ޓްރީ ޓޮޕާ އެކު ސަރުކާރުން ސޮއިކުރީ ތިން މަސް ދުވަހަށް

ކޮވިޑް-19 ފަރުވާ އަށް ޓްރީ ޓޮޕް ދޫކުރަން އެ ހޮސްޕިޓަލުގެ ބޯޑު ރިޒޮލިއުޝަނެއް ފާސްކޮށް، ސަރުކާރާ އެކު ތިން މަސް ދުވަހަށް އެމްއޯޔޫއެއްގައި ސޮއިކޮށްފައިވާ ކަމަށް ނެޝެނަލް އިމަޖެންސީ އޮޕަރޭޝަން ސެންޓަރު (އެންއީއޯސީ)ން މިރޭ ބުނެފި އެވެ.

މާލޭގައި ހަލުވިކޮށް ފެތުރި ރަށްރަށުން ވެސް ޕޮޒިޓިވް ކޭސްތައް ފެންނަ ބަލީގެ ތަފްސީލް ދޭން ބޭއްވި މީޑިއާ ބްރީފިންގައި ސަރުކާރުގެ ތަރުޖަމާން މުހައްމަދު މަބްރޫކް ވިދާޅުވީ ކޮވިޑް ސެންޓަރެއްގެ ގޮތުގައި ޓްރީ ޓޮޕް ބޭނުންކުރުމުގެ އިންތިޒާމްތައް އެ ހޮސްޕިޓަލުން އަންނަނީ ހަމަޖައްސައިދެމުން ކަމަށެވެ. މާލެ އިން ޕޮޒިޓިވްވާ އަދަދަށް ބަލާއިރު، އެޑްމިޓްކޮށްގެން ކޮވިޑަށް ފަރުވާދޭ ދަރުމަވަންތަ ހޮސްޕިޓަލްގެ 11 ވަނަ ފްލޯ (ޑީއެޗް11) ފުރުމުގެ ބިރު އެބައޮތެވެ.

އެހެންވެ ޓްރީ ޓޮޕް ދޫކޮށްދޭން ސަރުކާރުން އެދިފައިވާ ކަމަށް ވެސް މަބްރޫކް ވިދާޅުވި އެވެ.

"ޓްރީ ޓޮޕުން މިކަމާ ގުޅޭ އިންތިޒާމްތައް ދަނީ ރާއްވަވަމުން. މިކަމާ ގުޅިގެން އެ ބޭފުޅުން އެނައުންސްމެންޓެއް ނެރުއްވާނެ ޚިދުމަތްތައް ކުރިއަށް ގެންދާނެ ގޮތާ ގުޅޭ ގޮތުުން. ޓްރީ ޓޮޕްގައި އެޑްމިޓްކޮށްފައި ތިބި ބަލި މީހުން އައިޖީއެމްއެޗަށް ބަދަލުކުރެވޭނެ،" މަބްރޫކް ވިދާޅުވި އެވެ.

އާއްމު ޚިދުމަތްތައް ރޭވިފައިވާ ގޮތް ވެސް އެ ހޮސްޕިޓަލުން މާދަމާ އިއުލާން ކުރާ ގޮތަށް ވަނީ ހަމަޖައްސައިފަ އެވެ.

ދަރުމަވަންތާގައި ހުރީ އެއްފަހަރާ 10 މީހަކު އެޑްމިޓްކޮށްގެން ފަރުވާދެވޭނެ އިންތިޒާމެވެ.

ކޮވިޑް-19ގެ ހައި ރިސްކު މީހުންނަށް ފަރުވާދޭން ހަމަޖައްސާފައި ވަނީ ފަރުކޮޅުފުށީގަ އެވެ. މީގެ އިތުރުން ވެސް ކަރަންޓީން ފެސިލިޓީތަކުގައި ބައިތިއްބައިގެން ފަރުވާ ދިނުމަށްފަހު ދަރުމަވަންތަ އާއި ޓްރީ ޓޮޕް ހޮސްޕިޓަލަށް ބަދަލުކުރާނީ ހާލު ސީރިއަސްވާ މީހުންނެވެ.

އާއްމުންގެ ތެރެއަށް ބަލި ފެތުރިއްޖެ ހާލަތެއްގައި އެއްފަހަރާ އެތައް ބަޔަކަށް ފަރުވާދެވޭނެ ވަސީލަތްތަކެއް ރާއްޖޭގައި ނެތް ކަމަށް ޑޮކްޓަރުންނާއި ސިއްހީ ޚިދުމަތްތެރިން ކުރިން ވެސް ގެންދެވީ ވިދާޅުވަމުންނެވެ. އެފަދަ ހާލަތެއްގައި މިހާރު ހުރި އެނދުތަކުން، އޮކްސިޖަން، ވެންޓިލޭޓަރަކުން ނުފުދޭ އިރު އެވަރަށް އެޓެންޑްވާކަށް ޑޮކްޓަރުންނާއި ނަރުހުން ނުތިބޭނެ ކަމަށް ވެސް ޑޮކްޓަރުން ވިދާޅުވި އެވެ.

އެހެންވެ މި ބަލީގައި އެންމެ މުހިއްމު ފަރުވާ އަކީ ގޭގައި ތިބުން ކަމަށް އެޗްޕީއޭ އިން ވެސް އައީ ނަސޭހަތްތެރިވަމުންނެވެ. ރާއްޖެ އިން ކޮވިޑަށް ޕޮޒިޓިވް މީހަކު މިދިޔަ މާޗް މަހުގެ ތެރޭގައި ފެނުނު ފަހުން މިހާތަނަށް މި ބައްޔަށް ޕޮޒޓިވްވި ޖުމްލަ އަދަދަކީ 481 އެވެ.