ލޮކްޑައުންއާ ހެދި އާއިލާ ނުރޭވި އެތައް މިލިއަން ބަޔަކު ބަލިވެ އިނުން އެކަށީގެންވޭ: އދ

ކޮރޯނާވައިރަހާ އެކު ކުރިމަތިވެފައިވާ ލޮކްޑައުންތައް ގައުމުތަމުގައި ދިގުދެމިގެންދާނެ ނަމަ ނުކުންނާނެ އެއް މައްސަލަ އަކީ އާއިލާ ރޭވުމެއް ނެތި އެތައް މިލިއަން އަންހެނުން ބަލިވެއިނުން ކަމަށް އދ. ގެ އާބާދީއާބެހޭ ޖަމިއްޔާ ޔޫއެންއެފްޕީއޭ އިން ބުނެފި އެވެ.

އެތަނުން ހަދާފައިވާ ދިރާސާއެއްގައި ބުނީ މިހާރު ވެސް ލޮކްޑައުންތަކާ އެކު، ގޭތެރެގައި ގިނަ ބަޔަކު ބަންދުވެގެން ޖެހުމުން ވަރަށް ގިނަ އަންހެނުންނަށް ގެވެށިއަނިޔާ ލިބެމުންދާ ކަމަށެވެ. އެގޮތުން ލޮކްޑައުންގެ ހާލަތު އިތުރު ހައެއްކަ މަހަށް ދިގުދެމިގެން ގޮސްފި ނަމަ ހތް މިލިއަނެއްހާ އަންހެނުން މި ތާށިކަމުގެ ތެރޭގައި މަޖުބޫރީ ހާލަތުގައި ބަލިވެއިންނަން ޖެހިދާނެ ކަމަށް ބުންޏެވެ.

ދިރާސާގައި ފާހަގަކޮށްފައިވާ ގޮތުގައި މިކަން މިގޮތަށް ދިމާވުމުގައި ދެ ގޮތެއް މެދުވެރިވެދާނެ އެވެ. އެއްގޮތަކީ އަަނިޔާވެރި ފިރިންނާ އެކު، އިތުރު އެއްވެސް ގޮތެއް ނެތި އަންހެނުންތަކެއް ބަންދުވެ އުޅެން ޖެހުމާއި ދަރިމައިވުމުގެ ސިއްހަތާ ބެހޭ ޕްރޮގްރާމްތައް ކުރިއަށް ނުގެންދެވި ކުރިތިމަތިވާ ހާލަތްތަކުގައި ބަލިވެއިނުމެވެ.

ދިރާސާގައި ވަނީ ކޮރޯނާވައިރަސް ދުނިޔޭގެ އެކި ހިސާބުތަކުގައި ކޮންޓްރޯލެއް ނެތި ފެތުރެން ފެށިތާ މިހާރު ތިން މަހެއްހާ ދުވަސްވެފައިވާ އިރު، އެ މުއްދަތުގެ ތެރޭގައި ގެވެށިއަނިޔާގެ މައްސަލަތައް އިތުރުވަމުންދާކަން ފާހަގަކޮށްވެ އެވެ. އަދި ލޮކްޑައުން މިގޮތަށް ދިގުދެނިގެންދާ ނަމަ ކޮންމެ ތިން މަހަކުން، ގެވެށިއަނިޔާ ލިބޭ މީހުންފެ އަދަދު 15 މިލިއަނުން އިތިރުވަމުން ކަމަށް ދާނެ ބުންޏެވެ.

ޔޫއެންއެފްޕިއޭ އިން ފާހަގަކޮށްފައިވާ ގޮތުގައި މިހާރު ވެސް 47 މިލިއަން އަންހެނުންނަކީ ދަށް/މެދުފަންތީގެ ގައުމުތަކަށް ނިސްބަތްވާ މީހުންނެވެ. މިކަމުގެ ސަބަބުން، އެ މީހުންނަށް ދޭތެރެކުރަން ބޭނުންކުރާނެ ޒަމާނީ ވަސީލަތް ވެސް ނުލިބޭ ކަމަށާއި އެފަދަ މީހުންނަކީ ޖިންސީ ޝިކާރައަކަށްވެފައިވާ މީހުން ކަމަށް ބުންޏެވެ.

އެހެންވެ މިފަދަ މައްސަލަތައް އިތުރުވަމުންދާ ނަމަ ކުރިއަށް އޮތް 10 ވަރަކަށް އަހަރުގެ ތެރޭގައި ޅަ އުމުރުގައި ކައިވެނިކުރަން މަޖުބޫރުވާ އަންހެނުންގެ އަދަދު 13 މިލިއަނަށް އަރާނެ ކަމަށް ވެސް އަންދާޒާކޮށްފައިވެ އެވެ.

ޔޫއެންއެފްޕީއޭގެ އެކްޒެކެޓިވް ޑިރެކްޓަރު ޑރ. ނަތާލިއާ ކަނެމް ވިދާޅުވީ ކޮވިޑް-19 ގެ މި ހާލަތުގެ ތެރޭގައި އަންހެނުންނާ ގުޅުން ހުރި އިޖުތިމާއީ އެކިއެކި މައްސަލަތަކާ ދޭތެރޭ ސީރިއަސްކޮށް ވިސްނައި ފިޔަވަޅަޅުތަކެއް އަޅަމުން ނުދާ ނަމަ، އަންހެނުންގެ މުސްތަގުލު ވަރަށް އަނދިރިވެދާނެ އެވެ. އެހެންވެ މި ނާޒުކު ދަނޑިވަޅުގައި ވެސް އަންހެނުންނާ ގުޅުން ހުރި މައްސަލަތައް އިސްކަންދޭން ޖެހޭ މިންވަރު އިތުރުކުރަން ޖެހޭ ކަމަށް ވިދާޅުވި އެވެ.