ހުސެން މުހައްމަދުގެ ހަނދާނުގައި މަޖިލީހުގައި ސުކޫތެއް ގެނެސްފި

ރައްޔިތުން މަޖިލީހުގެ މަތިވެރި ދާއިރާގެ ކުރީގެ މެމްބަރު ހުސައިން މުހައްމަދު (ހުސެންބެ)ގެ ހަނދާނުގައި މަޖިލީހުގެ މިއަދުގެ ޖަލްސާގައި ސްކޫތެއް ގެނެސްފި އެވެ.

މަޖިލިހުގެ މެމްބަރުކަން ތިން ދައުރު ކުރެއްވި ހުސެން މުހައްމަދުގެ ހަނދާނުގައި ހަމަހިމެނޭކަމުގެ ސްކޫތެއް ގެންނަން އެދިވަޑައިގެންނެވީ ރިޔާސަތުން މަޖިލީހުގެ ނައިބު ރައީސް އީވާ އަބްދުﷲ އެވެ.

އީވާ ވިދާޅުވީ މަޖިލީހުގައި ހިނގާ ދެބަސްވުންތައް ކިތަންމެ ހަލަބޮލިވެގެން ދިޔަސް ހުސެންބެއަކީ ރަހުމަތްތެރިކަމާއި އެކުވެރިކަމާއި ހިތްހެޔޮކަން އިސްކުރެއްވި ބޭފުޅެއް ކަަމަށެވެ. އޭނާއަކީ މަޖިލީހުގައި ކުރެއްވި ބަހުސްތަކުގައި ތެދު ބަސް ވިދާޅުވި މެމްބަރެއް ކަމަށް ވެސް އީވާ ވިދާޅުވި އެވެ.

"އަޅުގަނޑުމެންނާ ވަކިވެގެން މިދިޔައީ މި ގައުމަށް ވަރަށް ގިނަ ދާއިރާތަކެއްގައި މަސައްކަތް ކޮށްދެއްވި އިޚުލާސްތެރި ހިދުމަތްތެރިއެއް،" އީވާ ވިދާޅުވި އެވެ.

ހުސެން މުހައްމަދުގެ ހަނދާނުގައި މަޖިލީހުގައި ތައުޒިޔާގެ ދަފްތަރެއް ހުޅުވާނެ ކަން ވެސް އޭނާ އިއުލާނުކުރެއްވި އެވެ.

އީވާ ވިދާޅުވީ އެ ދަފްތަރުގައި އާއްމުންނަށް ވެސް ސޮއިކުރެވޭނެ ކަމަށެވެ. އަދި މަޖިލީހުގެ ކުރީގެ މެމްބަރުން ވެސް ވަޑައިގެން އެ ދަފްތަރުގައި ސޮއިކުރައްވަން އެދިވަޑައިގެންނެވި އެވެ.

ހުސައިން މުހައްމަދު, 71, ވަނީ ސިޔާސީ، ތައުލީމީ އަދި މީޑިއާގެ ދާއިރާގައި ގިނަ ޚިދުމަތްތަކެއް ކުރައްވައިފަ އެވެ.

އާ ގާނޫނު އަސާސީގެ ދަށުން ގިނަ ދާއިރާތަކަކަށް ރައްޔިތުންގެ މަޖިލިހުގެ ގޮނޑި ހާއްސަވުމުގެ ކުރިން އަރިއަތޮޅު އުތުރު ބުރީގެ މެންބަރުކަން ކުރެއްވުމުގެ އިތުރުން 2009 އިން 2019 އާ ދެމެދު، މަތިވެރި ދާއިރާގެ ގޮނޑި ދެ ދައުރުގައި އޭނާ ފުރުއްވި އެވެ.

ހުސެއިން މުހައްމަދު ފުރަތަމަ މަސައްކަތްކުރެއްވީ ޑީއާރުޕީގަ އެވެ. އަވަހާރަވި އިރު ހުންނެވީ ޖުމްހޫރީ ޕާޓީގެ ކައުންސިލް މެންބަރަކަށެވެ.