އަނގަޔަށް ލައްފިލުވާ އެޅި މައްސަލައިގައި ކުރީ ގަސްތުގައި މަރާލަން އުޅުމުގެ ދައުވާ

ރ. އަލިފުށީގައި އަންހެނެއްގެ އަނގަޔަށް ލައްފިލުވާ އެޅި މައްސަލައިގައި އޭނާގެ ކުރީގެ ފިރިމީހާގެ މައްޗަށް، ގަސްދުގައި މީހަކު މަރާލަން އުޅުމުގެ ދައުވާކޮށްފި އެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުން ބުނީ މިދިޔަ މަހުގެ އެއް ވަނަ ދުވަހު އަލިފުށީގައި ހިނގައިދިޔަ ހާދިސާއާ ގުޅިގެން އެ ރަށު ކަސްތޫރިގެ، އަލީ އަމީންގެ މައްޗަށް ދައުވާކުރަން މެޖިސްޓްރޭޓް ކޯޓަށް ހުށަހަޅާފައިވާ ކަމަށެވެ.

އޭނާއަށް ކުރާ ދައުވާތަކުގެ ތެރޭގައި ގަސްދުގައި މީހަކު މަރާލަން އުޅުމުގެ ކުށުގެ ދައުވާ އާއި އަނިޔާއެއް ދިނުމުގެ ދައުވާ އަދި އެނގިހުރެ ހުއްދަ ނޫން ތަނަކަށް ވަނުމުގެ ދައުވާ ހިމެނެ އެވެ.

ލައްފިލުވާ އެޅި މައްސަލައިގައި 32 އަހަރުގެ އެ މީހާ ފުލުހުން ހައްޔަރު ވެސް ކުރި އެވެ. އެ ދެ މީހުންގެ ދަރިއަކު ވެސް ހުރެ އެވެ.

އަންހެން މީހާގެ އަނގަޔަށް ލައްފިލުވާ އެޅިއަސް އޭނާގެ ހަށިގަނޑުގެ އެތެރެއަށް ނުދެ އެވެ. މައްސަލަ ހުށަހެޅުމާއެކު ފުލުހުން އެ އަންހެން މީހާ ހެލްތު ސެންޓަރަށް ގެންގޮސް ފަރުވާދެވޭނެ އިންތިޒާމް ހަމަޖެއްސި އެވެ.