ނުރައްކާ އަންގައިދޭން އިންޑިއާ ފުލުހަކު "ކޮރޯނާ ހެލްމެޓް" އަޅައިގެން

ކޮރޯނާވައިރަހާ ދެކޮޅަށް އިންޑިއާ އިން ކުރާ މަސައްކަތުގެ ދަށުން އެ ގައުމު ތިން ހަފުތާގެ މުއްދަތަކަށް ބަންދުކޮށް، ރައްޔިތުން މަގުމައްޗަށް ނުކުމެ ނޫޅުމަށް ސަރުކާރުން އެންގި ނަމަވެސް އެކަމަށް ތަބާނުވެ، މަގުމަތީގައި އުޅޭ މީހުންނަށް ވައިރަހުގެ ނުރައްކާތެރިކަން އަންގައިދޭން ފުލުހަކު ވައިރަސް ސިފަކޮށްދޭ ހެލްމެޓެއް ބޭނުންކުރަން ފަށައިފި އެވެ.

ޓަމިލް ނާޑޫ ސްޓޭޓްގެ ޗެންނާއީގެ މަގުމަތި ޕެޓްރޯލްކުރަން އުޅޭ ފުލުހުންގެ ތެރެއިން ރާޖޭޝް ބާބޫ އެތައް ބައެއްގެ ސަމާލުކަން ހޯދީ އޭނާ އަޅާ ވައިރަސް ހެލްމެޓުންނެވެ.

މި ހެލްމެޓް ފަރުމާކުރި އާޓިސްޓް ގޯތަމް އޭޝިއަން ނިއުސް އިންޓަނެޝަނަލް (އަނީ) އަށް ބުނީ ވައިރަހެއް ރަމްޒުކޮށްދޭ ގޮތަށް ހެލްމެޓެއް ހަދަން ހިޔާލު އައީ ކޮރޯނާވައިރަހުގެ ނުރައްކާތެރިކަން އަދިވެސް ރައްޔިތުން ސީރިއަސްކޮށް ނުނަގާތީ އެވެ.

"އަހަރެން ހިތަށް އެރީ ނުރައްކާތެރި ވައިރަހެއް ސިފަވާ ގޮތަށް ހެލްމެޓެއް ހަދައިގެން ބޭނުންކޮށްފިއްޔާ މިއިން ކޮންމެވެސް ވަރެއްގެ ނަތީޖާއެއް ފެންނާނޭ. ބޭނުމަކީ މި ވައިރަހުގެ ނުރައްކާތެރިކަން އަންގައިދީ ހޭލުންތެރިކަން އުފެއްދުން." އޭނާ ބުންޏެވެ.

ގޯތަމް ބުނީ ހެލްމެޓަށް ބަދަކުތަކެއް ގެނެސްފައި ހުރީ ކަރުދާސް ބޭނުންކޮށްގެން ކަމަށެވެ. އަދި އެ ހެލްމެޓާ އެކު، ކޮރޯނާވައިރަހާ ގުޅޭ މެސެޖްތައް ލިޔެފައިވާ ބޯޑްތަކެއް ވެސް ޗެންނައި ފުލުހުންނަށް ހަދިޔާކުރި ކަމަށް ބުންޏެވެ.

"އަހަރެން ވަރަށް އުފާވި ފުލުހުން އެ ހެލްމެޓް ބޭނުންކުރަން ފެށީމަ." އޭނާ ބުންޏެވެ.

"ކޮރޯނާ ހެލްމެޓް" ގެ ނަމުން މަޝްހޫރު ހެލްމެޓް އަޅައިގެން މަގުމަތި ޕެޓްރޯލް ކުރަން އުޅޭ އިންސްޕެކްޓަރު ރާޖޭޝް ބުނީ އެ ހެލްމެޓަކީ މިހާރު މަގުމައްޗަށް ނުކުންނަ މީހުން މައިތިރިކުރަން ބޭނުންކުރާ އެންމެ މުހިއްމު އެއް ވަސަީލަތް ކަމަށެވެ.

"އަހަންނަށް ގަބޫލުކުރެވޭ މި ހެލްމެޓްގެ ސަބަބުން އާންމުންގެ ތެރޭގައި ވައިރަހުގެ ނުރައްކާތެރިކަން އޮތް މިންވަރު ބޮޑުވެގެންދާނެ ކަމަށް." އޭނާ ބުންޏެވެ. "އަދި މިކަން ސީރިއަސް ކަމެއްގެ ގޮތުގައި ދެކޭނެ ކަމަށް."

ރާޖޭޝް ބުނިގޮތުގައި މި ކޮރޯނާ ހެލްމެޓް އަޅަައިގެން ހުންނަ ތަން ފެނުމުން މަގުމަތީގައި އުޅޭ ކުޑަކުދިން ވެސް ބިރުން ދުވެ ގޮސް ގެއަށް ވަންނަކަން މިހާރު ފާހަގަކުރެވޭ ކަމަށެވެ.

ކޮރޯނާވައިރަހާ ދެކޮޅަށް އިންޑިއާ އިން ގިނަ ފިޔަވަޅުތަކެއް އަޅާފައިވާ އިރު، އެ ވައިރަހުގެ ސަބަބުން ޖެހޭ ކޮވިޑް-19 ގައި އެ ގައުމުން މަރުވި މީހުންގެ އަދަދު މިހާރު 30 އާ ގާތްކުރެ އެވެ. އަދި ބަލި ޖެހުނު މީހުންގެ އަދަދު 900 އަށް ވުރެ ގިނަ އެވެ.