ހުރިހާ ޑޮކްޓަރުން ކްރިޓިކަލް ކެއާ އަށް ތަމްރީން ކުރަނީ

ރާއްޖޭގައި މި ވަގުތު ތިބި ހުރިހާ ޑޮކްޓަރުން ކްރިޓިކަލް ކެއާ އަށް ތަމްރީން ކުރަން ނިންމައިފި އެވެ.

ދަރުބާރުގޭގައި ހިންގާ ނޭޝަނަލް އިމަޖެންސީ އޮޕަރޭޝަން ސެންޓަރުގައި ރޭ ބޭއްވި ނިއުސް ކޮންފަރެންސްގައި، ފުއްޕާމެއާ ބެހޭ ހާއްސަ ޑޮކްޓަރު، ޑރ. މޫސާ ހުސައިން ވިދާޅުވީ، ކޮވިޑް-19 އަށް ޕޮޒިޓިވްވާ މީހުންގެ ތެރެއިން 15 ޕަސެންޓް މީހުންގެ ހާލު ވަރަށް ބޮޑަށް ގޯސްވާ ކަމަށެވެ. އެހެންވެ އެ މީހުންނަށް ފަރުވާ ދޭނެ ގޮތްތައް ބަލަންޖެހޭ ކަމަށް ވިދާޅުވި އެވެ.

އޭނާ ވިދާޅުވީ ހާލު ދެރަވާ މީހުންނަށް ފަރުވާ ދޭއިރު، ބޭނުންވަނީ ކްރިޓިކަލް ކެއާ ދިނުމުގެ ތަމްރީން ލިބިފައިވާ މީހުން ކަމަށެވެ. އެއީ ވެންޓިލޭޓަރު ވެސް މެނޭޖް ކުރެވޭ މީހުން ކަމަށާއި އެ ތަމްރީން ލިބިފައި ތިބީ ދުނިޔޭގެ ނިސްބަތުން ވެސް ވަރަށް މަދު ބައެއް ކަމަށް ޑރ. މޫސާ ވިދާޅުވި އެވެ.

"މިހާރު ވަރަށް ބޮޑު އަހައްމިއްޔަތު ކަމެއް އެބަ ދެމޭ މި ގޮތަށް އަޅުގަނޑުމެންގެ ހެލްތު ކެއާ ވޯކާސް، އެއީ އަޅުގަނޑުމެންގެ ޑޮކްޓަރުން. ހުރިހާ ފަންތިއެއްގެ ވެސް. ހުރިހާ ފަންތިއެކޭ މި ދެންނެވީ ކަށީގެ ޑޮކްޓަރުން، އަންހެނުންގެ ހާއްސަ ޑޮކްޓަރުން އެހެން ނޫނީ ހަމުގެ ހާއްސަ ޑޮކްޓަރު. މި ހުރިހާ ޑޮކްޓަރުން ވެސް އަޅުގަނޑުމެން ޓްރެއިން ކުރަން މި އުޅެނީ ކްރިޓިކަލް ކެއާ އަށޭ،" ސަރުކާރުގެ އެންމެ ބޮޑު ހޮސްޕިޓަލް، އައިޖީއެމްއެޗުގެ ސީނިއާ ޑޮކްޓަރުންގެ ތެރޭގައި ހިމެނިވަޑައިގަންނަވާ މޫސަ ވިދާޅުވި އެވެ.

އޭނާ ވިދާޅުވި ގޮތުގައި، ކްރިޓިކަލް ކެއާގެ ތަމްރީނުތައް އަންނަ އާދިއްތަ ދުވަހު ފަށާނެ އެވެ. ތަމްރީނުތައް ބާއްވަނީ ކޮވިޑް-19 ގެ އިމަޖެންސީ ރެސްޕޮންސް ޓީމަށް އެހީތެރިވުމަށް، ޓޫރިޒަމް އިންޑަސްޓްރީގައި ހަރަކާތްތެރިވާ ފަރާތްތަކުން ރާއްޖެ ގެނައި ޓީމުގައި ހިމެނޭ ސައުތު އެފްރިކާގެ ޑޮކްޓަރެއްގެ އެހީގަ އެވެ.

އޭނާ އަކީ ކްރިޓިކަލް ކެއާ ސްޕެޝަލިސްޓެކެވެ.

މިދިޔަ ހަފުތާގައި ރާއްޖެ އައި ޓީމުގައި ހިމެނެނީ ސައުތު އެފްރިކާގެ އިތުރުން އެމެރިކާ އާއި އިނގިރޭސި ވިލާތުގެ ދެ ޑޮކްޓަރުންނާއި ދެ ނަރުހުންގެ އިތުރުން މެޑިކަލް ޓެކްނީޝަނެކެވެ.

ޑރ. މޫސަ ވިދާޅުވީ، ކްރިޓިކަލް ކެއާގެ ތަމްރީނުތަކުގައި، ރާއްޖޭގެ ހުރިހާ ޑޮކްޓަރުން ބައިވެރި ކުރަން ބޭނުންވާ ކަމަށެވެ. އެކަމުގެ މިސާލެއްގެ ގޮތުން ދެއްކެވީ، ކޮވިޑް-19 އަށް ޕޮޒިޓިވްވެ، މި ވަގުތު އެންމެ ނާޒުކު ހާލަތުގައި އޮތް އިޓަލީ އެވެ. އޭނާ ވިދާޅުވި އެ ގައުމުގައި ވެސް އެ ބަލި ޖެހިގެން އަންނަ މީހުންގެ ތެރެއިން 80 އަހަރުން މަތީގެ މީހުން ހޮސްޕިޓަލުން ދޫކޮށްލަނީ ކަމަށެވެ.

"އަޅުގަނޑުމެން ބޭނުމެއް ނުވޭ، އަޅުގަނޑުމެންގެ އެއްވެސް ބަލި މީހަކު ދޫކޮށްލާކަށް. އަޅުގަނޑުމެން ބޭނުންވަނީ އެންމެންނަށް މި ބަލީގެ ފަރުވާ ދޭން،" ޑރ. މޫސަ ވިދާޅުވި އެވެ.

އޭނާ ވިދާޅުި ގޮތުގައި، ކްރިޓިކަލް ކެއާގެ ހާއްސަ މީހުން އެ ވަރަށް ނެތް ކަމުގައި ވިއަސް ހުރި ވަސީލަތްތަކެއް ބޭނުންކޮށްގެން ސީރިއަސް ހާލަތްތަކަށް އެންމެން ތައްޔާރު ކުރާނެ އެވެ.

"އަޅުގަނޑުމެންގެ އެންމެ ބޮޑު އަޒުމަކީ ރާއްޖޭގައި މިހާރު ހުރި، ހުރިހާ ޑޮކްޓަރުން މި ކަމަށް ޓްރެއިން ކޮށްފައި، މި ގޮތަށް އަންނަ މީހުންގެ އޮކްސިޖަން ދަށްވެއްޖިއްޔާ އެ ބައި މެނޭޖްކޮށް، ވެންޓިލޭޓަރަށް ލާން ޖެހިއްޖެ ހާލަތެއް އައިސްފިއްޔާ ވެންޓިލޭޓަރަށް ލައިގެން ވެސް މެނޭޖް ކުރުމޭ. އިރާދަކުރެއްވިއްޔާ އަޅުގަނޑުމެންގެ މެކްސިމަމް ކެޕޭސިޓީ ބޭނުންކޮށްގެން މި ކަމަށް އެންމެން ތައްޔާރުކުރާނަމޭ،" ޑރ. މޫސަ ވިދާޅުވި އެވެ.

ރާއްޖެ އިން ކޮވިޑް ބަލި ޖެހުނު މީހުންގެ ތެރެއިން އެންމެ ބޮޑަށް ހާލު ގޯސްވި، އިޓަލީގެ އުމުރުން 72 އަހަރުގެ ޓޫރިސްޓް ފިރިހެން މީހާ މިހާރު އެ ބައްޔަށް ނެގެޓިވް ވެފައިވާއިރު، އޭނާ އަށް ފަރުވާ ދެއްވުމުގައި އިސްކޮށް ހުންނެވީ ވެސް ޑރ. މޫސާ އެވެ. ބަތަލާ އައިލެންޑް ރިސޯޓު އެ ޓޫރިސްޓު މީހާ ދަރުމަވަންތަ ހޮސްޕިޓަލަށް ގެންގޮސް އައިސީޔޫގައި ފުރަތަމަ ފަރުވާދީ، އަދި ވެންޓިލޭޓަރު ވެސް ގުޅި އެވެ. ނަމަވެސް، ޑޮކްޓަރުންގެ އެހީތެރިކަމާ އެކު، އޭނާގެ ހާލު މިހާރު ރަނަގަޅެވެ. އެ ޓޫރިސްޓް މީހާގެ އިތުރުން އޭނާގެ އަންހެނުން ވެސް ކޮވިޑަށް ޕޮޒިޓިވް ވި އެވެ. އެ އަންހެންމީހާ ވެސް ފަހުގެ ޓެސްޓުތަކުން ވަނީ ނެގެޓިވް ވެފަ އެވެ.

ދުނިޔޭގައި ފެތުރެމުންދާ ބަލިމަޑުކަމެއްގެ ގޮތުގައި ކަނޑައަޅާފައިވާ ކޮވިޑް-19އަށް ރާއްޖެ އިން 13 މީހަކު ޕޮޒިޓިވްވެފައި ވެ އެވެ. އޭގެ ތެރޭގައި ދިވެއްސަކު ނެތެވެ.