ސިއްހީ ސަބަބުތަކާ ހެދި އެމެރިކާގައި ކުޅުންތެރިން މުބާރާތާ ދުރަށް

ލޮސް އެންޖެލްސް (ޖުލައި 7) - އަލުން ފުޓްބޯޅަ ފެށުމުގެ ގޮތުން އެމެރިކާ ކްލަބްތަކުގެ މެދުގައި މާދަމާ ފަށާ "އެމްއެލްއެސް އިޒް ބެކް" މުބާރާތުގައި ސިއްހީ ސަބަބުތަކާ ހެދި ބައިވެރިނުވާން ނިންމާ ކުޅުންތެރިންގެ އަދަދު އިތުރުވެއްޖެ އެވެ.

މާދަމާ ފަށާ އެމްއެލްއެސްގެ މި މުބާރާތަކީ ކޮވިޑް-19ގެ މެދުކެނޑުމަށް ފަހު އަލުން ފުޓްބޯޅަ ފެށުމުގެ ގޮތުން 26 ޓީމުގެ މެދުގައި ބާއްވާ މުބާރާތެކެވެ. އެމެރިކާގެ ފުޓްބޯޅަ ފެޑެރޭޝަނުން ވަނީ މި މުބާރާތުގައި ކުޅުން އެއީ އިހުތިޔާރެއްގެ ގޮތުގައި ކުޅުންތެރިންނަށް ދޫކޮށްލައިފަ އެވެ. އެ ގޮތުން ސިއްހީ ސަބަބަކަށްޓަކައި މި މުބާރާތުގައި ނުކުޅެ ދޫކޮށްލިޔަސް ކުޅުންތެރިންނަށް އަދަބެއް ނުދޭނެ އެވެ.

މި މުބާރާތުގައި ނުކުޅެން މިހާރު އެފްސީ ޑަލަސް އިން ވެސް ވަނީ ނިންމައިފަ އެވެ. އަދި ބައެއް މަޝްހޫރު ކުޅުންތެރިން ވެސް ވަނީ އެކި ސަބަބުތަކަށްޓަކައި މުބާރާތުގައި ނުކުޅެން ނިންމައިފަ އެވެ. އޭގެ ތެރެއިން އެއް ކުޅުންތެރިއަކީ ލޮސް އެންޖެލްސް އެފްސީގެ ފޯވާޑް މެކްސިކޯގެ ކާލޮސް ވޭލާ އެވެ. އަދި މީގެ އިތުރުން ލޮސް އެންޖެލްސް ގެލެކްސީ އަށް ކުޅޭ ބާސެލޯނާގެ ކުރީގެ ވިންގް ޖޮނަތަން ޑޮސް ސަންޓޯސް ވެސް ވަނީ މި މުބާރާތުގައި ކުޅެން ނިންމައިފަ އެވެ.

މިދިޔަ އަހަރުގެ އެމްއެލްއެސްގެ އެންމެ މޮޅު ކުޅުންތެރިޔާގެ މަގާމު ހޯދި ވޭލާ މި މުބާރާތުގައި ނުކުޅެން ނިންމި ސަބަބު ބަޔާންކޮށް އޭނާ ވަނީ ބަޔާނެއް ނެރެފަ އެވެ. ވޭލާ ބުނީ މި ވަގުތު ހާލަތު ހުރި ގޮތުން އޭނާ އަށް އެންމެ މުހިއްމި އޭނާގެ އާއިލާގެ ސިއްހަތު ކަމަށެވެ.

"އެންމެ ރަނގަޅު ގޮތަކީ އަހަރެންގެ އަމިއްލަ ސިއްހަތާއި އަހަރެންގެ އާއިލާ އަށް ވެސް އެންމެ ރަނގަޅު ގޮތަކަށް މިކަން ކުރުން. އަހަރެންގެ އަންހެނުން ބަނޑުބޮޑުވުމަކީ މި ބަލީގެ ރިސްކު އިތުރަށް އޮތް ސަބަބެއް. އަހަރެން ގޭގައި ހުރެ ވެސް އަހަރެންގެ ޓީމަށް ސަޕޯޓް ދޭނަން. އިންތިޒާރުކުރާނީ އަލުން މެޗުތަކަށް ދެވޭނެ ދުވަހަކަށް،" ކުރިން އާސެނަލާއި ރެއާލް ސޮސިއެޑާޑަށް ކުޅުނު ވޭލާ ބުންޏެވެ.

ލޮސް އެންޖެލްސް އެފްސީގެ ކޯޗު ބޮބް ބްރެޑްލީ ބުނީ އެ ކްލަބުން ވޭލާގެ ނިންމުމަށް 100 ޕަސެންޓް ތާއީދުކުރާ ކަމަށާއި މީގެ އެންމެ ރަނގަޅު ގޮތަކީ ވެސް އެންމެ ފުރަތަމަ އަމިއްލަ ނަފްސާއި އާއިލާގެ ސިއްހަތަށް ވިސްނުން ކަމަށެވެ.

ކޮވިޑް-19ގެ ނުރައްކާ މި ވަގުތު އެންމެ ބޮޑުވެފައިވާ އެއް ގައުމަކީ އެމެރިކާ އެވެ. އެމްއެލްއެސް އިން ބާއްވާ މި މުބާރާތް ފުރިހަމަކުރެވިދާނެތޯ ގިނަ ފަރާތްތަކުން ސުވާލު އުފައްދަ އެވެ. ބައެއް މީޑިއާ ރިޕޯޓްތައް ބުނާގޮތުން އެމެރިކާގެ ސަރުކާރުގެ ބައެއް އޮފިޝަލުން އެމްއެލްއެސް އިން ބާއްވާ މި މުބާރާތް ކުރިއަށްގެންދިއުމާ ދެކޮޅެވެ. އެކަމަކު އެމްއެލްއެސް އިން މި މުބާރާތް ބޭއްވުމުގެ އެންމެ ބޮޑު ބޭނުމަކީ ކްލަބްތަކަށް ލިބެމުން އަންނަ މާލީ ގެއްލުންތަކަށް ލުޔެއް ހޯދައިދިނުމެވެ.