ޓޮމް ކްރޫޒްގެ "ޓޮޕް ގަން: މެވެރިކް" އަންނަ އަހަރަށް ފަސްކޮށްފި

އެކްޓަރު ޓޮމް ކްރޫޒްގެ ފިލްމު "ޓޮޕް ގަން: މެވެރިކް" އަންނަ އަހަރަށް ފަސްކޮށްފި އެވެ.

މި ފިލްމު އެންމެ ފުރަތަމަ ސިނަމާތަކަށް ގެންނަން ނިންމީ ޖޫން މަހުގެ 24 ގަ އެވެ. ނަމަވެސް ފަހުން ވަނީ ޑިސެމްބަރު މަހުގެ 23 އަށް ފަސްކޮށްފަ އެވެ. ނަމަވެސް މި އަހަރު އަޅުވަން ޕްލޭންކުރި ގިނަ ފިލްމުތަކެއްގެ ތާރީހަށް ކޮވިޑް-19 އާ ހެދި ބޮޑެތި ބަދަލުތަކެއް ގެނައި އިރު "ޓޮޕް ގަން: މެވެރިކް" ވެސް މިހާރު ވަނީ އަންނަ އަހަރަށް ތާވަލުކޮށްފައިވާ ފިލްމުތަކުގެ ތެރޭގަ އެވެ.

ގިނަ ބަޔަކު ވަރަށް ބޮޑަށް އިންތިޒާރުކުރަމުން ދިޔަ އެ ފިލްމު ބެލުންތެރިންނަށް ގެނެސްދޭން މިހާރު ނިންމާފައި ވަނީ ޖުލައި 2، 2021 ގަ އެވެ.

"ޓޮޕް ގަން: މެވެރިކް" އަކީ 1986 ގައި ގެނެސްދިން "ޓޮޕް ގަން" ގެ ދެވަނަ ބައެވެ. މި ފިލްމު ޑައިރެކްޓްކޮށްފައި ވަނީ ޖޯސެފް ކޮޒިންސްކީ އެވެ. މި އެކްޝަން ޑްރާމާ ކާސްޓުންގެ ތެރޭގައި ޖެނިފާ ކޮނެލީ، މިލެޒް ޓެލާ، ގްލެން ޕަވަލް ވަލް ކިލްމާ، އެޑް ހެރިސް، ޖޮމް ހެމް އަދި ލުވިސް ޕުލްމަން ހިމެނެ އެވެ. "ޓޮޕް ގަން: މެރެވެރިކް" އަކީ 152 މިލިއަން ޑޮލަރުގެ ބަޖެޓަކުން ހަދާފައިވާ ފިލްމެކެވެ.