކަ އެ ދެ ތަރިން ވެސް ދައްކަ އެވެ.

ބޮލީވުޑް ތަރިންނާ އެކު، ރައީސް މުއިއްޒު ބޭއްވެވި މި ބައްދަލުވުމުގެ ކުރިން އިންޑިއާގެ ވިޔަފާރިވެރިންނަށް ހާއްސަކުރި ބައްދަލުވުމުގައި އެ މަނިކުފާނު ވަނީ ބޮލީވުޑްގެ ފިލްމުތައް ރާއްޖޭގައި ޝޫޓްކުރަން ވެސް ހާއްސަ ދައުވަތު ދެއްވައިފަ އެވެ.

ރައީސް ވިދާޅުވީ، ރާއްޖޭގެ ގުދުރަތީ ރީތިކަން ހިމެނޭ ގޮތަށް ބޮލީވުޑްގެ ފިލްމުތައް ނެގުމަށް ހާއްސަ ދައުވަތެއް ދެއްވާ ކަމަށެވެ.