ކަރަންޓްގެ ޓެރިފް ރޭޓްތަކަށް ބަދަލު ގެނައީ އެންމެ ރަނގަޅު ވަގުތު: ތޯރިގް

ކަރަންޓުގެ ޓެރިފް ރޭޓްތަކަށް ބަދަލު ގެނައީ އެންމެ ރަނގަޅު ވަގުތު ކަމަށާއި އެއީ އިގުތިސާދަށް ގެނައި ހެޔޮ ބަދަލެއް ކަމަށް އެނާޖީ މިނިސްޓަރު ތޯރިގް އިބްރާހިމް މިއަދު ވިދާޅުވެއްޖެ އެވެ.

ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ރައްޔިތުންގެ މަޖިލިހުގެ ކޮމެޓީގައި ވާހަކަ ދައްކަވަމުން ތޯރިގް ވިދާޅުވީ މި އަހަރު ތެރޭގައި ޓެރިފް ރޭޓަށް ގެނައި ބަދަލުގެ ސަބަބުން ދެމެހެއްޓެނިވި ގޮތެއްގައި ކަރަންޓު ފޯރުކޮށްދިނުމަށް އިތުރު ފަސޭހައެއް ލިބޭނެ ކަމަށެވެ. އަދި ޓެރިފް ރޭޓަށް އައި ބަދަލުގެ ސަބަބުން ކަރަންޓު ބިލުތައް އަގު ބޮޑުވި ކަމަށް ދެކެވޭ ވާހަކަތައް މިނިސްޓަރު ދޮގުކުރެއްވި އެވެ.

ތޯރިގް ވިދާޅުވި ގޮތުގައި 2014 ވަނަ އަހަރާ ބަލާއިރު، މިދިޔަ އަހަރު ތެލަށް އައި ބަދަލާ ގުޅިގެން ޔޫޒޭޖް ސާޗާޖަށާއި ފިއުލް ސާޗާޖަށް ހަރަދުވާ ވަރު ވަރަށް ބޮޑަށް ކުޑަވި އެވެ. އަދި މިދިޔަ އަހަރު ތެލަށް އައި ބަދަލާ ގުޅިގެން ބަޖެޓު ކުރެވުނުވަރާއި ހަރަދު ކުރެވުނު ވަރު އެއްވަރެއްގައި ހިފެހެއްޓުނު ކަމަށް އޭނާ ވިދާޅުވި އެވެ.

މިނިސްޓަރުގެ ވާހަކައިގައި ހުލާސާއެއް:

- 2014 ވަނަ އަހަރު ސަބްސިޑީއަށް 808 މިލިއަން ރުފިޔާ ހަރަދު ކުރި

- އެއީ ޔޫސޭޖަށް 234 މިލިއަން ރުފިޔާ، ފިއުލް ސާޗާޖަށް 574 މިލިއަން ރުފިޔާ

- 2015 ވަނަ އަހަރު ސަބްސިޑީއަށް 509 މިލިއަން ރުފިޔާ ހަރަދު ކުރި

- އެއީ ޔޫސޭޖަށް 213 މިލިއަން ރުފިޔާ، ފިއުލް ސާޗާޖަށް 509 މިލިއަން ރުފިޔާ

ތޯރިގު ވިދާޅުވީ މި އަހަރު ކުރީކޮޅު ކުންފުނިތަކުން ތެޔޮ ގަތުމަށް ހޭދަކުރާ ވަރު 7ރ. އަށް ތިރި ކުރުމާ ގުޅިގެން ފިއުލް ސާޗާޖު ކެނޑުނު ކަމަށެވެ. އެހެންވެ، ޔޫޒޭޖް ސާޗާޖުގެ ގޮތުގައި 200 މިލިއަނަށް ވުރެ ގިނަ ރުފިޔާ މި އަހަރު ހަރަދުވާނެ ކަމަށް ވެސް އޭނާ ވިދާޅުވި އެވެ.

"އެހެންވެ ސަރުކާރަށް ފެނުނީ ޓެރިފަށް ބަދަލު ގެނެސްގެން ކުރިއަށް ދާން. ވޭތުވެދިޔަ ދެ އަހަރެއްހާ ދުވަހުގެ ތެރޭގައި އެކަން ކުރިނަމަ، ރައްޔިތުންނަށް ބޮޑު ބުރައެއް އުފުލަން ޖެހޭނެ. އެކަމަކު މި އަހަރު ކުރީކޮޅު އެކަންތައް ކުރީމަ އެންމެ ކުޑަކޮށް މި ބުރަ އުފުލޭނެ ކަމަށް ގަބޫލު ކުރެވުނީ،" ތޯރިގް ވިދާޅުވި އެވެ.

މި ބަދަލާއެކު ސްޓެލްކޯއަށް ވާ ގެއްލުން ފޫބެއްދުމަށް 3،000 ޔުނިޓަށް ވުރެ މަތިން ކަރަންޓް ބޭނުންކުރާ ވިޔަފާރިތަކަށް އައު ބޭންޑްތަކެއް ތައާރަފް ކޮށްފައިވާ ކަމަށް އޭނާ ވިދާޅުވި އެވެ.

މީގެ އިތުރުން ފެނަކަ ކޯޕަރޭޝަނަށްވާ ގެއްލުން ފޫބެއްދުމަށް ކުރިއަށް އޮތް ދެ އަހަރު ތެރޭގައި 10 މިލިއަން ރުފިޔާ ކުންފުނީގެ ހިންގުން ހަރުދަނާ ކުރުމަށް ދޭން ނިންމާފައިވާ ކަމަށް ވެސް ތޯރިގް ވިދާޅުވި އެވެ.

މިނިސްޓަރު ވިދާޅުވީ ސަރުކާރުގެ އަމާޒަކީ ރާއްޖޭގެ ހުރިހާ ރަށެއްގައި 30 ޕަސަންޓު އިއާދަކުރަނިވި ހަކަތަ ގާއިމު ކުރުން ކަމަށާއި ބައެއް ރަށް ރަށުގައި އެ މަސައްކަތް ހިނގަމުންދާ ކަމަށެވެ. އަދި ރާއްޖެއަށް ގެންނަ ޑީސަލް މަދު ކުރަން މިއުޅެނީ އިގްތިސާދީ ފައިދާއަށާއި ޖައްވު ހޫނުވުމަށް މެދުވެރިވާ ސަބަބުތައް ހައްލު ކުރަން ރާއްޖެއަށް ވެދެވެން އޮތް އެހީތެރިކަމެއް ވުމަށް ކަމަށް އޭނާ ވިދާޅުވި އެވެ.

ފެނަކައިން ބުނީ އެ ކުންފުނިން ހިދުމަތް ދެމުން އަންނަ 16 އަތޮޅުގެ ތެރެއިން މިދިޔަ ފެބްރުއަރީ އެކަކުން ފެށިގެން ޓެރިފް ރޭޓް ބޮޑުވީ އައްޑޫ ސިޓީ އާއި ފުވައްމުލަކުގައި ކަމަށެވެ. އެ ބަދަލު އައީ މާލެ ސިޓީ ފިޔަވައި އެހެން ހުރިހާ ރަށަކަށް މިހާރު ކަރަންޓްގެ އަގު އެއް ގޮތް ކުރުމުން ކަމަށް އެ ކުންފުނިން ބުންޏެވެ.

އާ ޓެރިފް ރޭޓާއެކު ހުރިހާ ރަށެއްގައި 400 ޔުނިޓަށްވުރެ މަތީގެ ޔުނިޓުތަކުގެ ބިލްތައް ބޮޑުވެފައިވާއިރު، 400 ޔުނިޓަށްވުރެ ދަށްވެއްޖެނަމަ، ބިލްތައް ކުޑަވެފައިވާ ކަމަށް ފެނަކައިން ބުންޏެވެ. އަދި ޓެރިފް ރޭޓަށް އައި ބަދަލާ ގުޅިގެން ކަރަންޓު ބިލުތަކަށް އަރާވަރު ކުޑަވެގެން ދިޔަ ކަމަށް ފެނަކައިން ބުންޏެވެ. ނަމަވެސް ބިލުތައް ބޮޑުވީ ނިސްބަތުން ވަރަށް މަދު އަދަދެއްގެ ގޭބިސީތަކުގައި ކަމަށް ފެނަކައިން ވަނީ ބުނެފަ އެވެ.

ތިމާވެއްޓާއި ހަކަތައާ ބެހޭ މިނިސްޓްރީން ބުނީ ކަރަންޓުގެ އަގަށް ބަދަލު ގެނައުމުގެ ސަބަބުން، ސްޓެލްކޯއިން ކަރަންޓު ފޯރުކޮށްދޭ ރަށްރަށުން 10 ޕަސަންޓު މީޓަރުތަކަށް ކުޑަވިއިރު، ފެނަކައިން ކުޑަވީ ނުވަ ޕަސަންޓު ކަމަށެވެ. ބިލު ބޮޑުވީ ސްޓެލްކޯގެ 19 ޕަސަންޓުގެ މީޓަރުތަކަށާއި ފެނަކައިގެ 12 ޕަސަންޓު މީޓަރުތަކަށް ކަމަށް ވެސް އެ މިނިސްޓްރީން ބުންޏެވެ. އަދި އެއްވެސް ބަދަލެއް ނާންނަނީ ސްޓެލްކޯގެ 77 ޕަސަންޓު މީޓަރުތަކަށާއި ފެނަކައިގެ 79 ޕަސަންޓު މީޓަރުތަކަށް ކަމަށް ވެސް އެ މިނިސްޓްރީން ބުންޏެވެ.

ސްޓެލްކޯއިން ބުނީ ވީހާވެސް މަދުން ކަރަންޓު ބޭނުން ކުރެވޭނީ ކިހިނެއްކަން އަންގައިދިނުމަށް ރައްޔިތުން ހޭލުންތެރިކުރަމުން އަންނަ ކަމަށެވެ. އަދި ބިލުތައް ބޮޑުވަނީ ބޭކާރު ގޮތުގައި ކަރަންޓު ބޭނުން ކުރަމުން ގެންދާތީ ކަމަށް ވެސް ސްޓެލްކޯއިން ބުންޏެވެ.

މިއަދުގެ ބައްދަލުވުމުގައި މިނިސްޓްރީން ވަނީ ކަރަންޓު ޓެރިފަށް އައި ބަދަލާ ގުޅޭ ތަފްސީލީ މައުލޫމާތުތައް މެމްބަރުންނާ ހިއްސާކޮށްފަ އެވެ. އަދި ބައެއް ރަށް ރަށުގެ ކަރަންޓު ކެނޑެމުން އަންނަ މައްސަލަ ހައްލު ކުރުމަށް ކުރަމުން އަންނަ ކަންކަމާ ބެހޭ މައުލޫމާތު މެމްބަރުން އޮޅުން ފިލުވި އެވެ.