މާސްކު އެޅުން މަޖުބޫރު ނުކުރަންވީ ސަބަބެއް މި ވަގުތު ނެތް: އަމީން

ކޮވިޑް-19 އިން ރައްކާތެރިވުމުގެ ފިޔަވަޅެއްގެ ގޮތުން މާސްކު އެޅުން މަޖުބޫރު ނުކުރަންވީ ސަބަބެއް މިހާރު ނެތް ކަމަށާއި އެކަމާ މެދު ގޮތެއް ނިންމަވާނެ ކަމަށް ހެލްތު މިނިސްޓަރު އަބްދުﷲ އަމީން މިރޭ ވިދާޅުވެއްޖެ އެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކުރިން ބުނެފައިވަނީ މާސްކު އެޅުން މަޖުބޫރުކުރުމުގެ ވިސްނުމެއް އަދި ނެތް ކަމަށެވެ. އެކަމަކު މާލޭގައި ކޮވިޑް ފެތުރުން އަނެއްކާވެސް އިތުރުވަމުންދާ މި ދަނޑިވަޅުގައި، "ރާއްޖެ ޓީވީ" ގެ ލައިވް ޕްރޮގްރާމެއްގައި ކުރި ސުވާލަކަށް ޖަވާބުދެއްވަމުން، އަމީން ވިދާޅުވީ ޕޮޒިޓިވްވާ މީހުންގެ އަދަދު އިންތިހާ އަށް އިތުރުވަމުންދާ ނަމަ ވަގުތުން ވަގުތަށް އަޅަން ޖެހޭ ފިޔަވަޅުތަކެއް ހުންނާނެ ކަމަށާއި އެ ގޮތުން މަޖުބޫރުކުރާ ހާލަތަށް ދާ ކަންކަމުގެ ތެރޭގައި މާސްކު އެޅުން ވެސް ހިމެނިދާނެ ކަމަށެވެ.

"މި ދެންނެވިހެން މާސްކު އެޅުން ވެސް ހަމަ މަޖުބޫރުކުރާ ހާލަތު. އެއީ މަޖުބޫރު ނުކުރަން ޖެހޭ ހާލަތެއް އޮތް ކަމަކަށް އަޅުގަނޑު ނުދެކެން މިހާރު، އިނގޭތޯ؟ އެހެންވީމާ އަޅުގަނޑުމެންގެ ތެރޭގައި މަޝްވަރާކޮށްފައި އެކަމަށް އަޅުގަނޑުމެން ގޮތެއް ނިންމާނަން،" އަމީން ވިދާޅުވި އެވެ.

ކޮވިޑުން ރައްކާތެރިވުމަށް މާސްކުގެ ބޭނުންތެރިކަން ބޮޑު ނަމަވެސް މާލޭގައި މާސްކު ނާޅާ އުޅޭ މީހުން މަގުމަތިން ފެންނަލެއް ގިނަކަން ފާހަގަކުރައްވައި މިނިސްޓަރު ކަންބޮޑުވުން ފާޅުކުރެއްވި އެވެ.

އަމީން ވިދާޅުވީ ސަރުކާރުން "އަސާސީ ކަމެއްގެ ގޮތުގައި" ކުރަމުންދިޔައީ ފިޔަވަޅު އެޅުމުގެ ބަދަލުގައި މީހުންނަށް މައުލޫމާތު ދީ ހޭލުންތެރިކުރުވައި ވިސްނައިދީގެން މި ބަލިން ރައްކާތެރިކުރުމުގެ މަސައްކަތް ކަމަށެވެ. އެކަމަކު އުސޫލުތަކަށް ތަބާނުވާ ނަމަ ފިޔަވަޅު އަޅަން މަޖުބޫރުވާނެ ކަން މިނިސްޓަރު ފާހަގަކުރެއްވި އެވެ.

މިހާރު ވެސް މާލޭގެ ބައެއް ތަންތަނުގައި އަދި ބައެއް ހާލަތްތަކުގައި މާސްކު އެޅުން އެޗްޕީއޭ އިން އޮތީ މަޖުބޫރުކޮށްފަ އެވެ. އެކަމަކު ޖުމްލަކޮށް އެޗްޕީއޭގެ އިރުޝާދަކީ ބޭރު ތެރޭ އުޅޭ ހުރިހާ އިރަކު ވެސް މާސްކު އެޅުމެވެ.

އެންމެން މާސްކު އަޅައިގެން އުޅުމަކީ ކޮވިޑް ފެތުރުން ކޮންޓްރޯލްކުރުގެ މުހިއްމު ފިޔަވަޅެއްކަން ބޭރުގެ އެކި ދިރާސާތަކުން ވަނީ އެނގިފަ އެވެ. އަދި ކޮވިޑް ޖެހުނަސް އަލާމާތެއް ނުފެންނަ މީހުން ގިނަކަމުން މާސްކު އެޅުމުގެ ބޭނުންތެރިކަން ބޮޑެވެ. އެހެންވެ، މާސްކު އަޅަން ދުނިޔޭގެ ހުރިހާ ގައުމެއްގައި ވެސް ސިއްހީ މާހިރުން މިހާރު ދަނީ ވަރަށް ބޮޑަށް ބާރުއަޅަމުންނެވެ.