ހެނދުނު ހައެއް ޖަހާއިރު ފިހާރަތައް ހުޅުވޭ ގޮތަށް ހަމަޖައްސައިފި

މާލެ ސަރަހައްދުގައި ހިންގާ ފިހާރަތައް މާދަމާ އިން ފެށިގެން ކޮންމެ ދުވަހެއްގެ ވެސް ހެނދުނު ހައެއް ޖަހާއިރު ހުޅުވޭނެ ކަމަށް އިކޮނޮމިކް މިނިސްޓްރީން މިއަދު ބުނެފި އެވެ.

ކޮވިޑް-19 އިން ރައްކާތެރިވުމަށް މާލެ އާއި ވިލިމާލެ އަދި ހުޅުމާލޭގައި ސަރުކާރުން އިއުލާން ކޮށްފައިވާ ރައްކާތެރިކަމުގެ ފިޔަވަޅުތަކާ އެކު، މިހާތަނަށް ފިހާރަތައް ހުޅުވުމުގެ ހުއްދަ ދީފައި ވަނީ ހެނދުނު 9 އިން ރޭގަނޑު 9:30 އަށެވެ. ނަމަވެސް ކެފޭ/ރެސްޓޯރަންޓުތަކުން ފަތިހު 5 ޖަހާއިރު ޚިދުމަތް ދޭން ފަށާއިރު، ފިހާރަތައް ހުޅުވުން އެ އަށް ވުރެ ލަސްކުރުމުން އެތައް ބަޔަކަށް އުނދަގޫވެ، އެކަމަށް ހައްލެއް ހޯދައި ދިނުމަށް ސަރުކާރުގައި އައީ އެދެމުންނެވެ.

އެހެންވެ، އިކޮނޮމިކް މިނިސްޓްރީން މިއަދު ގެޒެޓު ކުރި އިއުލާނުގައި ބުނީ، މާދަމާ ހެނދުނު 6 އިން ފެށިގެން ފިހާރަތައް ހުޅުވުމުގެ ހުއްދަ ދީފައިވާ ކަމަށެވެ. ކޮވިޑުން ރައްކާތެރިވުމަށްޓަކައި މުޅި ރާއްޖޭގައި ސިއްހީ ނުރައްކަލުގެ ކުއްލި ހާލަތު އިއުލާން ކޮށްފައިވާ މި ދުވަސްވަރު މާދަމާ އިން ފެށިގެން މާލެ ސަރަހައްދުގައި ފިހާރަތައް ހުޅުވިފައި ހުންނާނީ ހެނދުނު 6 އިން ރޭގަނޑު 9:30 އަށް ކަމަށް އިއުލާނުގައި ވެ އެވެ. ކޮވިޑުގެ މި ދުވަސްވަރު މާލެ ސަރަހައްދުގައި މިހާތަަނށް ވެސް ފިހާރަތަކާއި ކެފޭ/ރެސްޓޯރަންޓުތައް ބަންދުކުރާ ގަޑިއަކީ ރޭގަނޑު 9:30 އެވެ. އާންމު ހުރިހާ ވިޔަފާރިއަކާއި ކެއުންބުއިމުގެ ވިޔަފާރި ވެސް އެ ގަޑިއަށް ބަންދުވާނެ އެވެ.

ކަސްޓަމަރުންނަށް ޚިދުމަތް ހޯދާފައިވާ ގަޑިތަކުގައި އެޗްޕީއޭގެ އުސޫލަށް ތަބާވުމަށް އިކޮނޮމިކް މިނިސްޓްރީގެ އިއުލާނުގައި އިލްތިމާސް ކޮށްފައި ވެ އެވެ.

މާލެ ސަރަހައްދުގައި އަދިވެސް ކޮވިޑް ކޮންޓްރޯލް ނުވެ، ހަލުވިކަމާ އެކު ފެތުރޭތީ، މިހާރު ކޮންމެ ރެއެއްގެ 10 އިން ފެށިގެން ފަތިހު 5 އަށް އޮންނަނީ ކާފިއު އިއުލާންކޮށްފަ އެވެ. ރޭގަނޑު 8 އިން ފަތިހު 5 އަށް ވެހިކަލްތައް ދުއްވުން ވެސް މަނަލެވެ. އެއާ ޚިލާފުވާ މީހެއް ނަމަ 1،000ރ. އިން ޖޫރިމަނާ ކުރެ އެވެ.