ހުރިހާ ކަމެއް ބަދަލުވީ، ވަޒީފާ ވެސް ގޭގައި!

އަދިވެސް ހަގީގަތް ސާފުނުވާ ކޮވިޑް-19 ގެ ބަލިމަޑުކަމާ ހެދި އިންސާނުންގެ ދިރިއުޅުން މިހާރު މި ވަނީ އެ ފުށްމިފުށަށް ޖެހިފަ އެވެ. މި ހާލަތަށް ފެތެން ގައުމުތަކުން އަންނަނީ ގިނަ މަސައްކަތްތަކެއް ކޮށް، ގިނަ ފިޔަވަޅުތަޅެއް އަޅަމުންނެވެ.

ގެއިން ބޭރަށް ދެވޭކަށް ނެތެވެ. ކުރިން އުޅުނުހެން މީހުންނާ އެކު ސޯޝަލައިޒްވެގެން އާދައިގެ އިޖުތިމާއީ ދިރިއުޅުމެއް އުޅެވޭކަށް ނެތެވެ. އޮފީސްތަކާއި ފިހާރަތަކާއި ކެފޭ/ރެސްޓޯރަންޓްތައް ބަންދެވެ. ސްކޫލްތަކާއި ކޮޖެލްތަކާއި ޔުނިވަސިޓީތައް ބަންދުވެއްޖެ އެވެ. މި ހާލަތާ އެކު މުޅި ދުނިޔެ އަށް މަޖޫރުވެފައި ވަނީ އެ ބަޔަކު ދިރިއުޅޭ އިމާރާތެއްގެ ތެރޭގައި "ބަންދުވެގެން" ތިބެ، ކުރަން ޖެހޭ ކަމެއް ކުރުމަށެވެ. ކިޔަވާ ކުދިން ގޭގަ އެވެ. މަސައްކަތްކުރާ މީހުންގެ ރަސްމީ މަސައްކަތްތައް ގޭގަ އެވެ.

އެހެންވެ ގޮތަކަށް ބުނާ ނަމަ އިންސާނުންގެ މުޅި ދިރިއުޅުން މިހާރު ބިނާކުރަން ޖެހިފައި އޮތީ ގޭގެ ހަތަރުފާރުތެރޭގަ އެވެ. ކޮވިޑް-19 އާ ހެދި ސޯޝަލް ޑިސްޓޭންސިން ނުވަތަ އިޖުތިމާއި ގައިދުރުމުގެ ވާހަކަ އާއި ވޯކް ފްރޮމް ހޯމް (ޑަބްލިއުއެފްއެޗް) ނުވަތަ ގޭގައި ތިބެގެން މަސައްކަތްކުރުން ފަދަ ކަންކަމަކީ އިންސާނުންގެ މި ވަގުތުގެ އާންމު ދިރިއުޅުމެވެ. ކޮވިޑާ އެކު އާންމުވި ޓްރެންޑްތަކެވެ.

ގަބޫލުރަން ޖެހޭ ހަގީގަތަކީ ކޮވިޑް-19 އިން ސަލާމަތް ވިޔަސް، ކުރީގެ ހާލަތަށް ރުޖޫއަވެވެން ނެތް ކަމެވެ. އެހެންވެ ފަރިތަކުރަންވީ އާ އާދަތަކަށެވެ. އެގޮތުން އެންމެ ހާއްސަ އެއް ކަމަކީ ގޭގައި ތިބެގެން މަސައްކަތްކުރުމެވެ. މިއީ ކުރިއަށް އޮތް ތަނުގައި ދުނިޔޭގެ ވަޒީފާގެ ބާޒާރުން ފެންނާނެ ވަރަށް ބޮޑު ބަދަލަކަށް ވެސް ވާނެ އެވެ.

އެކަމަކު ގޭގައި ތިބެގެން މަސައްކަތްކުރަން ޖެހުމަކީ ފަސޭހަ ކަމަކަށް ވެސް ނުވާނެ އެވެ. ނަމަވެސް މި އާދަ އަށް ހޭނެން މަޖުބޫރުވެއްޖެ އެވެ. އެއާ އެކު ދެން އޮތީ ގޭގައި ތިބެގެން މަސައްކަތްކުރެވޭނެ ރަނގަޅު މާހައުލެއް އުފެއްދުމެވެ. އެކަމަށްޓަކައި ތައްޔާރީތައްވެ، ފިޔަވަޅުތަކެއް ވެސް އެޅުމެވެ. އެގޮތުން ތަޖުރިބާކާރުން އަންނަނީ އެކި ކަހަލަ އިރުޝާދުތައް ވެސް ދެމުންނެވެ.

ގޭގައި ތިބެގެން މަސައްކަތްކުރާ އިރު، މިކަން އެންމެ ބޮޑަށް ބަރޯސާވެފައި އޮތީ އިންޓަނެޓާއި ޓެކްނޮލޮޖީއަށެވެ. އެހެންވެ ފުރަތަމަ ކަމަކަށް މިކަންކަމަށް އަހުލުވެރިވުން ވެސް ވަރަށް މުހިއްމެވެ.

މީގެ އިތުރުން ސަމާލުކަންދޭންވީ ވަރަށް ގިނަ ކަންކަން ވެސް އެބަ ހުއްޓެވެ. ގިނަ ބަޔަކާ އެކު އުޅެން ޖެހިފައިވާ ނަމަ އަބަދު ވެސް މާސްކް އަޅަން އިސްކަން ދޭނެ އެވެ. ގިނަގިނައިން އަތް ދޮވުމާއި އުޅޭ ތަން ސާފުތާހިރުކޮށް ބާއްވަން ޖެހެ އެވެ. ގިނަ ވަގުތު އިށީނދެގެން ތިބެ މަސައްކަތް ކުރަން ޖެހުނަސް، ސިއްހަތަށް ފަރުވާތެރިވާން ޖެހެ އެވެ. ހެލިފެލިވެ އުޅުން ވަރަށް މުހިއްމެވެ.

މިސާލަކަށް، ގިނަ ވަގުތު ކޮމްޕިއުޓަރެއްގެ ކައިރީގައި މަސައްކަތްކުރަން ޖެހޭ ނަމަ އަވަސް އަވަހަށް ބްރޭކްތައް ނަގާށެވެ. ތެދުވެލައި، ސްޓްރެޗްވެލައި، ކުޑަކުޑަ ވޯކައުޓްތަކެއް ހަދާލުމަކީ ވަރަށް މުހިއްމު ކަމެކެވެ. މާ ގިނަ އިރު ވަންދެން ސްކްރީނަށް ބަލައިގެން އިންނަން ވެއްޖެ ނަމަ ލޮލަށް ގެއްލުންވާނެ އެވެ. އެހެންވެ އެއީ ވަރަށް ސަމާލުކަން ދޭނެ ޖެހޭނެ ކަމެކެވެ. އަދި މީގެ ސަބަބުން ބޮލުގައި ރިއްސައި، އެ ނޫން ވެސް އެކި ކަހަލަ އުނދަގޫތައް ކުރިމަތިވާނެ އެވެ.

މަސައްކަތްކުރާ ތަން ތަރުތީބުކޮށްފައި، މަސައްކަތްތައް ދުރާލައި ޕްލޭންކޮށްފައި ބަހައްޓާށެވެ. އަދި މަސައްކަތްކުރާ ވަގުތުތަކުގައި އެހެންޏާ ވެސް މަސައްކަތަށް ދާ ގޮތަށް ތައްޔާރުވެގެން ހުރުމަކީ ކުރުން މުހިއްމު ކަމެކެވެ. އެކަމުގެ ސަބަބުން މަސައްކަތަށް ދެވޭ ޝައުގުވެރިކަމާއި މަސައްކަތެއްގައި އުޅެވޭކަމުގެ އިހުސާސްކުރެވޭނެ އެވެ. އަދި ތަނުގެ އަޑު މަސައްކަތްތަކަށް އުނދަގޫނުވާ ވަރަށް ކޮންޓްރޯލެއްގައި ބަހައްޓަން ޖެހޭނެ އެވެ. ގިނަ ބަޔަކާ އެކު އެއް ތަނެއްގައި އުޅޭ ނަމަ ނުވަތަ ކުޑަކުދިން އުޅޭ ތަނެއް ނަމަ ދުރާލައި، އެކަމާ މަޝްވަރާކޮށް، ކަންކަން ކުރާނެ ގޮތްތަކެއް ހަމަޖައްސާފައި ބެހެއްޓުން ބުއްދިވެރި އެވެ.

"ޑިސްޓްރެކްޓް" ވާ ގޮތަށް ގޭ ތެރޭގެ އިންތިޒާމުތައް ހުރެއްޖެ ނަމަ ކުރާ މަސައްކަތަށް ދޭންވާ ސަމާލުކަމެއް ނުދެވޭނެ އެވެ. އެހެންވެ ހުރިހާ ކަމަކަށް ރިއާޔަތްކުރަން ޖެހޭނެ އެވެ.

ގޭގައި މަސައްކަތް ކުރިޔަސް، އެކީގައި މަސައްކަތްކުރި މީހުންނާ އޮންނަ ގުޅުން ދަމަހައްޓާށެވެ. އެގޮތުން ސޯޝަލް މީޑިއާގެ އެކި ޕްލެޓްފޯމްތައް މެދުވެރިކޮށް މުއާމަލާތްކުރުމަކީ މިހާރު ވަރަށް ފަސޭހަކަމެކެވެ. އެހެންވެ އޭގެ ބޭނުން ވަރަށް ބޮޑަށް ހިފަންވާނެ އެވެ.

މާ ބޮޑަށް އެކަހަރިވެގެން އުޅޭ ނަމަ ނަފުސާނީ މައްސަލަތައް ވެސް ކުރިމަތިވާނެ އެވެ. އެހެންވެ އެކަމާ ދޭތެރޭ ވިސްނުން ބަހައްޓަން ވާނެ އެވެ. އެކުގައި މަސައްކަތްކުރާ މީހުންނާއި ރައްޓެހިންނާއި އާއިލާ މީހުންނާ އޮންނަ ގުޅުން ކުޑަވިޔަ ދީގެން ނުވާނެ އެވެ. މިފަދަ ހާލަތެއްގައި އެ މީހުންނާ ވާހަކަ ދައްކާލައި، ކަންކަމާ ބެހޭ ގޮތުން ހިޔާލާއި މަޝްވަރާ ހޯދުމަކީ ވަރަށް ބޭނުންތެރި ކަމަކަށް ވާނެ އެވެ. އަދި މަސައްކަތަކީ ޕްރެޝަރަކަށް ނަހަދާށެވެ. އޭގެ ބަދަލުގައި ފަސޭހަ ވަގުތަކަށް މަސައްކަތްތައް ރާވައިލުން މުހިއްމެވެ.

ރަސްމީ މަސައްކަތްކުރަމުން ގޭގައި ކުރަން ހުންނަ ކަންކަން ވެސް ކުރެވިދާނެ އެވެ. އޭގެ ސަބަބުން ވަގުތުގެ ބޭނުން ރަނގަޅަށް ހިފޭނެ އެވެ. މިސާލަކަށް ރަސްމީ މަސައްކަތްކުރަމުން ގޭގައި ދޮންނަން ހުރި އެއްޗެހި ދޮވުމާއި ކެއްކުން ފަދަ ކަންކަން ހިމެނެ އެވެ. ހަމިއާ އެކު މުނީފޫހި ފިލުވަން ވަގުތު ހުސްކުރުމާއި ދީނީ ކަންކަމަށް ވަގުތު ހުސްކުރުމަކީ ގޭގައި މަސައްކަތްކުރާ އިރު، ވަގުތު ހޯދޭނެ ކަންކަމެވެ.

ކޮވުޑް-19 އިން މިންޖުވާނެ އިރެއް ނޭނގެ އެވެ. އެހެންވެ މިހާރު އޮތްހާ ވެސް ގޮތަކީ މިހާރު މި އުޅެން ޖެހިފައިވާ އާ އާދަތަކަށް ވީހާ ވެސް ބޮޑަށް ހޭނެން މަސައްކަތްކުރުމެވެ.